Read Angguruk Yali MAZMUR 88 Bible Online

MAZMUR 88 - Angguruk Yali bible

MAZMUR 88

¹Ap inindi anggar amag ulug Korah inap sehelimuwon Esrahi inowen ondohowon hun Hemanen sini Mahalat inggangga hikit toho milaltuk lit yunggultuk latfahon tu:

²NIKNI Allah, Haren an windat naptuk lahenon, hup hunduhuk unukoho hunduhuk anden Hat hubam nele hi roho uruk lahi.

³Anden sembahyang uruk lahiyon holeg lamin! Let nabin ulug heng haptuk lahiyon hol niyamihin!

⁴Alem angginon eke hag eke hag nubam atukmen eneg war aruhukon horogma laruk lahi.

⁵Aben an nubahet ine mondabi eleg atisimu ap warehon kinangma sal eneptukon hag toho wereg peruk.

⁶An ap warehon sehelimu welamag ulug numbaharusa. Karohen unusurusama kinangma sal eneptuk latuson Haren it wenggel isalug let eneptuk lahen fug hag toho welahi.

⁷Haren an ap warehon kinangma sal eneptuk ambeg numbahik wambirikinmu kinang apma fil hik tegma welahi.

⁸Haren an nubahet holok haruk lahen aneyen an hondo nasugmu ik fu nubam waharuk hag toho welahi.

⁹An Haren siyahap naptikinon numbaliyen yet niyalug me enepe eneptuken an numbahalug larusa. An sok lareg ambeg wereg lit wilip am fug teg lahi.

¹⁰Ouk eneg waruk lit nil hik atuk. An ninggik Hat NIKNI Allah hibil leho lit nele hi roho urukmen eneg mo lahik watug ubuk uruk.

¹¹Ap warehon unubam aben tug fug teg ane turuk lahen ano? It nin hebeloho in amuhupteg Hat wel haptuk lamuhup ano?

¹²Hat humalikisi hindi enesug lahen ane fahet ap warehon sal eneptuk ambehen enele uruk ano? Hat hinggik kobog isa fug angge let eneptuk lahen ane fahet ap siyag atukon palu arik laruk ambeg hiyag isa laruk ano?

¹³Haren aben tuk fug tehon turuk lahen ane ap o hik tegma werehonen yet haruk ano? Mun ane man ane enepeleg atuk ambeg werehon arimano Haren alem obog toho haloho emberuk lahenon fahet onoluk am fug teg angge famen

¹⁴anden Hat NIKNI Allah hubam nele hi roho uruk lahi. Likiyanet hubam sembahyang uruk lahi.

¹⁵NIKNI Allah, nungge fahet horohole saloho hambol yig nisaruk lit an numbahalug larikin?

¹⁶An nebe totman asengseng toho wereg lit war am hag ane turuk latikik. Haren nakolap naptukmen eneg welahenma an nindi nonghong uruk lahi.

¹⁷Hat holok haruk lahen ane indok ambulpul turukon hag toho nubam atisi. Haren alem angginon eke hag eke hag nubam monde feruk lit nakolap naptuk lahenon ariyen mondabi siyag atikik.

¹⁸Likiya hupmu alem angginon Haren nubam monde feruk lahenon arimano ik fu waharuk hag toho umu filen ahamu filen nubam atuk lit an walinggoho kilap nasug.

¹⁹Haren an nubam turuk latikin ane yet harusareg nori nindi enesug lahiyon men niraham welatuson men an numbahalug larusama o hik fahet nare uruk lahi.