Read Angguruk Yali MAZMUR 67 Bible Online

MAZMUR 67 - Angguruk Yali bible

MAZMUR 67

¹Sini milaloho pinggong watuk lit yunggultuk latfahon tu:

²Allahn nit indi nenesug lit let neneptuk laruhu ulug sembahyang uruk lahe. Aluke nit ninibil yihik lit fet nenesug laruhu.

³Ninikni, ap kinangmon obog toho Haren peruk lahen ane onoluk amag! Allahn fanowap neneptuk ulug ap o pumbuk obog toho inindi anggar amag!

⁴Ap enele wal-wal urukonen Hat wel haptuk lamag. Ununggul unuk enemu-enemu wereg inaben Hat fog haptuk lamag.

⁵O pumbuk kinang atogman atogma werehonen enehiyeg toho wereg lit sini ahil toho yunggultuk lamag! Haren ap o pumbuk obog toho alem unubam werehon fano roho hale feruk lit fet enesug lahen.

⁶Ap enele wal-wal urukonen Hat wel haptuk lamag. Ununggul unuk enemu-enemu wereg inaben Hat fog haptuk lamag.

⁷Ninikni Allahn nit indi nenesug lit weregma nenengginang aru famen nungge-nungge fano roho wilip atisi.

⁸Allahn indi nisarisiyon fahet ap kinang atogman atogma werehon obog tohowen enekol toho welamag!