Read Angguruk Yali MAZMUR 90 Bible Online

MAZMUR 90 - Angguruk Yali bible

MAZMUR 90

¹Allah amingmingangge Musa inowen sembahyang ibahon tu: Ninikni suwon, Hat hiraham indam nunumbasi yuwag toho welatfag hag toho ketiya oho nit Hat hiraham yuwag toho welahe.

²Haren uwan tom yaron wal tuk fugmu pohol men kinang men wereg am fugmu Hat indamon ino fobik oho mondabi welaruhun.

³Haren ap kinang famen lal eneptik inahon suhuloho watlihip ulug wol eneptuk lit nin kinangap eneptuk lahen.

⁴Mo teng-teng angge larukon fahet Haren we hup misihim sono welatikik peruk lahen. We il misig nohorukon hag toho wereg peruk lahen.

⁵Ap filig toho hik isaruk lahenma iren nei walug enepeleg atuk hag toho turuk. Hoholangge folo-folo wilip atukon hag toho turuk.

⁶Likiya fano wilip atuk lit owil uruk angge famen hupmu halo uruk.

⁷Hat holok haruk lit siyahap neneptuk lahen. Hahummu het-pet harukmu nit eleg atuk lahe.

⁸Siyag ane niren turuk laheyon Haren yet haruk lahen. Hirako turuk laheyon oho fag turuk lahen.

⁹Hat holok ane turuk lahenma sakan am hup am turukmu folo-folo sabal atuk lahe. Amusun toho welam fug angge we misihim sat wili feseruk hag toho welahe.

¹⁰Nit ap nonoruk hubulu wilip atlug war atuk lahe. Ap ine werehon oruk hubulu reg angge famen amusun toho welatug war atuk.[13] Sat anggolo haruk lit asengseng toho weregman eneg war atuk lahe. Abi roho welam fug angge hilalim ta roho longgo uruk hag toho longgo uruk lahe.

¹¹Hahummu het-pet haruk lahenon ari fahet ap san indimuwen fuki roho wenggel haruk? Holok ane turuk lahenon fahet mondabi siyahap naptuk ulug ap san akol haruk?

¹²Nit ninindi anggat toho welamuhuken hit honoluk welahep ane horog tehen hup wal taneg winag haruk lit welamuhup ulug hiyag nisahun.

¹³NIKNI Allah, marenam welamuhukmu holok ane eleg aruhu? Hamingmingangge hebeloho hindi nisamihin!

¹⁴Nit nonoluk wereg li nenehiyeg toho sini yunggultuk lit welamuhuken hup ekeyon-ekeyon sakan turukmu hindi roho yet nisaruk laruhun.

¹⁵Mo wirig atukmu siyag toho welatukukteg mo ilig atukmu fanowap nenebuhun. Pikalem hik atukmu ninindi anggin toho welatukukteg pikalem inam atukmu ninindi seyap nenebuhun.

¹⁶Haren hine roho turuk lahen ane ari nit hamingminganggeyen yet hahuken nenelukeman turuk laruhun. Hat hubam umbagpag turukon nunumalikisiyen yet hahuben inamap tuhun.

¹⁷Allah NINIKNI, Haren hindi nisaruk lit nininggik ineyap neneptukmu niren nungge-nungge turuk laheyon fano teko laruk laruhu.