Read Angguruk Yali MAZMUR 75 Bible Online

MAZMUR 75 - Angguruk Yali bible

MAZMUR 75

¹Siyahap tuk fug ulug sini urukon wirim toho hun Asaf inowen sini milaltuk lit yunggultuk latfahon tu:

²Niren Hat Allah wel haptuk lahe. Ninikni uruk lit Hat fog haptuk lahe. Hat hunuk uruk laheyonen aben tuk fug teg ane Haren turuk lahenon fahet ap hiyag isaruk lahe.

³Allahn ele urukon tu, ”Anden fano puhuk li horog aruhumu alem werehon obog toho haloho umbuhuk.

⁴Kinanget abet obog toho yuk elek turukmu oho An kinang ahongge hutuk tibiyag nahunen nine roho seneg lahi.

⁵Anden ap inindi sohu roho werehon unubam sohu ane tuk fug uruk lit An fahet ninirim peruk inap unubam hininggareg palimuwap ta fug ulug hiyag isaruk lahi.

⁶Nit eneg ninine roho welahe ulug henele hemet toho uruk lamuhup fug.”

⁷Alem haloho emberuk ane yali filen, hubula filen, ik ambut filen waharuk eleg.

⁸Allah alem obog toho haloho emberukon inowen eneg ap winon apmayap eneptuk lit winon palimuwap eneptuk.

⁹NINIKNI Allah inggiken kubag ik olokon hinanggoho werehon seneg lit An nubahet ninirim peruk inap kinang atogman atogma werehonen nawag ulug hinang isarukmu obog toho naruk lamuhup angge famen

¹⁰anden Allah nunumba Yakuben wel turuk latfahon fahet sini yunggultuk lit ap hiyag isarukmen eneg welaruhuk.

¹¹Allah fahet ninirim peruk inap arimano At inggarehen apmayap eneptuk lit At ele holtukon arimano inineyap eneptuk laruhu.