Read Angguruk Yali MAZMUR 95 Bible Online

MAZMUR 95 - Angguruk Yali bible

MAZMUR 95

¹NINIKNI Allah fahet nenehiyeg toho sini yunggultuk lamulen maniyek! Nit fanowap nenebuhu ulug nenele hi roho At wel turuk lamul.

²Aren let neneptisi ane hikit toho sini il At olohotma laruk lamulen maniyek!

³NINIKNI Allah eneg suwon. Aben wel eneptuk angge obog toho enemberimu At eneg wereg.

⁴Tom yaron famen tulug tonggoma werehon obog toho Aren eneg seneg lit wereg.

⁵Ik saho ahik Aren wal tibareg At ngi reg lit wereg. Kinang oho inggiken werehap tibareg Aren seneg lit wereg.

⁶Nit nenelenggen fam hur amulteg nonorohole kunuk toho wereg lit NINIKNI Allah wal nenepfahon ino wel tulen maniyek.

⁷We At eneg Ninikni wereg. Wam domba foroho ahunen ambohom fano roho fet enesug hag toho nir oho Aren fet nenesug. O yoho At ele holtuk lamek:

⁸”Hunumbasi o Masa-Meriba lekma wereg lit An nele holtuk latfag fug hag toho hiren oho turuk lamuhup fug.

⁹Anden let eneptuk lit turuk latik iyag ane yet haruk latfag angge famen iren An wal niyaruk latfag.

¹⁰An nele ying nabil laruk latfahon fahet nelmahip toho yet isarukmen mo ilig am wirig am turukmu teng misigmen nubam hilag nuwalen 40 atfag. ’Anden telep peruk ane wenggel ha fug angge un ke laruk,’ peruk latik iyag.

¹¹An nolok haruk lit, ’Hit kel tahup ambeg Anden kolowap hisarikik angge famen hit kuhup fug,’ ulug fag toho hiyag isiyag.”