Read Angguruk Yali AMSAL 10 Bible Online

AMSAL 10 - Angguruk Yali bible

AMSAL 10

¹Hun Salomoen umalikisi komo eneptuk lit alem wal-wal werehon il misig-misig kong heheg hiyag isaruk latfag ane tuma hahareg: Malik indi anggat tehonen ikni indi ahiyehap turuk. Malik indi anggat teg elehonen isinga indi siyahap turuk.

²Ap enele ying eneptuk lit enenggengge hilarukon ariyen ap fano atuk eleg. Allah fahet enekol haruk ane ariyen eneg ap onoluk welamuhup.

³Allah ele holtukon arimano suburu obok hahup tohon ulug NINIKNI Allahn let eneptuk. At enembol yig utukon arimanowen hilila peruk ane ari NINIKNI Allahn apmayap turuk.

⁴Yabuk inirim toho turukon arimano enenggengge eleg atuk; inine roho turukon arimano enenggengge anggolo atuk.

⁵Ap inindi anggat tehon arimanowen suburu yahaltuk li yahal taruk. Nohoruk inap arimano ininggali roho welamuhup.

⁶Allah ele holtuk inap arimano ununggulmu fanowon wan teg lit wereg. At enembol yig utuk inap enembilikmu onolok ane eneg hirako foroho lit wereg.

⁷Fano ane turuk inap ununuk wenggel haruk ane ariyen fanowon unubam atuk. Siyag ane turuk inap ununuk aben enepeleg aruhu.

⁸Ap inindi anggat tehon arimano aben komo eneptukon fano holtuk. Alem eleg ane urukon arimano salog-malog angge roho wat tahup.

⁹Ap kalem pikiron larukon arimano inindi yuwag toho welamuhup. Kalem hareyon larukon arimano aben yet isalug sen enebuhup.

¹⁰Inil humbut-humbut atil larukon arimano inindimuwen nonolok ane tul peruk. Alem haleg eleg ane urukon arimano salog-malog angge roho mako wamburuk.

¹¹Ap unubabut fanowon enembiliken milal eneptuk ane ariyen ap fano onoluk welamuhup. Ap unubabut siyahon enembilikmu onolok ane eneg hirako foroho lit wereg.

¹²Onori fahet ninirim peruk ane ariyen it-it yik aptuk ane inam atuk. Onori inindi enesug ane ariyen siyag ane turukon obog toho hondo ruruk.

¹³Inindimu fuki roho wenggel haruk inap enembilikmu tem toho uruk ane eneg wereg. Inindi anggat teg elehon unusurukon fahet wanggun wep toho wereg.

¹⁴Ap inindi anggat tehonen alem onoluk atuk ane foroho. Ap inindi anggat teg elehon enele uruk ane ariyen alem siyahon heg toho wol turuk.

¹⁵Tung inaben an nanggengge arimanowen elehet hag toho walinggoho kilap nasuhen nindi yuwag toho welahi peruk. Ap inine elehon enenggengge elehen siyag atuk.

¹⁶Fano ane turukon ambiyangma onoluk wereg ane inam atuk. Onolok ane turukon ambiyangma siyag atuk ane inam atuk.

¹⁷Ap sa aben komo eneptukmu hol harukon arimano fano welamuhup ambeg laruk lamuhup. Ap sa aben komo eneptukmu hol haruk elehon arimano un ke laruk lamuhup.

¹⁸Onori fahet inindimu inirim teg anggeyen enele fano roho unubam urukon ari enele si ane uruk. Ap onori enebug il larukon arimano inindi anggat teg elehen uruk.

¹⁹Ap enele anggolo urukon arimanowen siyag ane turukon suwap turuk. Ap inindi anggat tehonen nele imin ano ulug fuki roho wenggel halug enele uruk.

²⁰Allah ele holtukon enembilikanggen ili ruruk angge perak fanowon hag toho wereg. Allah enembol yig utukon inindi elehon hag toho wereg.

²¹Allah ele holtukon arimanowen enele uruk ane ariyen ap anggolo fano onoluk welamuhup. Fuki roho wenggel haruk elehon arimano inindi sohu roho wereg lit turukmen eneg war amuhup.

²²NINIKNI Allahn ap inineyap eneptuk ane ariyen ap tung atuk. Yabuk lisag toho wituk ane ariyen eneg ininggikmu atuk eleg.

²³Ap inindi sohu roho werehon arimanowen siyag ane turukon fahet enehiyeg haruk. Ap inindi anggat tehon arimanowen fuki roho wenggeltuk ane fahet inindi haruk.

²⁴Ap onolokon arimano alem angginon tu nunubam aruhu ano ulug enekol haruk angge ino unubam atuk. Ap unubabut fanowon arimano inindimuwen peruk ane hikit toho unubam teko laruk.

²⁵Ap onolokon arimano siyeluwen og eneptug larukmu ap unubabut fanowon arimano mondabi welamuhup.

²⁶Ap asukun siyahon hubu ap inil siyahap turukon hag toho werehen yabuk wit nimin ulug mingming tuk fug.

²⁷NINIKNI Allah fahet enekol haruk ane ariyen ap inine atuk lit amusun toho welamuhup. Allah enembol yig utukon arimano amusun toho welam fug angge war atuk lamuhup.

²⁸Allah ele holtukon arimanowen fano amuhuk ulug wenggel haruk ane hikit toho enehiyeg toho welamuhup. Allah men seli roho werehon arimanowen fano welala perukmen siyag amuhup.

²⁹Ap pikir ane eneg turukon fahet NINIKNI Allah ino owik lilohon hag toho wereg. Siyag ane turukon arimano fahet Allah ino sapna kahalehon hag toho wereg.

³⁰Allah ele holtukon inindi yuk tuk fug angge weregman eneg mondabi welamuhup. Allah enembol yig utukon arimano kinangman eleg amuhup.

³¹Allah ele holtukon inindi anggat teg lit enele uruk. Ap enele piren toho urukon enembilikanggen Allahn paloho hik isahu.

³²Allah ele holtuk inaben enele uruk lit ap inindi enehiyehap eneptuk. Allah enembol yig utukonen enele uruk lit ap enele ying eneptuk.