Read Angguruk Yali MAZMUR 69 Bible Online

MAZMUR 69 - Angguruk Yali bible

MAZMUR 69

¹E owil fene sini urukon wirim toho Dauren milaltuk lit yunggultuk latfahon tu:

²Nikni Allah, iken yuhat nabil nanggolopma lahik waharuken windat nabik ma!

³An sabelep yaron fam wambulug nuyug timi atuk ambeg eleg. Ik ahum yaron fam wamburukmu ik ine roho waharuk lit og naplug wambirisi.

⁴An nele hum toho urukmen eneg nanggolobag ouk naptuk lit nine eleg atisi. Allahn let napmisi ulug yet hasugmen eneg nil hik atisi.

⁵Alem nubam elegman ap anggolowen an fahet ninirim peruk. It arimano an noruk nunggulmu werehon men wirim teg eleg. Ap inine roho werehonen an nuwabul ulug un ane lombog naptuk. Aben tohon yoholiyangge hilarikik fuhon fahet uwag oko og isahun uruk.

⁶Nikni, siyag ane nubam werehon anden hirahuk fug teg. An napeleg nahunen siyag-siyag ane turuk latikikon Hat holuk.

⁷NIKNI Allah, pohol ha kinang ha seneg lahenon, ap Hat hubam eneg wenggel harukon arimanowen an siyag toho weregma yet niyalug hubam wenggel hiyaruk ane umbusuhup tohon! Hat Israel ninap Ninikni wel haptuk inaben an welahi ane kim niyalug ininggali ha nowen!

⁸Hat fahet aben an ninggaliyap naptuk. Hat fahet an nabug uruk.

⁹An noriyen an fahet pog ahun peruk. Nisingan indag enesuhonen oho ap amuwon peruk.

¹⁰Anden Hat hibam fahet wenggel haruk lahi ane indok ambulpul hag toho nindimu milang turuk. Enele siyag toho uruk lit Hat apmayap haptukon ari an nubam atuk.

¹¹An uba yatuk lit suburu na fug angge weregma iren ninggaliyap naptuk.

¹²An nindi siyahen fesi lahaptuk lahiyon fahet iren inda yag naptuk lit kelem sini nebene uruk.

¹³Ap luhaloho wereg ambehen an nabug urukmu ik olokon nalug nenek turuk inaben an nebene sini yunggultuk.

¹⁴Anden Hat NIKNI Allah hubam sembahyang uruk lahiyon Haren puhun sambil hol niyahun. Haren an hinggik kobog niya fug angge hindi nasug lahenonen let nabuhun.

¹⁵Sabelepma ubuk uhuk tohon numbahakun fug! Aben an fahet ninirim perukmu an ik ahum yaron fam hag toho welahireg windat nabik ma!

¹⁶Ik il ineyonen og naplug apma wambuhuk tohon numbahuk fug! Kiling elma sok laroho kilap nabuk nowen let nabik ma!

¹⁷NIKNI Allah, Hat hubabut fanowonen mondabi hindi nasug lit nele holtuk laruhun. Hindi niyamihinteg haluke yig nuruhun.

¹⁸An hamingmingangge nubam horohole hirag ta fug! An nubam alem angginon weregma hol niyalug folo-folo nibil atuk laruhun.

¹⁹Ap seliyon ininggikmuwen an windat napmin ulug niraham waruhun!

²⁰An ninggaliyap naptuk lit wasubag sup naptukon Hat holuk. Ap an men seli roho werehon obog toho Haren yet isaruk lahen.

²¹Aben apmayap naptukon fahet mondabi siyahap naptuk ulug nindi wat taruk lahi. Ap san an indi nasug lit nindi seyap nabuhu ulug nangno ruruk latikik angge famen ap misig oho nibil atuk eleg.

²²An suburu obok toho weregma nalug war atuk angge og nutuk latusa. Ik obok toho weregma hele ahaluwe sihon og nutuk latusa.

²³Iren Hat holohotman seni esetug naruk ambeg yebangge yep aruhumu it obog toho yebangge elma kuhup.

²⁴Inilen yet hahup tohon inil hubun amag! Enembol fohu reg lit welamag ulug mondabi simbuk tubusuhun.

²⁵Haren holok peruk lahen ane it unubam hilil isahunmu enebene indok ambulpul hag toho lahaku.

²⁶It inibam oboluk aruhumu ap enele teng uhup.

²⁷Haren unusuruk lahen inap arimano iren umbusuk angge famen iren oho mug eneplug laruk. Allahn unusehekma niren unusul fug puk hag angge famen iren sebe roho unusuruk.

²⁸Hat hambeg fanoma kuhup tohon iren siyag ane anggolo turukon Haren winako foroho laruhun.

²⁹Ap onoluk welamuhup ulug ununuk haharoho werehon fam it ununuk men Hat humalikisi ununuk men mangno roho welamuhup tohon siyag ane turuk inap ununuk ware fusuhun!

³⁰Aben an apmayap naptukmu ouk waruk hag toho welahireg Nikni, Hat nibil atuk lit palimuwap nabuhun.

³¹Anden Allah wel timin ulug sini yunggultuk laruhuk. Nikniyen let naptisi ulug tei fam unuk palimuwap turuk laruhuk.

³²Allah sini fam wel turuk ane palimu regma wam sapi humon-hamon At fahet waroho yaltukon arimano apma reg.

³³Apma roho wereg inap arimanowen anden sini fam Allah wel turukmu yet niyalug enehiyeg toho welamuhup. Allah yami ruruk inap inindi se roho welamuhup.

³⁴NINIKNI Allahn ap inilaheg toho werehonen ubam heng uruk ane hol enesug. At umalikisi ininggik hele waroho weregma embeseruk eleg.

³⁵Poholen oho kinangen oho ikma werehonen oho Allah eneg wel turuk lamuhup.

³⁶Aren o Yerusalem nin fanowap tuhureg o pumbuk Yehuda kinang fam werehon suhuloho wiruhumu At umalikisi kinang ino ngi roho welamuhup.

³⁷Iren lin isahupmu unumalikisiyen oho seneg lamuhup. Allah fahet inindi reg inap kinang ino fam welamuhup.