Read Angguruk Yali MAZMUR 71 Bible Online

MAZMUR 71 - Angguruk Yali bible

MAZMUR 71

¹NIKNI Allah, Hat hapma hirag arik wahireg aben an ninggaliyap nabuhup tohon numbahuk fug.

²Hat humalikisi fet nenesug lahenonen windat nabik watmihin! Anden hubam sembahyang uruk lahiyon hol halug let napmihin.

³Hat an fahet helep owik hag toho weregma an nindi yuwag toho welaruhuken likiya hupmu Hat hapma wam teg laruhuk. Haren an ili og naptuk laruhunon fahet sali irikin. Hat we tem toho an nubahet helep owik ap seliyon kuk fug tehon hag toho welahen.

⁴Nikni Allah, Hat fahet ninirim peruk inap ininggikmuwen tel nabin. Onolok ane turuk inaben sen nabuhup tohon windat napmihin.

⁵An nebe totman NIKNI Allah an men wereg ulug wenggel haruk lit Aren eneg let naptuk laruhu ulug yet hasug latikik.

⁶Haren nisinga ahummuwen indag naptikin. Indag atikik sambilen an Hat hubam timi roho welatikik. Likiya hupmu Hat wel haptuk laruhuk.

⁷Ap anggolo fahet an wirim angge welahi. Iren yet niyaruk lit Allah ineyonen ap ili og eneptuk ane ari hag toho turuk ulug onoluk atuk.

⁸Likiyat hubanggowet Hat hunuk palimuwap turuk lit Hat eneg wel haptuk lahi.

⁹An sabal atuk lit nine eleg aruhumu hinggik kobog niyalug numbaharuk laruhun fug.

¹⁰An men seli roho wereg inaben an nuwabul ulug enele sahaltuk.

¹¹Iren uruk lit, ”Allahn hun ari embeserisimu at muko lulteg senebulen maniyek. At ili warukon misig oho wereg eleg,” uruk.

¹²Nikni Allah, an let nabuk fug angge numbahalug yatma welaruhun fug. Nikni, folo-folo let nabik ma!

¹³An nuwabul ulug kahal nasug inap arimano ininggareg siyag amag. An siyahap nabul ulug yami naptukon arimano aben wasubag onolohotma sup isalug ininggaliyap enebukag.

¹⁴Anden likiya hupmu Hat hubam eneg wenggel haruk lit nin sebe roho Hat wel haptuk laruhuk.

¹⁵Haren ap unubam pikir ane turuk lit let eneptuk lahenon fahet anden likiyat hubanggowet ap hiyag isarukmen eneg welaruhuk. Haren fano ane turuk lahenon anggolo rehen an ninggik winahuk fug teg lahi.

¹⁶An NIKNI Allahn ine roho turukon ap hiyag isil laruk laruhuk. Allahn pikir ane turuk hag toho ap winonen oho turuk eleg ulug At wel turuk laruhuk.

¹⁷Nikni Allah, Haren an nebe totman milal naptuk latikinmu indamen tulug ketiya oho Allahn aben tuk fug tehon turuk ulug ap hiyag isaruk lahi.

¹⁸An sabal atuk lit hubulu wilip aruhumu anden Allah ine wereg ulug fobik indag amuhubon oho hiyag isaruk laruhuken Hat Allahn an numbaharuk laruhun fug.

¹⁹Nikni Allah, Haren pikir ane turuk lit ap let eneptuk lahen ane ariyen kinang obog toho hondo reg lit poholma laharuk. Haren eneg alem suwon turuk lahen. Ap sa Hat hahon eke wereg?

²⁰Haren alem angginon eke hag eke hag nubam monde fik waharukmu asengseng toho welatikik angge famen Haren an ik suwon ahum apman lit nabuhunteg nolukap nabuhun.

²¹Haren hebeloho haluke yig nuruhunteg nindi seyap naptuk lit unduhuk nubahakunmu an nunuk su aruhuwon, indam welatikik ane men wirim teg laruhu fug.

²²Hat Nikni Allahn an hinggik kobog niya fug angge let nabuhunon fahet pinggong watuk lit sini fam wel haptuk laruhuk. Hat Israel ninap Ninikni Allah hebe usa fulu reg lahenon hubahet puhuli fam sini uruk laruhuk.

²³Haren an windat naptikin ulug nahiyehen yunggultuk laruhuk.

²⁴Alem an nubam welatisiyon Allahn haloho numbaharisi ulug likiya hupmu ap hiyag isarukmen eneg welaruhuk. An siyahap nabul ulug mug naplug laruk inap arimano siyag atuk lit ininggali haruk lamuhup.