Read Angguruk Yali MAZMUR 9 Bible Online

MAZMUR 9 - Angguruk Yali bible

MAZMUR 9

¹Dauren sini Mut-Laben inggangga hikit toho sini milaltuk lit yunggultuk latfahon tu:

²An nindi abir anggeyen Hat NINIKNI Allah wel hapmin. Aben tuk fug teg ane turuk latikinon fahet ap hiyag isamin.

³Hat fahet nahiyehen sini yunggultuk lit Hat eneg palimu welahen ulug hunuk suwap timin.

⁴An fahet ninirim peruk latuson arimano Hat holohotman enekolen linggik-longgo urukmen unuyug salog-malog angge roho mako wamburuk lit war atusa.

⁵Hat alem obog toho pikit toho haltuk lahenon lehoma heriyeg lit an ili og naptuk lit nahap siye roho windat naptikin.

⁶Ap o pumbuk eke hag eke hag werehon unubam hele holok toho uruk lit siyag ane turukon arimano siyahap eneptikinmu fobik ap misihen oho it ununuk uruk lamuhup fug.

⁷Ap seliyon arimano yanggal eneptuk lit inibam pumbuk olunap turuk latikinmu inine mondabi eleg atisi. Fobik ap misihen oho it fahet wenggel isaruk laruhu fug.

⁸NINIKNI Allahn ap fet enesugmen eneg mondabi welaruhu. Fobik Anden alem obog toho kong tuhuken lehoma hur arik lahakuk peruk lit hur atuk angge umbat tarisi.

⁹Hur atuk angge ino fam heriyeg lit Allah ubabut fanowon inowen ap o pumbuk obog toho kinangma werehon unggum unubam wereg ane hikit toho kong tuhu.

¹⁰Ap inilaheg toho werehon fahet NINIKNI Allah ino helep owik hag toho weregma enesengseng toho wereg li At apma laruk.

¹¹NIKNI Allah, Haren ap yami haptukon alpal isaruk lahen fug. Ari fahet Hat hunuk onolukon arimanowen Allahn let nenepmisi ulug Hat hubam eneg wenggel haruk.

¹²NINIKNI Allah tom Sion fam lehoma heriyehon ino sini fam wel turuk lamuhup! Aren ine roho turukon fahet ap o pumbuk obog toho hiyag isil lahup!

¹³Apma roho wereg inaben enele hi roho urukmu Allahn alpal isaruk eleg angge famen it apmayap eneptukon alem angginon unubam emberuk.

¹⁴NIKNI Allah, an hindi niyimin! Aben an fahet ninirim peruken asengseng toho welahiyon yet niyimin. An war am hag ane naptuken windat nabik ma!

¹⁵Windat napmihin halug an nahiyehen humalikisi o Yerusalem werehon arimano enelukeman Hat wel haptuk lit Allahn let naptisi ulug hiyag isaruk laruhuk.

¹⁶Ap o pumbuk kema-kema werehonen nit mako wambukag ulug kinang habuloho yebangge yep teberusa angge famen ininggareg mako wamburusa. Nit nunusul ulug sapna kahaltusa angge famen ininggareg luhur atusa.

¹⁷NINIKNI Allah inam arik waharuk lit alem angginon unubam emberisi. Allah ele holtuk elehon arimanowen yebangge yep teberuson elma ininggareg luhur atusa.

¹⁸Ap o pumbuk kema-kema werehon Allah enembol yig utukon arimano kinang apma fil ap warehon wereg ambeg wambuhup.

¹⁹Ap inilaheg toho werehon arimano aben alpal isaruk ane mondabi welaruhu fug. Ap inine elehonen fano welala peruk ane fobik hikir aruhu.

²⁰NIKNI Allah, ap kinangmonen enehako roho turuk lit Hat hele ying habuk nowen in aruhunteg ap o pumbuk obog toho unggum unubam werehon kong tuhun!

²¹Ap arimano enekolap enebuhunmu nit ap kinangmon eneg welahe ulug inindi anggar aruhu.