Read Angguruk Yali MAZMUR 76 Bible Online

MAZMUR 76 - Angguruk Yali bible

MAZMUR 76

¹Hun Asaf inowen sini milaloho pinggong watuk lit yunggultuk latfahon tu:

²Yehuda inaben Allah onoluk teg. Israel inaben At unuk leho feruk.

³At ibam o Yerusalem wereg. Tom Sion fam yug toho wereg.

⁴Tom ino famen ap seliyonen tog aptuk angge eke hag eke hag werehon minggin tog lebeglu lebeg turuk hag toho turuk latusonet tog piyabanggeyet fala roho hik isarisi.

⁵Ninikni Allah, Hat hebe hine roho wereg lit umbagpag turuk lahenon men tom aben huhulangge hilaruk latusa anggeyen keleg teg antom men wirim teg eleg.

⁶Enembong se roho tog aptuk latusa inap arimano ap nohorukon hag toho kinangma yinggig latusama enenggengge obog toho hilarusa. Enehako roho tog abik laruk latusa inap arimano ininggik leg ha fug teg latusa.

⁷Hat Allah Yakuben wel haptuk latfag hahunen hele ine roho pet eneptukmu wam kudayet emberimu lahalug larukonet inil fulug turuk latusa.

⁸Ap obog toho Hat fahet enekolen elek-elek angge ruruk. Hat hundama ahe laharukmu ap sa halukema unduhuk lam teg?

⁹Haren alem haltuk lit kong toho emberikinon aben holukag ulug poholman hiyag isarikin. Aben siyahap eneptukon kinangma werehon obog toho alem unubam werehon haloho emberuk lit windat enepmin ulug Hat Allah in atikinmu itano ap enekolen enele eleg angge welatusa.

¹¹Ap seliyonen onolok haruk ane ariyen oho Hat hunuk su aruhu. Onolok toho unusurukmu wilip atuk lit onoluk welamuhubon arimano aliliyangge hag toho wan turuk laruhun.

¹²Nit NINIKNI Allah nungge-nungge og umuhuk ulug sali emberuk lamuhup. Sali umbuhubon hikit toho turuk lamuhup. At ap enekolap eneptukon fahet hit o pumbuk Israel walinggoho welahebon obog tohowen fano-fano angge walug waharuk lamuhup.

¹³Allahn ap ununuk palimu werehon inindi apmayap eneptuk lit ap suwon kinangma werehon enekolap eneptuk.