Read Angguruk Yali MAZMUR 72 Bible Online

MAZMUR 72 - Angguruk Yali bible

MAZMUR 72

¹Salomo inowen Allah wel turuk lit sini yunggultuk latfahon tu: Nikni Allah, Israel ninap nonowe suwon inowen alem umalikisi unubam werehon Haren peruk lahen ane hikit toho haltuk laruhuwen hiyag utuk laruhun.

²Unggum humalikisi unubam werehon haloho emberuk lit aben apmayap eneptukon inibil atuk laruhu ulug sembahyang uruk lahi.

³Nenengginang walinggoho werehon obog toho fano eneg weregma mun ane man ane fano roho haleg laruhu.

⁴Ap suwon inowen umalikisi inine elehon inibil atuk lit ap enengge elehon let eneptuk lit onolok ane unubam turuk inap arimano uyuhen sobir isaruk laruhu.

⁵At ino amusun toho weregman eneg mo men pikalem men eleg aruhu.

⁶Osit wambik waharuk lit kinang lilog teg ambeg wiyihap turuk hag toho at inowen oho umalikisi unubam fano ane eneg turuk laruhu ulug heng haptuk lahi.

⁷At oluk wereg li mun ane man ane fano haloho emberuk lamuhupmu ap obog toho fano weregman eneg pikalem mondabi eleg aruhu.

⁸Ik Efrat ikman tulug kinang atogman atogma werehon obog toho aren eneg seneg laruhu.

⁹Lekma wereg inap ununggul wanduk toho ambeg waharukmu ap seliyon kinangma ying atlug at hi ruruk lamuhup.

¹⁰Spanyol inap onowesi suwon men[11] ik anggen yat ke werehon menen onggo walug waharukmu Arab inap men Etiopia inap men onowesiyen eke sul eke sul emberukon og irik waharuk lamuhup.

¹¹Ap obog toho onowesi suwon enelenggen fam hur atlug at hi ruruk lamuhupmu ap o pumbuk obog toho at amingmingangge welamuhup.

¹²Ap enengge elehon, apma roho werehon, ap winonen let eneptuk elehon arimanowen enele hi roho let nenebin ulug heng urukmu at inowen windat eneptuk laruhu.

¹³Ap enengge elehon wiyig toho wereg inap aren indi isaruk lit inilaheg toho werehon war amuhup ulug let eneptuk laruhu.

¹⁴Ap winonen it unubam onolok ane turuk lit apmayap eneptukmu it enemep oho palimu reg ulug aren windat eneptuk laruhu.

¹⁵Ap suwon ino amusun toho welaruhu ulug sembahyang uruk lahi. Umbagpag turuk angge emas o Arab werehon ino at og irik waharuk lamag! Ap obog tohowen likiya hupmu at fahet Haren hindi reg laruhun ulug Allah fam sembahyang uruk lamuhup.

¹⁶Kinang obog toho roti anggenen eneg keleg ukag! Tom Libanon alem ke kinang fano wereg hag toho tom tuma werehon alem ke oho kinang fano regma nungge-nungge yatukmu fano wilip atuk laruhu. Ap o pumbuk oho hoholangge hag toho mondeg lamuhup.

¹⁷Aben at unuk enepeleg am fug angge palimuwap turukmen eneg mo eleg aruhu. Ap enele wal-wal uruk inaben at ino eneg fano wereg uruk lamuhup. It arimanowen onori hi eneptuk lit, ”Allah ap suwon ino let turuk hag toho har oho let haptuk laruhu,” ulug hi eneptuk lamuhup.

¹⁸Israel ninap NINIKNI Allah ino wel turuk lamek! Aren eneg aben tuk fug teg ane turuk lit wereg.

¹⁹At unuk suwon palimuwap turukmen eneg welamuhup. Kinang atogman atogma obog toho at unuk su aruhu ulug sembahyang uruk lahi. Ihiyon ari obog toho teko lawag uruk lahi. Amin!

²⁰Hun Isai amloho Daud inowen sembahyang uruk latfag ane we ita emberuk lahe.