Read Angguruk Yali MAZMUR 87 Bible Online

MAZMUR 87 - Angguruk Yali bible

MAZMUR 87

¹Korah inaben Allah wel turuk lit sini yunggultuk latfahon tu: NINIKNI Allahn antom Sion fam o pumbuk wit tarisi.

²O pumbuk Israel inap werehon we Yerusalem eneg indi anggolo haruk.

³O pumbuk Allahn wit hisarisi ibam welahebon, Aren o pumbuk ino fahet ele fano roho urukon holeg lamek,

⁴”Mesir inap oho Babel inap oho An nele holtuk inap enesehelimu wereg peruk lahi. Filistea inap, Tirus inap, Sudan inap inibam yatma angge famen ir oho we Yerusalem inap eneg wereg peruk lahi,” uruk.

⁵O Sion fahet aben enele uruk lit, ”Ap obog toho tom ino famen indag atusa,” uruk lamuhup. Allah mondabi palimuwon inowen tom ino ine roho seneg laruhu.

⁶NINIKNI Allahn ap o pumbuk wal-wal werehon ununuk haharoho emberuk lit, ”Ap tu o Yerusalemen indag atisiyon,” ulug emberuk laruhu.

⁷It arimanowen, ”Tom Sion famen ik eleruk hag toho fano ane nit nunubam atuk,” ulug enehiyeg toho si ruruk lit sini yunggultuk lamuhup.