Read Angguruk Yali MAZMUR 79 Bible Online

MAZMUR 79 - Angguruk Yali bible

MAZMUR 79

¹Hun Asaf inowen sini yunggultuk latfahon tu: Nikni Allah, ap o pumbuk winamon Hat hangginangma kik waharusareg hibam siyahap turuk lit o pumbuk Yerusalem halog toho oluna feserusa.

²Oluna feseruk lit hamingmingangge unusuruson suwe pohol ke larukonen nawag ulug embeserusa. Hat inindi hasug latusa inap waregma fare meneyen suburuwap enebukag ulug lin isarusa.

³Ap seliyonen unusuruk lit enemep Yerusalem walinggoho ik hag toho hililoho hik isarusama it war atuson kinangma sal eneptukon welatisi fug.

⁴Ap o pumbuk winamon nit walinggoho werehonen nit inda yako nininggaliyap neneptuk.

⁵Noenam welamuhukmu Hat NINIKNI Allahn holok haruk lahen ane umbusuhun? Ap winamonen nunumba ulug wel eneptukon niren oho wel eneptuk latukukon fahet hindimu indok ambulpul hag toho inahan turuk lahen ane nosambil eleg aruhu?

⁶Hat hundama holok haruk lit ahe laharukon ari o pumbuk winon Hat hunuk enepeleg inap onowesiyet unumalikisiyet unubam hik isahun.

⁷Olomeneyen wam naruk hag toho it arimanowen Hat humalikisi Yakuben ondohowonen ondohowon elehap eneptuk lit enengginang harep pisako siyahap turusa ane fahet holok toho unusuhun.

⁸Nunumbasiyen siyag ane turuk latfahon fahet nit nunusuk fug. Ninine eleg atisimu Haren haluke folo-folo yig nisamihin.

⁹Allah nit windat neneptuk lahenon hunuk fanowon siyag aruhu rohon let nenebik ma! Hat hunuk suwaleg lahen ane hikit toho siyag ane niren turukukon hambolmaya feseruk lit windat nenepmihin!

¹⁰Nungge fahet ap o pumbuk winamonen Inikni Allah kema wereg ulug enele sahaltuk? Iret niret yet hahuken ap o winamonen hamingmingangge unusurusa ane fahet Haren ayeg waroho unusuhun.

¹¹Ap ininggik hele wat eneptusonen ngesekum turukmu hol isimin! Ap seliyonen an nori war amag ulug kong toho emberuson arimano Hat hinggik ineyonen ili og enebin!

¹²Ap o pumbuk nit walinggoho werehonen Hat Allah inda yako hinggaliyap haptuson fahet Haren ayeg waroho ininggaliyap eneptuk laruhunon hinggik winag harukmen sabirenam aruhu.

¹³Nit Hat humalikisi wam domba hag toho weregma fet nenesug lahen. Niren Hat wel haptukmen eneg welamuhuk. Niren endebuhukonen endebuhubon oho onoluk aruhuwen Allah fano ulug ir oho hiyag isaruk lamuhuk.