Read Angguruk Yali MAZMUR 74 Bible Online

MAZMUR 74 - Angguruk Yali bible

MAZMUR 74

¹Hun Asaf inowen ap inindi anggar amag ulug sini yunggultuk latfahon tu: Nungge fahet Hat Allahn nit mondabi hik nisarikin? Wam domba foroho ahunen ambohom fet enesug hag toho nir oho fet nenesug latikin angge famen ketiya nungge fahet nit nunubam holok haruk lahen?

²Indam numalikisi amuhup ulug ayeg waroho winahon fahet hapeleg am fug! Anden tohon amuhup ulug ap ininggikmuwen windat eneptik inahon fahet wenggel isamihin. Tom Sion Hat hibam welatisiyon fahet wenggel himin.

³Hat hibam ap seliyonen siyahap turusama mondabi lin-lan urukon ino kim ha watmihin.

⁴Hat fahet ninirim peruk inap arimanowen enele ngik-ngog til Hat hibam kurusareg nit ngi ahe ulug enehangge hutuk teberusa.

⁵Ap seliyon arimano yet isarukmen ap yaha fam ohi humon mutil larukon hag toho turuk lit

⁶yaha men wanggun besi ineyon men fam e hesenggengge ohowon obog toho kong-kong hik isarusa.

⁷Hik isarusareg Hat hibam harep pisako oluna feseruk lit Hat hunuk wel haptuk ambeg ino saliyoha feserusa.

⁸Inindimuwen wenggel haruk lit, ”Ap aruma obog toho apmayap enebul,” ulug Hat Allah wel haptuk ambeg kinang tu fam werehon obog toho harep pisako siyaha feserusa.

⁹Allah nit sehelimu wereg ulug enehangge wiri feruk latukukon men Hat hawene hiyag nisaruk inap nabi arimano men eleg atusama siyag toho welahe ane ari nosambil obog aruhu ulug oluk tehon misig oho nit sehelimu wereg eleg.

¹⁰Ninikni Allah, noenam welamuhukmu ap seliyon arimanowen enele hemet toho uruk lit Hat apmayap haptukon eleg aruhu? Iren Hat habug urukmen eneg welamuhup ano?

¹¹Nungge fahet Haren nit let nenebuk fug angge hinggik mahabol hambo roho welahen?

¹²Hat Allah indamen tulug ketiya oho an nubahet ap suwon wereg lit fet nasug lahen. Haren ap kinang tu fam werehon windat eneptukmen eneg welahen.

¹³Hat hinggik hineyonen ik ahum suwon pul ke minggiri finag. Manu suwon ik ahummu werehon ununggul arap toho unusinag.

¹⁴Pisanggo humon Lewiatan unggul kong tinahon ino mungguwaren nawag ulug ohimu hik isinag.

¹⁵Ik eleruk wili feruk lit ik ine roho larukon firihap turuk latik inag.

¹⁶Pikalem men mo men poholma imbinag. Unukohowet hubanggowet men Hat hinggikmu wereg.

¹⁷Hibi welaheg osit nenggeg turuk laruhu ulug imbinareg kinang hili angge wal taneg imbil linag.

¹⁸NINIKNI Allah, ap seliyon inindi anggat teg elehonen Hat inda yag haptuk lit habug urukon fahet hapeleg am fug!

¹⁹Nit suwe yalma hag toho welaheyon aruma olomeneyen nawag ulug nunumbahuk fug. Ninilaheg toho welaheyon war amuhup tohon ulug wenggel nisa fug angge amusun toho welaruhun fug.

²⁰O kema-kema hik teg ambeg ap hirag atuk lit onolok ane til noruken nit Hat humalikisi men nininggik ahandip toho welamuhuk ulug sali imbinahon fahet wenggel himin.

²¹Ap unuyuhen sobir isarukon arimano ininggali hawag tohon umbusuk fug. Ap inine elehon asengseng toho werehon arimanowen Hat hunuk wel haptuk lamuhuben let enebik ma!

²²Ap inindi anggat teg elehonen likiya hupmu Hat inda yag haptukon fahet wenggel hamihin. Ari fahet Ninikni Allah in atmihinteg Hat hubam alem elehen it seliyon unubam suwahal imihin.

²³Hat fahet ninirim peruk inaben Allah ele ying tul ulug enele ngik-ngog turukon arimano hayen ulug holoho umbusuhun fug.