Read Angguruk Yali MAZMUR 91 Bible Online

MAZMUR 91 - Angguruk Yali bible

MAZMUR 91

¹Ap san nahap mapmu napmisi ulug Allah mondabi ineyon palimu werehon apma larukon arimanowen

²NINIKNI Allah ubam uruk lit, ”Haren ili og naptukmu nindi yuwag toho welahi. We Hat hubam eneg anden wenggel haruk lahi,” uruk.

³Yebangge elma kuhu ulug Aren windat haptuk lit ouk humon ubam aruhu ulug let haptuk laruhu.

⁴At aherabulen hondo hasugmu hat fano roho sakoma welaruhun. Aren inggik obog hiya fug angge hat sen hasug lit weregma alem nungge-nungge nubam atuk eleg ulug hindi se roho welaruhun.

⁵Hubanggo mun angge man angge inam atukon fahet hakol toho welaruhun fug. Ilingge tog hubam pising tik waharukmu hakol eleg toho welaruhun.

⁶Ouk alem suwon o hik tegma waharukmu ano, seleg tegma waharukmu ano, hambong se roho welaruhun.

⁷Tog aptuk lit hinggik pikit filon ap teng-teng angge unusurukmu hinggik hare filon ap teng-teng angge winag isa fug toho war amuhup halug[14] hat hamu eneg tog hahapma kuhu fug.

⁸Haren walinggoho yet isarukmen onolok ane turuk inap arimano hebeloho unusurukmu yet isahun.

⁹NIKNI Allahn nahap siye napmisi ulug At mondabi palimu werehon apma laruk lahen.

¹⁰Alem angginon misig oho hat hubam aruhu fug. Hibam oho siyag am fug angge fano welaruhu.

¹¹Allahn otsi malaikat mon eneptukmu hat kema-kema laruk laruhun ambeg let haptuk lamuhup.

¹²Hat huyug heleben huwaruhu ulug it ininggiken aho haptuk lamuhup.

¹³Olomene men pisanggo men huyuhen sobir isaruk laruhunmu huwatuk lamuhup fug.

¹⁴Allahn ele uruk lit, ”At ino An min inggik ahandip toho werehen Anden windatuk laruhuk. An nunuk oluk toho werehen An at iraham welaruhuk.

¹⁵Aren ele ine roho An nubam uruk halug ele holtuk laruhuk. Siyag ane ubam atukmu Anden let timin ulug windaruhukteg palimuwap tuhuk.

¹⁶Amusun toho welaruhureg sabal aruhuwen ineyap turuk lit Anden fanowap tuhuk,” uruk.