Read Angguruk Yali MAZMUR 68 Bible Online

MAZMUR 68 - Angguruk Yali bible

MAZMUR 68

¹Dauren sini milaltuk lit yunggultuk latfahon tu:

²Allah in atukmu At fahet ninirim peruk inap arimanowen yet haruk lit enekolen longgo ul ulug hirag arik laruk.

³Indok hubu homhomowen walug laruk hag toho Aren it seliyon arimano hik-hak isaruk. Hindali indokman wiyig atuk hag toho onolok ane turuk inap arimano At olohotman siyag atuk angge famen

⁴Allah ele holtukon arimano enehiyeg toho wereg lit At olohotma enele hi roho sini yunggultuk.

⁵Allah fahet sini yunggultuk lamek! At unuk sini fam wel tiyek! Lek filen[10] waruhu ahun fahet kebunggalem yaho fiyek! At unuk NINIKNI Allah wereg. At olohotma henehiyehen sini yunggultuk lamek!

⁶Allah ibam fanoma werehon ino malik suwarehon inikni wereg lit hiyap yuwohon ili og eneptuk.

⁷Ap enemu wereg lit inilaheg toho werehon arimano onori sehelimu welamuhup ulug inibam hiyag isaruk. Ininggik hele waroho werehon enehiyeg toho welamuhup ulug hele lol eneptuk angge famen Allah ele ying turukon arimano o leimu welamuhup.

⁸Nikni Allah, indam Hat humalikisi enelukema laruk lit lek keyen hondog eneplug laruk latnag.

⁹Israel inap inikni Allah tom Sinai fam inam atuk latfahon ino kinang sobit-sobit larukmu o mek tibag, pohol fo roho osit wambik watfag.

¹⁰Ninikni Allah, Hat hangginang lilog atfagma Haren osit pilaptukmen eneg nin hebeloho ahaluwe atfag.

¹¹Fano atfag ambeg ino humalikisi kibareg yug atfag. Ninikni Allah, ari roho turuk lit Haren ap inilaheg toho werehon fet enesug lahen.

¹²Ninikniyen ele ibahon hiyaben oho ap hiyag usul ulug luhaloho laruk latfag.

¹³Libareg ap hiyag isaruk lit, ”Ap suwon-suwon onotsi sehen senehon men enekolen linggik-longgo urusa,” uruk latfag. Ari irikim it enenggengge huhulangge walug watfahon arimano it hiyap eneg fibir atfag.

¹⁴Fibir atfahon suwe yalma hahon aherabul perak ili ruruk angge fam lombog toho wirihon men, oruk emas umbagpag turukon fam lombog toho wirihon men arimano fibir atukmu ap misihen oho wam foroho ambeg pok atmin pibag fug.

¹⁵Allah mondabi ineyonen ap suwon-suwon hik-hak isarukmu itano osit helep anggen hahon tom Zalmon fene wambik watfag.

¹⁶Tom Basan yaron atel nganik-nganog urukon oho Allah antom wereg angge famen

¹⁷nungge fahet hat tom Basan welahenonen Allahn nibam welaruhu ulug mumal tibag antom Sion fil yet haruk lit hindi siyag atuk? We tem toho NINIKNI Allah tom Sion fam mondabi welaruhu.

¹⁸Ninikni Allah tom Sinai famen waharuk lit wam kudan lisoho walug laruk angge kereta teng-teng angge Aren tohon sehelimu ibam fanoma tom Sion fam watfag.

¹⁹NINIKNI Allah, Hat welahen ambeg palimu laharuk lit ap seliyon ininggik hele waroho hondog eneplug lahik inag. Lahinagma aben Hat hi habul ulug fano-fano angge og hirik waharukmu Hat fahet ninirim peruk inap oho Hat hapma welamuhuk ulug hibam waharuk latfag.

²⁰Ninikni Allahn likiya hupmu anggin angge nit nunubam werehon oko walug nit fahet ha ruruk. Ari fahet At wel turuk lahe. Nit let neneptukon Allah eneg wereg.

²¹Allahn we tem toho windat neneptuk. Nit war amuhup tohon ulug NINIKNI Allahn ili og neneptuk.

²²At fahet ninirim peruk inaben kebunggalem hareyon laruk lit siyag ane turukmen Allahn sen eneplug ununggul arap toho unusuruk laruhu.

²³Ninikni Allahn ele uruk lit, ”Numalikisi, hit men seli roho wereg inap arimano hirag arik lul ulug o Basan ohimu laruson men ik saho ahik ahum apma wamburuson men Anden suhuloho og eneplug waruhuk.

²⁴Waruhukmu it unusuhubon enemep ik hag toho yenggel aruhumu hit mep yenggeleg ke hunuyuhen sobit-sobit larikim meneyen oho milang heheg naruk lamuhup,” irisi.

²⁵An Nikni Allah Hat ap suwonen ap seliyon arimano apmayap eneptikinteg Hat men ap anggolo hibam fanoma waharukmu aben yet hiyaruk.

²⁶Hat men tam larukonen sini yunggultil larukmu, pulmu larukonen pinggong watil larikim, fobik hiyap tuhumonen waruk teltil laruk.

²⁷Laruk lit enele hi roho, ”Hit Yakuben ondohowonen indag henesuhon, palu arik waharuk lamuhup sambil Allah nit NINIKNI wel turuk lamuhup,” uruk.

²⁸Ari urukmu ap winon obog toho enelukema Yakub amloho ilabowon Benyaminen ondohowonen ondohowon larikim onombolim Yehuda inap anggolo werehon onowesi menen enele ngik-ngog til laruk. Fobik Zebulon inap onowesi men Naftali inap onowesi men laruk.

²⁹Ninikni Allah, Haren hine roho turuk lit nit ili og neneptuk latikin hag toho fobik oho hibam wereg lit nit Yerusalem ninap let enepmin ulug hine roho turuk laruhun. Ari roho turukmu yet hiyalug o pumbuk wal taneg werehon onowesiyen fano-fano angge og hirik waharuk lamuhup.

³¹Olomene ik Nil ayegma werehonet ap enehako roho turukon unumalikisiyet lukuram sipuk toho pet enebin! Perak ili ruruk angge yami ril laruk inap arimano huyuhen sobit-sabar isaruk lit ap tog aptuk ane fahet enehiyeg haruk inap hik-hak isaruk laruhun.

³²Mesir inaben tembaga ineyon fam wirig angge walug waharukmu o Etiopia inaben Allah hi rul ulug ininggik leho feruk lamuhup.

³³Hit o pumbuk suwon welahebonen Ninikni Allah wel tul ulug sini yunggultuk lamek!

³⁴At pohol wal tilmu werehap tibahon fene laruk lit ele ine roho urukmu holeg lamek.

³⁵Allah mondabi ine wereg ulug At wel tiyek! At o Israel kinang emberimu wereg lit ine roho turuk ane ariyen kinang obog toho hondo reg lit poholma laharuk.

³⁶Allah ibam fanoman waharuk lit ine roho turukmu yet halug ap obog tohowen enekol haruk. Israel inap Inikni Allahn umalikisi inineyap eneptuk. At eneg wel turuk lamuhup!