Read Angguruk Yali AMSAL 11 Bible Online

AMSAL 11 - Angguruk Yali bible

AMSAL 11

¹Suburu tor angge sum fam fani rurukmu anggin eleg angge famen anggin teg ulug enele si urukon fahet NINIKNI Allahn nirim peruk. Anggin wirim turuk ane hikit toho urukon fahet ahiyeg haruk.

²Inindimu winik-wonog toho turukon arimano ininggali haruk lamuhup. Inindi anggat toho werehon arimanowen ininggareg apmayap taruk.

³Ap inindi pikiron arimanowen enele tem toho uruk lit kalem pikiron eneg laruk. Ap enele ying eneptukon ininggarehen siyahap taruk.

⁴Allahn olok ane tuhu sambil ino mun angge man angge aben forohowon arimanowen ap windat enebuhup fug. Allah fahet enekol haruk ane ariyen eneg ap onoluk welamuhup.

⁵Allah ele holtuk inap inindi pikit tehen kalem fanowon yag aruhu. Allahn peruk ane sobir isalug siyag ane turukon arimano salog-malog angge roho fuk tuhup.

⁶Ap inindi pikit toho wenggel harukon arimano Allah fahet enekol haruk ane ariyen fano amuhup. Ap enele ying eneptukon arimano mun angge man angge helele perukon ari famen yebangge elma kuhup.

⁷Allah enembol yig utukon arimano enebeyet inindimu fano welala peruk aneyet ambiyeg war amuhup. Nine roho wereg lit siyag aruhuk fug perukmen siyag amuhup.

⁸Allah fahet enekol harukon arimano asengseng toho weregma Allahn windat enebuhu. Allah men hili roho werehon arimano it unubalma asengseng haruk lamuhup.

⁹Allah fahet ninirim perukon arimanowen enele uruk ane ariyen onori siyahap eneptuk. Allah fahet enekol harukon arimano mun ane man ane alem obog toho onoluk teg ane ariyen fano amuhup.

¹⁰Ap Allah fahet enekol harukon enebe fano weregma inibam pumbuk obog toho enehiyeg haruk. Allah enembol yig utukon arimano war atukmu ap obog toho enehiyehen yunggultuk.

¹¹Ap inindi pikiron arimano Allahn inineyap eneptukmu inibam pumbuk suwap turuk. Allah men hili roho werehon enele siyag toho uruk lit inibam siyahap turuk.

¹²Ap inindi anggat teg elehon arimanowen onori enebug uruk lit apmayap eneptuk. Inindi anggat tehon arimanowen nenele ul fug peruk.

¹³Ap winonen nenele hol hahup tohon ulug hirako hiyag isaruk ane hol halug ap inindi wirik toho werehonen winon hiyag isaruk eleg. Onori enebug il larukon arimanowen ap obog tohowen holukag ulug hiyag isil laruk.

¹⁴Ap fet enesuhon eke wereg eleg halug ap obog toho unuyug salog-malog angge roho mako wamburuk lamuhup. Fano komo eneptuk inap anggolo wereg halug ap arimano enehiyeg toho welamuhup.

¹⁵Ap eke ubam paleg angge wereg halug haren paleg lahenon anden paluhuk ulug sali ubam emberuk ahun ino inggarehen siyahap taruk. Sali ari hahon emberuk eleg ahun indi yuwag toho welaruhu.

¹⁶Ap onolok ane turukon ininggikmu anggolo atuk angge famen hiyap indi fanowon aben wel turuk lamuhup.

¹⁷Ap san ori indi enesug halug inggareg ubam fano ane turuk. Ap san ori unubam olok ane turuk halug inggarehen wat taruk.

¹⁸Ap Allah enembol yig utukon arimanowen iniyabuk lisag toho turuk angge famen onggo folo-folo longgo uk hahon eneg ininggikmu atuk. Ap Allahn peruk ane hikit toho turuk lit anggen fanowon fok turukon arimanowen onggo mondabi welaruhuwon hilaruk lamuhup.

¹⁹Ari fahet ap san Allahn fano peruk ane hikit toho turuk halug fano oluk welaruhu angge famen ap san siyag ane eneg turuk halug war aruhu.

²⁰Ap inindi piren tehon arimano fahet NINIKNI Allahn nirim peruk. Kalem fanowon larukon arimano indi enesug.

²¹We tem toho ap siyag ane turukon arimano unubam alem angginon aruhu. Allah fahet enekol haruk inabet unumalikisiyet Allahn windat eneptuk laruhu.

²²Hiyap orohole fano famen ubabut siyahon eke wam ambiyangmangge emas umbagpag turukon kilabehon hag toho wereg.

²³Ap Allah fahet enekol harukon arimanowen tu men ari men teko lalep peruk ane ambiyangma alem fanowon eneg inam atuk. Allah men seli roho werehon arimanowen teko lalep peruk ane ambiyangma Allahn olok haruk ane inam atuk.

²⁴Ap eke inggik pisala reberuk lit werehon ariyen tung atuk, eke inggikmu yinggiloho forohoman eneg anggengge eleg atuk.

²⁵Ap san indiyen anggolo og isaruk halug ahum ouk toho naruk laruhu. Ap san ori let eneptuk halug at hebeloho let turuk lamuhup.

²⁶Ap san suburu obok li suburu ayeg waroho ap og isa fug angge andog toho umbat taruk halug aben huluwap tuhup. Ap san og isaruk halug Allah unuk fam hi ruhup.

²⁷Ap san fano ane timin ulug yami rurukon arimano fahet aben fano peruk. San siyag ane timin ulug yami rurukon arimano alem siyahon unubam aruhu.

²⁸Tung nahun welahireg nungge-nungge nubam aruhu fug ulug wenggel harukon arimano e inggila loloho wamburuk hag toho longgo uhup. Allah fahet enekol harukon arimano e inggila yum turukon hag toho welamuhup.

²⁹Ap san ibam haltuk eleg halug anggengge obog toho eleg aruhumu homhomo eneg inggikmu seneg laruhu. At indi anggat teg elehen ap indi anggat tehon amingmingangge aruhu.

³⁰Ap Allah fahet akol toho wereg lit fano ane turukon eke e anggen aben narukmu war atuk eleg ahen hag toho wereg. At inindi anggat toho werehonen ap anggolo war amuhup tohon ulug windat eneptuk.

³¹Ap Allah fahet enekol harukon arimano kinangma weregma Allahn onggo og isaruk laruhu. At enembol yig utug siyag ane turukon oho onggo og isahureg unusuhu.