Read Angguruk Yali MAZMUR 73 Bible Online

MAZMUR 73 - Angguruk Yali bible

MAZMUR 73

¹Hun Asaf inowen Allah wel turuk lit yunggultuk latfahon tu: Allahn umalikisi Israel inap unubam fano ane eneg turuk. Inindi puhun toho werehon indi enesug ane noluk angge famen

²nuyug sultuk turuk lit pi roho mako wambele.

³Allah wene ninirim peruk inaben enele hemet toho urukon fahet siyag alep angge famen enebe fano weregma yet isaruk lit nindimu siyag haruk latikik.

⁴It arimano ouk wa fug angge enebe fano reg lit inine roho wereg.

⁵Ap winon unubam atuk hag toho siyag ane unubam am fug angge wereg.

⁶Minggin tog eneliliyangge hag toho weregma enebe hemet toho turuk lit ap unusil laruk.

⁷Ap unubam siyag ane tul ulug wenggeltukmen eneg unundama ahe laharukon ino indok hubu hag toho wilip atuk.

⁸Ap enebug uruk lit inda yag eneptuk. Ininggareg emberimuwap taruk lit hunusul ulug ap winon enekolap eneptuk.

⁹Allah poholmon apmayap turuk lit kinangman oho hol nisawag ulug enele hi roho lahaptuk.

¹⁰Enele urukmu Allah umalikisi mondoko enembeg waharuk lit iren uruk ane enehiyeg anggolo roho holtuk.

¹¹”Nangginoho Allah oluk aruhu, At mondabi palimu werehon inowen yet nisa fug teg,” uruk.

¹²Allah wene ninirim peruk inaben ari hag toho uruk lit inindi yuwag toho wereg. Mun angge man angge inibam kilaptukmen eneg tung inap hag toho wereg.

¹³Nungge fahet ninggik fam siyag ane tuk fug angge nindi fano roho welatikik?

¹⁴Likiya hupmu siyag ane nubam atukmu asengseng toho eneg welahi.

¹⁵Hat hawene ninirim peruk inaben uruk hag toho ele angge famen Hat humalikisi inindi siyahap enepmin fug ulug embeserikik.

¹⁶Nungge fahet Hat hawene ninirim peruk inap fano roho wereg ulug wenggel haruk latikik angge famen nindimu seleg atisi fug.

¹⁷Nindi seleg atisi fugmu Hat wereg ambeg kirikikteg it fobik siyag welamuhup ulug wenggel harikikmu nindi anggar atisi.

¹⁸Haren pi reg ambeg unduhuk fusuhunteg it mako wambukag ulug tamag isahun.

¹⁹Yuk lagmag irikim ware fusuhun. We misihim yet isarukmen eleg lamuhup.

²⁰Hubanggo nei walug in atug wenggel harukmu eleg atuk hag toho eleg amuhup.[12]

²¹An nahum ke het-pet haruk lit nindi wat taruk latikik.

²²Ari roho wamen indi wenggel haruk eleg hag toho Haren turuk lahen ane fahet nindi anggar am fug angge welatikik angge famen

²³an mondabi Hat hiraham welahimu ninggik pikit fil Haren sen nasug lahen.

²⁴Haren komo naptuk lit kebunggalem hiyag nutuk lahen. Hondog nabuhunteg fobik fanoma numbahakun.

²⁵Hat eneg poholma welahenma Hat fahet eneg wenggel haruk lahi. Kinangma werehon fahet ebet haruk lahi fug.

²⁶Nebeyet nahimeyet nine eleg aruhu angge famen Hat mondabi helep hag toho weregma palimu heriyeg laruhuk.

²⁷Hat humbahalug laruk inap siyag amuhup. Hat lin hubahalug siyag ane turukon Haren unusuhun.

²⁸An Hat hiraham wereg lit nahiyeg haruk lahi. Aben nuwabul ulug turukmu Haren nahap hirag naptuk lahenma Allahn fanowap naptuk ulug nahiyeg toho ap hiyag isaruk laruhuk.