Read Angguruk Yali MAZMUR 98 Bible Online

MAZMUR 98 - Angguruk Yali bible

MAZMUR 98

¹NINIKNI Allah wel turuk lit sini keron yunggultuk lamuhup! Aren fano ane turuk latisimu harukukteg nenekol harukuk. At ine roho turuk lit palimu atisi.

²Anden fanowap henebuhuk ulug fag toho hiyag nisarisi. Ap o pumbuk obog toho iniline umalikisi windat eneptisi.

³Israel inap eneg indi isaruk lit anduhun hare ruk fug angge it fahet eneg wenggel isaruk latisi. Ap obog toho indit-indit werehon arimanowen Ninikni Allahn nit fanowap neneptukmu yet haruk latusa.

⁴Ap obog toho kema-kema werehonen NINIKNI Allah wel turuk lamuhup. Hinindimu henehiyeg toho Allah asini yunggultuk lit At fog turuk lamuhup.

⁵Pinggong kong turuk lit henele ine roho Allah sini yunggultuk lamuhup.

⁶Waruk teltuk lit NINIKNI suwon henele ine roho wel turuk lamuhup.

⁷Ik saho ahik inowet ahummu werehonet Allah wel turuk lit ngu ruruk laruhu. Kinang ebeyet kinangma werehonet Allah wel turuk lit mil turuk lamuhup.

⁸Ik hul salalang turuk lit aplohok kilambak turuk lamag! Tom suwon arimanowen oho enehiyehen Allah wel turuk lamuhup.

⁹NINIKNI Allah ap o pumbuk obog toho alem unubam werehon kong tik waruhu sambil ap obog tohowen fanowap nenebehek peruk lamuhup.