Read Angguruk Yali AMSAL 1 Bible Online

AMSAL 1 - Angguruk Yali bible

AMSAL 1

¹Daud amloho Salomo Israel inap sen enesuhon inowen fano roho welamuhup ulug komo eneptuk lit alem wal-wal werehon il misig-misig kong heheg hiyag isaruk latfag ane suwesingga tu fam hahareg lit wereg.

²Ap san suwesingga aru kim harukonen ap inindi anggar atukmu enebe fano roho wereg ane fahet inindimu onoluk aruhu. Aben indit toho uruk ane alem tu fahet uruk ulug inindi seleg aruhu.

³Kalem pikiron laruk lit enele tem toho uruk lit fano ane eneg turukon fahet milal taruk lamuhup.

⁴Ap yabuk ket ak turukonen fano roho wenggeltuk ane fahet onoluk atuk laruhu. Malik kabiniyonen oho ap sabalonen wenggeltuk ane wenggel haruk lamuhup.

⁵Ap inindi anggat toho werehonen oho suwesingga aru kim haruk lit nin sebe roho inindi anggar aruhu. It tam milal eneptuk latuson oho ap fano welamuhup ane fahet inindi seleg aruhu.

⁶It inindi seleg aruhumu aben map toho uruk ane men ap inindi anggat toho werehonen hiyag isaruk ane men indit toho kapal isaruk ane men fuki roho wenggel haruk lamuhup.

⁷ NINIKNI Allah fahet enekol toho wereg ane ariyen eneg ap inindi anggar am teg. We sohu ane turuk inaben ap inindi anggar atuk ane milaltukon fahet ninirim peruk.

⁸Namloho, hikni men hisinga menen komo haptuk ane fuki roho holtuk laruhun.

⁹Komo haptuk ane ari haliliyangge fanowon hat hubam lahap haptukon hag toho wereg.

¹⁰Namloho, ap siyag ane turukonen hindi kahal haptuk halug tem toho uruk ulug onombolim laruk laruhun fug.

¹¹Iren hat hubam enele uruk lit, ”Nare, ap siyag ane turuk elehon saplangge unusul ulug kema kahalik lulen ma!

¹²Aben nenebe fano welahe perukmen war atuk hag toho unusul.

¹³Unusulteg enenggengge fano-fano angge hilalug ninibam umbat tulmu keleg toho welaruhu.

¹⁴Huhulangge hululon arimano nit fibir amulen luk ohon ma!” ulug hiyag hutuk lamuhup halug

¹⁵hindi yuwag toho wereg lit it onombolim laruk laruhun fug.

¹⁶It onolok eleg toho welam fug tehen likiya hupmu ap unusul peruk lit wereg.

¹⁷Huhubiyen yet tegma ap ekeyen yebangge reberuk halug huhubi inowen an luhur atmin fug ulug ke ino lahu fug angge famen

¹⁸it arimanowen yebangge yep turukon ino elma ininggareg luhur atuk lit war amuhup.

¹⁹Ari hag toho ap enebe unusuruk lit enenggengge hilaruk inap arimano ininggareg war atuk lamuhup.

²⁰Ap inindi anggarap eneptuk ane inowen owahalem ke men kalem laruk ke men aben uruk hag toho ele hi roho urukon holeg lamek!

²¹O pumbuk walinggoho elehet ohowon sokma ap luhaloho wereg ambehen ele uruk lit,

²²”Hit sohu roho welahebon, nosambil hinindi anggar aruhu? Nosambil henele hemet toho uruk lit ap inindi anggar atuk ane apmayap turuk lahebon eleg aruhu?

²³Anden komo heneptukmu hiren holtuk lamuhup halug an nindimu noluk teg ane hiyag hisaruk lit hinindi anggarap heneptuk laruhuk.

²⁴Anden wol heneptuk latikik angge famen hiren nele holoho embeserikip. Ninggik tum pilig lit hiyag hisaruk latikik angge famen henembol yig nutuk latikip.

²⁵Anggoloenam komo heneptuk latikik angge famen nele holtikip fug.

²⁶Holtikip fug ane ariyen alem eke hag eke hag hunubam aruhumu henekol toho welamuhup halug anden inda yag heneptuk laruhuk.

²⁷Alem siyahon siyelu hag toho hit hunubam waharuken yuk lagmag uruk lit asengseng toho welamuhup halug anden hininggaliyap heneptuk laruhuk.

²⁸Ari turuk li hiren an wol nabuhup angge famen anden henele holuhuk fug. Hiren kema wereg ulug yami nabuhup angge famen hiyag nabuhup fug.

²⁹Hit hinindi anggar atuk ane fahet hinirim teg lit HINIKNI Allah henekol teg ane yami ruruk lahep fug.

³⁰An komo heneptuk latikik ane niren holtul fug ulug embeserikip.

³¹Ari hag toho til-wil laruk lit alem siyahon hunubamap taruk lahep.

³²Malik toronen wenggeltuk ane peruk inap arimanowen an nele holtuk elehen war atuk lamuhup. Ap inindi sohu roho werehonen enembol yig nutuk ane ariyen siyag amuhup angge famen

³³ap san an nele holtuk halug at ino yuk lagmag uk fug angge indi yuwag toho welaruhu,” uruk.