Read Angguruk Yali MAZMUR 7 Bible Online

MAZMUR 7 - Angguruk Yali bible

MAZMUR 7

¹Benyamin ahun Kus inowen un ane Daud ubam lombog tibagma Dauren indi siyahen NINIKNI Allah fam sembahyang uruk lit hunu sini yunggultuk latfahon tu:

²NIKNI Allah, aben an mug naplug waharuken Haren eneg ili og naptuk lit windat napmihin ulug hapma waharuk lahi.

³Haren nahap mapmu nabuhun fug halug ap arimano olomene olokonen hag toho an hagmag saluk toho og naptug larukmu ap misihen oho taluk nabuhu fug.

⁴NIKNI Allah, anden ap arimanowen an nabug uruk ane hikit toho uruk lit nare ele ying telereg it ketiya alem nubam elegman siyahap naptukon arimano enenggengge helele ane ariyen we tem toho ninggikmu siyahon tag teg lalep halug

⁶ap seliyonen mug naplug laruk lit an sen naplepteg unuyuhen sabelepma sobit neyelepma an palimu welahiyon mondabi apma ale.

⁷NIKNI Allah, an siyahap naptuk inaben onolok toho turuken in atmihinteg hahummu het-pet toho siyahap enepmihin. An alem nubam lombohap naptuken Haren ili og naptuk lit hale nubahin!

⁸Ap o pumbuk obog toho Hat walinggoho unduhukmu it enemberimu lehoma hur atuk ambeg lahamihin!

⁹Hat lehoma heriyeg lit o pumbuk obog toho alem unubam werehon kong turuk hahun welahenonen an nubam werehon oho hal nabin. Anden Hat hele holtuk lit siyag ane tirikik fuhon holuk tehen fanowap nabin.

¹⁰Hat hubabut fano reg lit ap unundaman wenggeltuk ane wal isaruk lahenonen ap onolok ane turukon arimano apmayap eneptuk lit Hat hele holtukon palimuwap enepmihin.

¹¹Allahn ap inindi fano roho werehon ili og eneptuk lit an oho nahap hirag napmisi ulug apma laruk lahi.

¹²Allah ubabut fanowonen alem obog toho kong turuk lit likiya hupmu ap siyag ane turukon alem angginon unubam emberuk.

¹³Ap arimanowen nin eke tog wiroho embelug enesehen inggila saloho sap turukmu yet homok!

¹⁴Enentog men eneminggin indok ambulpul hag turukon men ap winon unusul ulug wep toho emberuk angge famen ininggareg wat tahuben wep toho emberuk.

¹⁵Enehummu onolok ane forohoman eneg siyag ane ondoko lahumu nininggareg siyahap taruk ane indag tehe ulug ininggali hahup.

¹⁶Ap winon mako wambukag ulug kinang habuloho yebangge yep teberusa angge famen it ininggareg mako wambuhup.

¹⁷Siyag ane iren turukon ari hebeloho ininggareg unubam aruhu. Onolok ane turukon ariyen kanti lisoho alem angginon unubamap tahup.

¹⁸Anden sini yunggultuk lit, ”NINIKNI Allahn umalikisi ili og eneptuk,” ulug wel turuk laruhuk. ”At eneg palimu wereg,” ulug unuk leho feruk laruhuk.