Read Angguruk Yali MAZMUR 66 Bible Online

MAZMUR 66 - Angguruk Yali bible

MAZMUR 66

¹Sini milaltuk lit yunggultuk latfahon tu: Hit ap o pumbuk obog tohowen Allah fahet henehiyehen sini yunggultuk lamek!

²At unuk fanowon sini fam suwap tiyek! Allah eneg palimu wereg ulug At wel tiyok!

³Allah ubam henele uruk lit, ”Haren mun ane man ane hine roho turuk lahenon fahet ap obog tohowen enekol haruk lit Hat men seli roho wereg inap oho holohotma kunuk toho hur atuk.

⁴Ap kinang atogman atogma werehon obog toho enelenggen fam hur atuk lit Allah unuk fano ulug sini yunggultuk lamag,” iyek.

⁵Allahn ap kinangmon unubam su ane turukon yet ha maniyek! Aren turukon fahet ap enekolen unuwag elek-elek angge ruruk.

⁶Aren ik ahum suwon firihap tibagma nunumbasi kinang lilog teg keyen fuma fil nindig atfareg enehiyehen at wel turuk latfag.

⁷At ilen o pumbuk obog toho kim isaruk lit mun angge man angge kinangma werehon ine roho senegman eneg welaruhu. Allah fahet ninirim perukon arimanowen At olohotma palimuwap taruk lit ele ying turuk lamuhup fug.

⁸Allah niren wel turuk laheyon o pumbuk obog toho welahep hinaben oho wel turuk lamek! Henele hi roho fog tiyek!

⁹Allahn nit fet nenesugmu nunuyug ahap sultuk toho wat ta fug angge fano roho nonoluk welahe.

¹⁰Nunubabut hal amag ulug melei il yanggowap turuk lit indokma iringguruk hag toho Hat Allahn nir oho indok fam wal nisarikin.

¹¹Nit yebangge elma luhur amag ulug og neneplug larikin. Anggin angge ha roho walug lawag ulug nunumaloma imbik laharikin.

¹²Nit kinangma yinggigmu ap nununggul ke sobit-sabat nisil lawag ulug mon enebik waharikin. Ik suwon paltukuk, indok ambulpul turukon elma kurukuk angge famen haren windat neneptuk lit kinang fanoma hondog neneplug waharikin.

¹³An asengseng toho wereg lit Hat hubam sali irikik ane hikirap timin ulug wam waroho hubu lahaptukon eke Hat hibam walug watmin.

¹⁵Wam kambing domba yuhambukon men sapi men sei werehon eneg walug watminteg waroho hubu lahapmin.

¹⁶Hit Allah fahet henekol toho welahebon, Allahn an nubam turuk latisiyon fahet hiyag hisaminen maniyek!

¹⁷Anden nele hi roho ubam sembahyang uruk latikik. Ketiya At unuk palimuwap turuk latmin.

¹⁸An nindimuwen siyag ane timin ulug wenggel hele halug Nikni Allahn nele hol neyelep fug angge famen

¹⁹anden nele ubam uruk latikikon Allahn hol niyarisi.

²⁰Aren inggik kobog niya fug angge anden ubam heng turuk latikikon holtisimu anden At wel turuk laruhuk.