Read Angguruk Yali MAZMUR 89 Bible Online

MAZMUR 89 - Angguruk Yali bible

MAZMUR 89

¹Hun Ezrahi umbusag Etan inowen Allah wel turuk lit sini fano roho yunggultuk latfahon tu:

²NIKNI Allah, Hat hindi nenesug lahenon fahet sini yunggultukmen eneg welaruhuk. Inggik kobog nisa fug angge let neneptuk ulug ap hiyag isarukmen eneg welaruhuk.

³Haren ap hindi enesugmen eneg mondabi welaruhun ulug an noluk. Hinggik kobog nisa fug angge let neneptukmen eneg pohol yuk turuk eleg hag toho welaruhun.

⁴Haren hele uruk lit, ”An namingmingangge welamag ulug mumal taruk lit Daud ubam sali imbiyahon tu:

⁵’Haren Israel inap fet enesugmen eneg haren ondohowonen endebuhubon arimanowen oho sen enesug lamuhuben hineyap haptuk lahi,’ ulug hiyag itik iyag,” uruk lahen.

⁶Aben tuk fug teg ane Aren eneg turuk ulug hotsi poholmonen Hat wel haptuk. Umalikisi umbusuk fug angge fet enesug ulug fog haptuk.

⁷NINIKNI Allah Hat hahon poholma misig oho wereg eleg. Aben wel eneptuk angge arimano Hat men ambi reg eleg.

⁸Hotsi Hat walinggoho werehonen At eneg suwon wereg ulug enekol toho wereg.

⁹NINIKNI pohol ha kinang ha seneg lahenon, Hat hine roho welahen hag toho ap sa eke wereg? Nirim puk fug angge numalikisi let enepmin eneg peruk lahen.

¹⁰Ik haglabut hum toho watil waharukmu Hat suwonen yuwahap turuk lahen.

¹¹Wal tilmu pisanggo humon indi siyahon ik saho ahik ikma welatfahon Rahab ino Hat huyuhen sobir isaruk lit ware fisinag. Hat men seli roho werehon hinggik ineyonen yanggal eneptukmu linggik-longgo ibag.

¹²Pohol ha kinang ha Haren wal tinareg poholma werehon kinangma werehon obog toho Haren eneg ngi reg lahen.

¹³Umu fil ahamu fil Haren eneg wal tinagma tom Tabor men Hermon menen Hat hunuk suwap turuk.

¹⁴Hat hinggik hine roho leho feruk lit mun angge man angge apmayap turuk lahen.

¹⁵Mun ane man ane haloho emberuk lit humalikisi hine roho sen enesug lahen. Numalikisi ninggik obog isahuk fug ulug hindi enesug lit welahen.

¹⁶NINIKNI Allah ap o pumbuk eke Hat hebe umbagpag toho welahenon holohotma wereg lit enehiyehen enele hum toho hi haptuk inap arimano inindi se roho welamuhup!

¹⁷Allahn let neneptuk ulug likiya hupmu enehiyeg toho wereg lit Hat wel haptuk.

¹⁸Palimu amag ulug ninineyap neneptuk lahen. Hat ninibil atuk lahenma nenembong se roho welahe.

¹⁹Ap suwon nit ili og neneptukon ino NINIKNI, Haren mumal tarikin. Israel ninap Ninikni Hat hubabut fanowon hunuk fam aren fet nenesug lit wereg.

²⁰Indam Hat hamingmingangge hele holtuk latfahon inowen fulu roho yet harukmen Haren hiyag utuk lit, ”O pumbuk aruwon ap kabiniyon ahako roho turukon eke ap suwon welaruhuwen lahabuhuk ulug mumaltikik.

²¹Daud ino Anden hiyaharikikteg namingmingangge wereg lit Israel inap fet enesug laruhuwen ap suwon lahaptikik.

²²An ninggik nineyonen at seneg lit indi wirikap turuk laruhuk.

²³Ap seliyon misihen oho at men tog abuhup fug. Onolok ane turuk inaben apmayap tuhup fug.

²⁴At men seli roho welamuhup inap Anden siyahap enebuhuk. At fahet ninirim peruk lamuhubon arimano oho Anden unusuhuk.

²⁵At fahet napeleg am fug angge nindi reg laruhukmu ine roho palimu welaruhu.

