Read Angguruk Yali MAZMUR 80 Bible Online

MAZMUR 80 - Angguruk Yali bible

MAZMUR 80

¹Hun Asaf inowen Allah fam wenggel haruk lahi ane fag toho imin ulug e owil fene sini urukon wirim toho milaltuk lit yunggultuk latfahon tu:

²Israel ninap fet nenesug lahenonen holeg lamin! Wam domba foroho ahunen ambohom fet talug hag toho Yusuf umbusagsi welaheyon fet nenesug lahen. Hotsi eneherabul wilibihon enemberimu heriyeg lahenon hebe umbagpag toho Efraim inap, Benyamin inap, Manasye inap onolohotman inam arik watmihin! Hine roho turuk lit let nenebik ma!

⁴Ninikni, Haren nit hebeloho fanowap nenebin! Hat hindi fanowonen haluke hebeloho yet nisahunmu fano amuhuk.

⁵NINIKNI Allah pohol ha kinang ha seneg lahenon, nit Hat humalikisiyen hubam sembahyang uruk lahe angge famen Hat holok haruk lahenon ari nosambil eleg aruhu?

⁶Haren nunumbaharuk lahenma uba yatukmen eneg ninil ahaluwe ik men suburu men hag toho naruk lahe.

⁷Kinang niren tohon fahet o pumbuk walinggoho werehonen nit amul ulug it-it yik aptuk. Nit men seli roho wereg inaben inda yag neneptuk.

⁸Allah pohol ha kinang ha seneg lahenonen nit hebeloho fanowap nenebin! Hat hindi fanowonen haluke hebeloho yet nisahunmu fano amuhuk.

⁹Hat humalikisi hele anggur hag toho o Mesiren heneko og eneplug watnareg o pumbuk yug inap yanggal eneptik inag ambeg nit nunumbasi yag eneptik inag.

¹⁰Haren kinang yat toho hiyag isinagma unumanggen kinang apma wamburuk lit kinang abirangge hondo atfag.

¹¹Hele inowen tom mapmu regma inggiken e yaron oho hondo ruruk latfag.

¹²Hele ino unggum yaluk-faluk isil saho ahik ikma larukmu asimit sililim turukon ik Efrat ikma laruk latfag.

¹³Ninikni, elehet hele anggur walinggoho kilabehon nungge fahet halog tebeserikinmu ap hele ino iraham ke laruk lit anggen tahan talug laruk.

¹⁴Wam eli men olomene menen naruk lit alem sanog toho siyaha feseruk.

¹⁵Ninikni, pohol ha kinang ha seneg lahenonen poholman nit humalikisi hebeloho yet nisa ma! Hele anggur hinggiken yag tinareg Haren forohoman su atfahon ino haloho embemihin.

¹⁷Ap seliyonen hele ino kong toho yale feserusama Hat horohole holok toho yer isaruk lit siyahap enebuhun.

¹⁸Ap suwon Hat hinggik pikit fil heriyehon ino wanggi waroho foroho laruhun. Ap kinangmon famen Haren ineyap tirikinon ino let turuk laruhun.

¹⁹Nit Hat humbahalug nenemumu lahuk fug. Nit war amuhuk tohon Hat niniraham weregma niren Hat eneg wel haptuk lamuhuk.

²⁰NINIKNI Allah pohol ha kinang ha seneg lahenonen nit hebeloho fanowap nenebin! Hat hindi fanowonen haluke hebeloho yet nisahunmu fano amuhuk.