Read Angguruk Yali MAZMUR 92 Bible Online

MAZMUR 92 - Angguruk Yali bible

MAZMUR 92

¹Sini o sabit sambil yunggultukon tu:

²Hat NINIKNI Allah sini fam wel haptuk lit Hat mondabi palimu welahenon hunuk leho feruk ane ari fano.

³Hubet Haren humalikisi hindi enesug lahen ane fahet anden ap hiyag isaruk lahi. Hupmu Haren hinggik kobog isa fug angge let eneptuk lahen ane fahet fag toho uruk lahi.

⁴Pinggong humon hele numen ililohon men puhuli men kong til laruk lit sini uruk lahi.

⁵Hat NIKNI Allah hinggik ineyonen turuk lahenon fahet nahiyeg haruk lit nindiyen yunggultuk lahi.

⁶NIKNI Allah, Haren alem suwon turuk lahenma fog haptuk lahi. Haren yat toho wenggel haruk lahenon fahet nindi firoho welahi.

⁷Haren wenggel haruk lahenon ari ap inindi anggat tehonen oho wenggel ha fug teg. Alem nungge fahet wenggel haruk ulug ap inindi sohuwon enepeleg.

⁸Hat fahet ninirim peruk inap arimano hoholangge sililim-salalam isaruk hag toho fano roho welamuhup halug oho heneko hik isahupmu lin-lan urukmen eneg welamuhup. Onolok ane turukon arimano e owil uruk hag toho turuk lamuhup halug oho fobik siyahap enebuhupmu nin hebeloho fano amuhup fug angge famen

⁹Hat NIKNI Allah palimu wereg lit mondabi welaruhun.

¹⁰Hat NINIKNI Allah men seli roho werehon arimano we tem toho siyag amuhup. Onolok ane turukon obog toho pilili-palala isaruk lamuhup angge famen

¹¹Haren an nineyap naptikinmu wam sapi yuhambukon hag atikikteg nine roho turuk lahi. Haren an palimuwap napmin ulug ahaluwe amben fano angge nunggulmu are naptikin.

¹²An men seli roho werehon mako wamburukmu nilen yet isaruk lahi. Onolok ane turuk inap an siyahap nabul ulug in atuson siyag atukmu nisanggowen hol isaruk lahi.

¹³Allahn fano perukon turuk inap arimano e asimit hag toho su atuk lamuhup. E sahi tom Libanon fam werehon hag toho yaron eneg laharuk lamuhup.

¹⁴It arimano NINIKNI Allah ibam owahalma yaho ahen hag toho wereg lit owil urukmen eneg welamuhup.

¹⁵Inine roho weregman eneg sabalma oho anggen yihik feruk lamuhup.

¹⁶Ari roho turuk lamuhup ane ariyen NINIKNI Allahn pikir ane eneg turukon inam aruhu. At ino helep tuwaliyen hag toho wereg lit un ane turuk eleg.