Read Angguruk Yali MAZMUR 94 Bible Online

MAZMUR 94 - Angguruk Yali bible

MAZMUR 94

¹NIKNI Allah, Haren ap ayeg waroho unusuruk lahenon, nit niniline inam arik ma!

²Haren kinang obog toho seneg lit alem obog toho haloho emberuk lahenon in atmihinteg inindi winik-wonog angge ruruk inaben siyag ane turukon fahet ayeg wat isamihin.

³NIKNI Allah, noenam welamuhukmu ap Haren siyag peruk lahen ane turukon arimano enehiyeg toho wereg ane eleg aruhu?

⁴It obog tohowen enele hemet toho uruk lit nonolok ane fano tehe ulug enewelwel taruk.

⁵Hat NIKNI Allah humalikisi unuyuhen sobir isaruk lit hanggengge wereg inap arimano siyahap eneptuk.

⁶Hiyap yuwohon men malik suwarehon men unusuruk lit ap pohon oho waroho pal-pal lahabe feseruk.

⁷Iren enele uruk lit, ”NINIKNI Allahn yet nisaruk eleg, Allah Yakuben wel turuk latfahon inowen niren turuk laheyon fahet wenggel haruk eleg,” uruk.

⁸Nori, hit hinindi sohu roho welahebon, fano wenggel hemek! Nosambil hinindi anggar aruhu?

⁹Ap inisanggo lalfag ahun inowen hol ha fug teg peruk lahep ano? Ap inil wal tibag ahunen yet ha fug teg ano?

¹⁰Ap o pumbuk enele wal taneg werehon milal eneptuk ahun inowen alem unubam umbuk fug teg ano? Aren ap inindi anggarap eneptuk lit

¹¹ NINIKNI Allahn ap unundaman wenggel haruk ane oluk teg. Iren peruk ane ino seni ahe folo-folo teng urukon hag toho wereg.

¹²Hat NINIKNI Allahn ari-ari turuk lamuhup ulug humalikisi komo eneptik inahon hikit toho milal eneptuk lit unubabut hal eneptuk lahen inap arimano enehiyeg toho welamuhup.

¹³It arimano asengseng toho wereg li Haren ili og eneptuk lahenma inindi yuwag toho welamuhup. Haren it wanggi waroho fet enesugmen eneg onolok ane turuk inap arimano wareg angge sal enebuhup ambeg kinang habuloho wep tuhup.

¹⁴NINIKNI Allahn umalikisi ininggik sen enesug lit At anggengge wereg inap arimano embeselug lahu fug.

¹⁵At la fug angge weregma aben alem haloho emberuk ambehen unggum pikit toho kong turuk lamuhupmu inindi pikit toho werehon arimanowen pikir ane turukon ari suwap turuk lamuhup.

¹⁶Ap san an ili og naptuk lit onolok ane turuk inap apmayap enepmin ulug in aruhu?

¹⁷NINIKNI Allahn an let naplep fug halug an we tot welalereg enele uruk eleg ambeg lele.

¹⁸An nuyug salog-malog angge roho mako wambimin perukmu Hat NIKNI Allahn nindiyen ulug ninggik sen naptuk latikin.

¹⁹An nindi anggin toho wenggel harukmen eneg weregma Haren nindi seyap naptuk latikin.

²⁰Alem haloho emberuk ambeg pikir ane hareyap turukon arimano Hat men mangno roho welam teg ano? It enembiliken Allah wene hikit toho alem haloho emberuk lahe uruk liren ap siyahap eneptuk.

²¹Iren te ap fano ane turukon apmayap enebul ulug mangno atuk lit ap alem unubam elegman war amag ulug kong toho emberuk.

²²Hat NIKNI Allah an nubahet helep owik hag toho weregma an Hat hapma hirag arik laruk lahi.

²³It onolok ane turukon arimano Hat NINIKNI Allahn ayeg wat isaruk lit siyag ane iren turukon fahet unusuruk laruhun.