Read Angguruk Yali MAZMUR 78 Bible Online

MAZMUR 78 - Angguruk Yali bible

MAZMUR 78

¹Hun Asaf inowen ap inindi anggar amag ulug milaltuk latfahon tu: Hit an numalikisi welahebon anden milal henepmin ane hinisanggo leho lit fuki roho holeg lamek!

²Anden wene indit toho hiyag hisaruk lit pohol kinang wal tibag sambil ino famen map toho welatfahon anden hiyag hisamin.

³Niniknisiyen hiyag nisarukmu ninisanggo fam hol halug nonoluk atisi ane ari

⁴nunumalikisi enepeleg aruhu rohon hiyag usul. It fobik indag amuhubonen oho holtuk lamuhup ulug NINIKNI Allah inggik ineyonen alem suwon aben tuk fug tehon turuk latfag ane fahet hiyag isaruk lamuhuk.

⁵Allahn aben tuk teg ane fahet kong toho imbibahon Yakuben ondohowonen ondohowon hiyag isibag. Tu men ari men turuk lamuhup ulug komo enepfag ane hahatfahon arimano Israel inap og isibag. Nunumbasi og isaruk lit, ”Anden komo heneptuk lahi ane ari hit hunumalikisi milal eneptuk lamuhup,” ulug hiyag isibag.

⁶Hiyag isibag ane ari Israel inap fobik indag atuk lamuhubon oho An Allahn numalikisi komo eneptuk lahi ane fahet onoluk aruhumu it unumalikisi oho milal eneptuk lamuhup ulug hiyag isibag.

⁷Hiyag isibag ane ari hikit toho it fobik indag atuk lamuhubon oho Allahn turuk latfag ane fahet enepeleg am fug angge At ubam eneg wenggel haruk lit ari-ari turuk lamuhup ulug komo enepfag ane inine roho seneg lamuhup.

⁸Nunumbasi inindi wirik teg elehen Allah enembol yig utuk lit ele ying turuk latfag hag toho hit fobik welamuhubonen oho ari turuk lamuhup fug.

⁹Efraim inaben minggin tog seneg latfag angge famen misihim sambil tog abul ulug libareg enekolen linggik-longgo ibag.

¹⁰Allahn it unubam nininggik ahandip toho welamuhuk ulug sali imbibahon iren sobir isibareg ari-ari turuk lamuhup ulug komo enepfag ane oho holtuk latfag fug.

¹¹Allahn alem suwon aben tuk fug teg ane it iniline turuk latfahon arimano fahet enepeleg atuk latfag.

¹²Nit nunumbasi Mesir kinang fam o Zoan weregma Allahn it iniline alem suwon aben tuk fug tehon arimano turuk latfag.

¹³Ik ahum suwon pul ke minggiri fibagma fima-fima elehet hag toho in arik laharukmu Allahn nunumbasi hondog eneplug fuma fil nindig atfag.

¹⁴Welatfareg kalem hiyag isamin ulug Allah enelukema laruk lit o unukoho hina alem unduhukon sehelimu laruk latfag, hubanggo indok ambulpul lahabeg umbagpag turukon sehelimu laruk latfag.

¹⁵Lekma laruk lit helep fele ribareg ik kinang apman su roho lahik watfahon nunumbasi hinang isibag.

¹⁶Helep fo ribagma ik suwon wirig atuk hag toho helep famen wilip atfag.

¹⁷Nunumbasi lekma weregma Allahn alem arimano obog toho iniline turuk latfag angge famen iren siyag-siyag ane til-wil noruk lit At palimuwon ele ying turuk latfag.

¹⁸It inindimuwen Allah wal hul peruk lit nila peruk laheyon og nisa ma ulug heng tibag.

¹⁹Heng tibareg enele sahaltuk lit, ”Nit lekma weregma Allahn niren nila peruk laheyon og nisa watmisi ano?

²⁰Allahn helep ware ferisimu ik fu waharuk hag toho wilip atisi angge famen nit At umalikisi welaheyon suburu roti men wam unu men og nisamisi ano?” ulug At abug uruk latfag.

²¹Abug urukmu NINIKNI Allahn holfareg Israel inap unubahet olok haruk lit Yakuben ondohowonen ondohowon aruma war amag ulug indok unubam pilabik watfag.

²²Nunumbasi arimanowen Allahn windat nenebuk fug tehen nungge fahet At ubam wenggel haruk lamuhuk peruk latfahon fahet alem arimano obog toho unubam atfag.

