Read Angguruk Yali MAZMUR 81 Bible Online

MAZMUR 81 - Angguruk Yali bible

MAZMUR 81

¹Hun Asafen sini Gitit inggangga hikit toho milaltuk lit yunggultuk latfahon tu:

²Allah nit ninineyap neneptukon wel tul ulug henele hi roho uruk lamek! Allah Yakuben wel turuk latfahon henehiyeg toho fog tiyek!

³Pinggong puhuli waruk tung til laruk lit sini wilibiyek!

⁴Pikalem keron inam atuk sambil men funu larukmu men Allah wel tul ulug palu atuk lit pinggong ele hum toho kong turuk lamuhup.

⁵Israel inaben ari hag toho turuk lamuhup ulug Allah Yakuben wel turuk latfahon inowen kong toho imbibag.

⁶Imbibag ane ari Allahn o Mesir inap alem angginon eke hag eke hag unubam emberuk latfag li Yusufen ondohowonen ondohowon arimanowen ari hikit toho turuk lamuhup ulug hiyag isibag. Anden hol harukmen misihim oho holtikik fug ane ap ekeyen irisiyon tu:

⁷”Hit hunumaloma anggin angge emberuk latuson Anden warikik. Sum hununggulmu sukni hunubaharuk latuson oho Anden ketikik.

⁸Hat asengseng toho wereg lit hele hi roho nubam irikinmu Anden hol hiyarikikteg windat haptikik. An hina sehelimu hiraho lit ululu sipuk toho nele hiyag hitikik. Hat ik elerukmu o Meriba weregma An nubam wenggel haruk ano ulug wal hiyarikik.

⁹Hit An numalikisi welahebon, An nele hol niyaruk lamuhuben komo heneptuk lahi.

¹⁰Aben wel turuk angge winon wel enebuk fug angge we An nubam eneg wenggel niyaruk lamuhup. Ap o winamonen nunumba perukon unubam sembahyang uruk lamuhup fug.

¹¹Allah HINIKNI hit o Mesir kinangman hondog heneplug wilip atikikon An tu welahi. Hiren henembilik ila regma Anden hit nila peruk lahebon henembilik keleg toho og hisaruk lahi.

¹²Ari roho An numalikisi unubam turuk latikik angge famen Israel inap arimanowen An fahet ninirim ulug nele holtuk latusa fug.

¹³Inindi arik teg lit werehen Anden let eneptuk laruhuk fug ulug embeserikikmu it inindimuwen fano peruk ane hikit toho turuk latusa.

¹⁴Numalikisiyen An nele holtep! Israel inap kebunggalem Anden hiyag isaruk lahiyon lelepman fano.

¹⁵Lelep halug Anden ap it men seli roho werehon apmayap eneptuk lit ninggik ineyonen unusele.

¹⁶An HINIKNI Allah fahet ninirim peruk inap arimano ininggareg apmayap taruk lit An hi naptuk lalep. Hi naptuk lalepma iren siyag toho turuk ane eleg lalep.

¹⁷Eleg lalepma An numalikisi suburu roti fanowon men kin ahaluwe tom famen walug waleyon men og isaruk lalema enehum ouk toho naruk lalep,” irisi.