Read Angguruk Yali AMSAL 12 Bible Online

AMSAL 12 - Angguruk Yali bible

AMSAL 12

¹Ap san mun ane man ane milal tarukon fahet fano peruk halug aben komo eneptuk ane fahet oho fano peruk laruhu. Ap inindi anggat teg elehonen eneg komo fahet ninirim peruk.

²Ap fano ane turukon arimano NINIKNI Allahn indi enesug. Nolok ane timin ulug wenggel haruk inap arimano alem angginon unubam umbuhu.

³Ap Allah fahet enekol harukon arimano unumanggen kinang apma wamburukmu yuk turuk eleg. Onolok ane turukon arimano inine roho unduhuk lamuhup fug.

⁴Ap uhe ubabut fanowon eke ahun fahet aliliyangge unggulmu lahaptukon hag toho wereg. Uhe inggali ane turukon eke yowil uwagma amben siyag turukon hag toho wereg.

⁵Allah fahet enekol haruk inap arimanowen alem obog toho hal amag ulug wenggel haruk. Allah enembol yig utuk inap inindimuwen nonori enele ying enebul ulug eneg wenggel haruk.

⁶Allah men hili roho wereg inaben enele uruk lit yebangge yep turuk. Allah fahet enekol haruk inaben enele uruk lit ap windat eneptuk.

⁷Ap onolok ane turukon arimano fuk toho yingguruk lit eleg amuhup. Allah fahet enekol haruk inap inibam tukum tuk fug angge unduhuk laruhu.

⁸Ap eke indimuwen fuki roho wenggel haruk halug aben wel turuk. Inindi piren tehon arimano aben apmayap eneptuk.

⁹Ap toron famen yabuk wit tarukon ari fano. An suwon welahi ulug awelwel taruk famen suburu elehen na fug tehon ari siyag.

¹⁰Allah fahet enekol haruk inaben enembohom fano fet enesug. Allah fahet ninirim perukon arimanowen enembohom inindi isa fug angge siyahap eneptuk.

¹¹Ap san yabuk wituk halug suburu ahum toho naruk laruhu. Ap inindi anggat teg elehon arimanowen alem elehon eneg yami ril laruk.

¹²Allah men seli roho wereg inaben aben angge hilarukon anggolo forohoma yet isalug niren oho foroho lala peruk. Allah fahet enekol haruk inap unumanggen kinang apma wamburuk lit anggen anggolo uruk.

¹³Ap Allah enembol yig utukon arimanowen enele uruk lit yebangge yep tarukon elma luhur atuk. Allah fahet enekol haruk inap arimano koloweg wilip atuk.

¹⁴Ap san fano ane eneg uruk halug ahum toho naruk laruhu. Ap ininggik fam turuk ane hikit toho onggo hilaruk lamuhup.

¹⁵Ap inindi sohu rehon arimano un ke laruk anggeyen fano laruk lahi peruk. Ap inindi anggat tehon arimano aben komo eneptukon fano holtuk.

¹⁶Ap indi anggat tehon fam ap ekeyen inggaliyap turukmu indimu ahe laharukon ino hondo reberuk. Indi sohu rehonen undama ahe laharuk ane hondo ruk fug angge o ino sambil oho wiliptuk.

¹⁷Ap enele tem toho uruk ane ariyen mun ane man ane alem obog toho hal atuk. Tem toho nilen hihi urukmen enele si uruk ane ariyen alem haloho emberuk ane siyag atuk.

¹⁸Sibiling-sibiling ane urukon ari karog ap inindimu hak eneptukon hag toho wereg. Inindi anggat teg lit enele uruk ane ari ap hihir eneptukon hag toho wereg.

¹⁹Ap ekeyen ele si ane uruk halug un ane irisi ulug folo-folo fag atuk. Enele tem toho urukon mondabi welaruhu.

²⁰Nonolok ane tul ulug wenggel haruk inap ininggarehen enele ying taruk. Ap hili roho werehon mangno amag ulug komo eneptukon arimano enehiyeg toho welamuhup.

²¹Ap Allah fahet enekol harukon arimano alem angginon misig oho unubam atuk laruhu fug. Enembol yig utukon arimano alem angginon eke hag eke hag unubam aruhu.

²²Ap enele si ane urukon fahet NINIKNI Allahn nirim peruk. Enele tem toho ulug awiya waruk elehon arimano indi enesug.

²³Ap inindi anggat tehon arimanowen mun ane man ane fahet onoluk teg ane unundama hirako foroho. Inindi sohu roho werehonen ket-ker ane wenggeltukon enele hi roho ap hiyag isaruk.

²⁴Ap yabuk lisag toho witukon arimano palimu atuk lit ap winon onowesi roho welamuhup. Yabuk inirim toho turukon arimano ap enemingmingangge amuhup.

²⁵Enekol haruk ane ariyen ap inindi angginap eneptuk. Aben enele fano roho unubam uruk lit inindi enehiyehap eneptuk.

²⁶Ap Allah fahet enekol harukon arimanowen kalem fanowon onori hiyag isaruk. Allah men hili roho werehon arimano un ke laruk lit linggik-longgo uruk.

²⁷Ap enesukun siyahon arimanowen pak misig oho wat taruk eleg. Enesukun fanowon arimano mun angge man angge fanowon ininggikmu atuk.

²⁸Ap Allah fahet enekol harukon arimano fano onoluk welamuhup ambeg laruk. Kalem fanowon larukon arimano war amuhup fug.[3]