²³Welatfareg Allahn hina famen ele urukmu pohol fil sok hur atfagma

²⁴suburu poholmon unuk manna pilabik watfagma

²⁵ap obog tohowen Allah otsi malaikaren naruk angge narukmen eneg enehum atfag.

²⁶Welatfareg Allah inggik ineyonen siyelu monde fibagma yali filen oho ik ambut filen oho waharuk lit

²⁷suwe kinang alinlan mondeg hag toho walug watfagma osit pilabik waharuk hag toho nunumbasi o sabo wiroho welatfag ambeg walinggoho wamburuk latfag.

²⁸

²⁹Wambibagma nunumbasiyen suwe arimano andog tik libareg enehum ouk toho naruk latfag. Ari roho turuk lit nunumbasiyen nila peruk latfahon Allahn og isaruk latfag angge famen

³⁰iren enebuwap toho naruk lit suwe arimano uwan sahaloho pil ha fugmu

³¹Allahn it unubahet olok haruk lit ap kabiniyon enehako roho turuk latfahon unusibag.

³²Unusibag angge famen iren siyag ane turukon imbisibag fug. Allahn alem suwon aben tuk fug tehon iniline turuk latfag angge famen iren Allah fano ulug wenggel haruk latfag fug.

³³Ari fahet Allahn it arimano seni ahe folo-folo paloho eleg atukon hag toho welamag ulug alem eke hag eke hag unubam emberuk latfagma enekolen unuwag elek-elek angge rurukmen eneg welatfag.

³⁴Allahn hundig-hundig unusuruk latfagma iren hebeloho At yami ruruk latfag.

³⁵Iren nin hebeloho inindimuwen wenggel haruk lit Allah nit nunubahet helep owik hag toho wereg, nit ili og neneptukon At mondabi palimuwon ino wereg peruk latfag angge famen

³⁶enembiliken enele si ane eneg ubam uruk lit ele ying turuk latfag.

³⁷Inindi wirik teg eleg lit Allahn nininggik ahandip toho welamuhuk ulug sali imbibahon apmayap turuk latfag.

³⁸Apmayap turuk latfahon fahet Allahn ayeg waroho unuselep angge famen indi isaruk lit siyag ane iren turuk latfahon ambolmaya feseruk latfag. Anggoloenam undama ahe laharuk latfag angge famen indi imbik wamburuk lit olok haruk ane hondo rebeseruk latfag.

³⁹At indimuwen wenggel haruk lit it arimano kinangma inap war atukon werehen sat unundama werehon ino amusun toho welam fug angge mondabi longgo uhureg nin hebeloho unubam waruhu fug pibag.

⁴⁰Nunumbasi lekma wereg li anggoloenam Allah ele ying turuk lit indi siyahap turuk latfag.

⁴¹Misihim-misihim Allah wal hul ulug Israel inap Inikni Allah ebe usa fulu ahun indi angginap turuk latfag.

⁴²Nit Mesir kinang fam o Zoan weregma Allah inggik ineyonen nit ap seliyon ininggikmuwen taluk neneptisi ulug wenggel ha fug angge Allahn windat enepfag sambil ino fahet enepeleg atfag.

⁴³O Mesir inowen Allahn enehangge wal haruk lit aben tuk fug tehon eke hag eke hag turuk latfahon tu:

⁴⁴Mesir inaben ik naruk lamuhup fug ulug ik obog toho il mebap tibag.

⁴⁵It enemep nawag ulug elemiyaha monde fibareg siyahap enebukag ulug yahiye anggolo monde fik watfag.

⁴⁶Yaho angge obog toho nawag ulug heren pambot monde fik watfag.

⁴⁷Osit helep hahon pilaptuk lit hele anggur iren yatfahon siyahap tibag. E sawe obog toho sun anggolowen siyag atfag.

⁴⁸Osit helep hahon ino enembohom enebene pilabik watfagma wam kambing domba arimano laburen unusibag.

⁴⁹Allahn olok haruk lit indok ambulpul turukon hag toho unubam pilaptuk latfag. Siyag amuhubon fahet hiyag isa lalihip ulug Allahn otsi malaikat mon eneptuk hag toho alem angginon eke hag eke hag unubam monde feruk latfag.

⁵⁰Indimuwen inahan turuk latfahon hondo rubusuk fug angge fano war amag ulug ouk alem suwon unubam monde fibag.

