Read Angguruk Yali MAZMUR 96 Bible Online

MAZMUR 96 - Angguruk Yali bible

MAZMUR 96

¹ NINIKNI Allah wel turuk lit sini keron yunggultuk lamek! Kinang atogman atogma welahebonen NINIKNI Allah fahet henehiyeg toho yunggultuk lamek!

²Tei watuk lit At unuk palimuwap turuk lamek! NINIKNI Allahn fanowap neneptisi ulug likiya hupmu hiyag isaruk lamuhup!

³At umbagpag turukon inowen ine roho turuk ane fahet o pumbuk munon-manon hiyag isaruk lamuhup!

⁴NINIKNI Allah mondabi suwon ulug ap obog tohowen wel tukag. Nunumba ulug wel eneptukon arimano mondabi apma regma we At fahet eneg enekol toho welamuhup.

⁵Ap o pumbuk winonen ninikni ulug wel eneptukon arimano warehon hag angge wereg angge famen NINIKNI Allah ino pohol kinang wal tibag ahun wereg.

⁶At ino umbagpag turuk lit mondabi palimu wereg. At ine fanowon inowen ibam keleg toho wereg.

⁷At ine roho wereg lit umbagpag turukon ino ap ununggul unuk obog tohowen wel tik waharuk lamuhup.

⁸At unuk fanowon palimu roho werehon suwap turuk lit Allah fahet umbul peruk lahebon At ibam walug waharuk lamuhup.

⁹Allah ibam kuruk lit wan turuk asum wan teg lit[15] NINIKNI Allah olohotma henelenggen fam hur atlug sembahyang uruk lamuhup. Ap kinang atogman atogma welahebon At alukema henekolen henebe elek turuk lamuhup.

¹⁰Ap o pumbuk obog toho unubam hiyag isaruk lit, ”NINIKNI Allah ap suwon nit fet nenesuhon weregma kinang yuk tuk fug angge ine roho wereg. At inowen o pumbuk munon-manon alem unubam werehon haloho emberuk laruhu,” ulug hiyag isaruk lamuhup.

¹¹Poholma kinangma welahebon henehiyeg toho welamuhup! Ik saho ahik inowet ahummu wereg angge arimanowet Allah wel turuk lit enele mi ruruk lamuhup!

¹²Kinang ebeyet yabukmu yatuk anggeyet enehiyeg toho welamag! E farema werehonen oho enehiyeg haruk lamuhup!

¹³NINIKNI Allah ap o pumbuk obog toho alem unubam werehon kong tik waruhu sambil ap obog tohowen fanowap nenebehek peruk lamuhup.