²⁶Anden kinang su roho inggikmu umbuhukmu ik Efrat famen tulug saho ahik yenggelehon fam obog toho seneg laruhu.

²⁷Aren ele nubam uruk lit, ’Hat Nikni Allah an indag naptikinon, Haren an nahap mapmu naptuk lit fanowap naptuk lahen,’ uruk laruhu.

²⁸Ap suwon winon enesehelimu we at eneg palimu welamag ulug An namloho wandabonap tuhuk.

²⁹Anden nele sali at fam emberuk lahiyon hikit toho mondabi nindi regman eneg welaruhuk.

³⁰At inowen oho aren ondohowonen endebuhubon arimanowen oho Israel inap fet enesugmen eneg pohol eleg aruhu.

³¹Umalikisi aren indag enebuhuwon arimanowen An nele pisan isaruk lit ari-ari turuk lamuhup ulug imbiyag ane hikit toho tuk fug angge

³²Anden telep fug peruk ane turuk lamuhup halug

³³An nolohotman siyag ane eneg turuk ulug e fam unusuruk lit alem eke hag eke hag unubam emberuk laruhuk.

³⁴Unusuhuk angge famen sali emberuk lahi ane pisan isamin fug ulug Daud nindi regman eneg welaruhuk.

³⁵Anden ubam nele sali emberuk lahiyon uwag oko hila fug angge at men mangno roho welamuhuk.

³⁶Anden Daud ubam nele si ane uk fug angge nininggik ahandip toho welamuhuken ninggareg nunuk fam fag toho uruk lahi.

³⁷Aren oho umalikisiyen oho Israel kinang senegman eneg mo mondabi kun aruhu.

³⁸Pikalem hina famen kinang pilabohoman eneg wereg hag toho Daud umalikisi menen Israel inap fet enesug lit welamuhup,” ulug sali imbinag.

³⁹Israel ninap nonowe suwon Haren mumal tarikin angge famen ketiya holok haruk lit hinggik kobog toho hik isarikin.

⁴⁰Hamingmingangge ino fam hele sali imbinahon eleha feseruk lit unggul asum ap suwonen wan tehon ino sabelepma hik isarikin.

⁴¹O pumbuk aren tohon elehet walinggoho ohowon halog tebeserikinteg pin kuruk lit olunap tebeserikin.

⁴²Ap o ino iraham ke larukonen aren tohon huhulangge hilarukmu o pumbuk walinggoho werehon arimanowen at inggaliyap turuk.

⁴³At men seli roho wereg inap Hat inibil atuk lit palimuwap eneptuk latikinmu at fahet ninirim peruk inap enehiyeg toho wereg.

⁴⁴At tog elma larukmu ap seliyonen wabukag ulug asehen siyaha feseruk latikin.

⁴⁵At lehoma hur atuk angge miyaloho sabelepma yinggi feserikinmu palimu fano roho welatisi ane eleg atisi.

⁴⁶Haren mondabi inggaliyap tirikinmu at ebe kabiniyon famen sabalon hag atisi.

⁴⁷NINIKNI Allah, Haren nit let nenebuk fug angge hiraho lit eneg welaruhun? Noenam welamuhukmu holok ane hundama ahe laharukon ari eleg aruhu?

⁴⁸An noluk welahi ane horog tehen Hat holuk toho welamin! Haren ap wal eneptik inahon we tot welatug war atuk.

⁴⁹Ap sa war am fug angge mondabi oluk welaruhu? Ap sa ap warehon wereg ambeg wambuhuk fug ulug windat tahu?

⁵⁰NIKNI Allah, indam hindi nenesug latikin ane nungge fahet embeserikin? Daud men mondabi mangno roho welamuhuk ulug sali imbinahon ino hambolmaya feserikin?

⁵¹NIKNI Allah, an Hat hamingmingangge pet naptukon fahet wenggel haruk lamin! Ap o pumbuk obog tohowen ninggaliyap naptukmu nindimu siyag toho welahi.

⁵²Hat men seli roho wereg inaben ap suwon welamag ulug mumal tarikinon ino inda yako apmayap turuk. At o kema-kema larukmu oho inggaliyap turuk.

⁵³NINIKNI Allah wel turukmen eneg welamuhup! Anden nele uruk lahiyon aru teko lawag ulug sembahyang uruk lahi. Amin!