⁵¹Monde feruk lit Ham inowen ondohowonen ondohowon Mesir inap umalikisi wandabon inibam wal taneg welatfahon obog toho unusibag.

⁵²Unusibareg aben wam hondog eneplug laruk hag toho Allahn umalikisi hondog eneplug o Mesiren wilip atfareg lekma libag.

⁵³Lekma laruk lit fano hondog eneptukmu nunumbasi enekol eleg toho laruk latfag. Larukmen ap seliyon arimano ik ahum suwonen hondo enepfag.

⁵⁴Hondo enepfagma Allahn umalikisi hondog eneplug At angginangma libareg tom At inggik ineyonen ilmig tibahon alma imbisik libag.

⁵⁵Imbisik laruk lit ap o pumbuk wal taneg kinang ino fam welatfahon nunumbasi onolohotman yanggal enepfareg enengginang nunumbasi fibir enepfagma it ununggul unuk inibam wal taneg wiroho welatfag.

⁵⁶Alem arimano obog toho Allahn turuk latfag angge famen Allah wal hul ulug At mondabi palimuwon ele ying turuk latfag. Aben tuk teg ane fahet Allahn komo enepfahon oho nunumbasiyen seneg latfag fug.

⁵⁷It iniknisiyen turuk latfag hag toho iren oho Allah ele holtuk lamuhuk fug ulug imbisibag. Ari roho turuk lit sehen inggila saleg elehon hag atfag.

⁵⁸Punu ke aben nunumbasi ulug wel eneptukon fahet hubu lahaptuk lit Allah indi siyahap turuk latfag. Tu Allah hag toho wereg ulug ininggiken lalfag angge fog eneptukmu Allahn indimu olok haruk latfag.

⁵⁹Nunumbasiyen ari roho turukmu Allahn yet isibareg indimu inahan turuk lit Israel inap arimano inggik kobog isibag.

⁶⁰Ap kinangmon sehelimu An nibam welaruhuk ulug mumal tibag ambeg o Silo ino imbisibag.

⁶¹Imbisibareg At unuk suwon inggik ineyon fahet enehangge welatfahon peti Wene Numen haharehon kilabeg angge ino ap seliyon ininggikmu imbibag.

⁶²Imbibareg inggareg umalikisi fahet olok anggolo haruk lit tog elman war amag ulug imbisibag.

⁶³Imbisibag ane ari hikit toho ap seliyon indok ambulpul hag toho waharuk lit Israel inap kabiniyon arimano unusibagma aben hiyap tuhumon hilaruk sambil sini yunggultuk ane eleg latfag.

⁶⁴Allah amingmingangge imam arimano oho karohen unusibag angge famen hiyap yuwog atfahonen piya sini uruk latfag fug.

⁶⁵Obog toho ari teko libagma Ninikni Allah ap noholug inil ili atuk hag toho il ili atfag. Ahako roho turuk ahunen ik olokon nalug nenek turukmen eneg indi anggar atlug in atuk hag toho in atfag.

⁶⁶In atfareg At men seli roho welatfahon unusil laruk lit yanggal enepfagma ininggali roho weregman eneg welamuhup.

⁶⁷Ari tibag angge famen Allahn wenggel haruk lit Yusufen ondohowonen ondohowon sehelimu An nibam welatikik hag toho fobik welaruhuk fug, ununggul unuk Efraim inap arimano Israel inap onowesi roho welamuhup fug ulug inggik kobog isibag.

⁶⁸Inggik kobog isibareg ununggul unuk Yehuda inap mumal eneptuk lit tom Sion Anden nindi reg lahiyon fam welaruhuk ulug mumal tibag.

⁶⁹Mumal tibareg tom tu fam welaruhuk ambeg ino An poholma welahi ambeg hag tubuhukmu kinang amusun toho welamag ulug ineyap tiyahon hag toho welaruhu ulug ibam wit tibag.

⁷⁰Wit tibareg amingmingangge Daud mumal taruk lit wam domba foroho ambehen hondog tibag.

⁷¹Daud inowen wam domba umalik men forohoman Allahn wol turuk lit, ”An numalikisi Yakuben ondohowonen ondohowon Israel inap arimano An nubahet wam domba hag toho fet enesug laruhun,” ulug hiyag itfag.

⁷²Hiyag itfag ane hikit toho Daud indimuwen pikir ane eneg wenggel halug mun ane man ane inggik fam fano roho turuk lit Israel inap arimano fet enesug latfag.