Read Angguruk Yali AMSAL 13 Bible Online

AMSAL 13 - Angguruk Yali bible

AMSAL 13

¹Malik indi anggat tehonen ikniyen komo urukon holtuk angge famen malik ubabut siyahonen komo urukon holtuk eleg.

²Ap enele fano roho urukon fano-fano angge ininggikmu atuk angge famen ap enele si ane uruk inap nonolok ane eneg tila peruk lit wereg.

³Nele fano ane eneg imin perukon ino ebe fano welaruhu angge famen ele alog toho urukon ino alem siyahon ubam aruhu.

⁴Yabuk wituk elehonen mun angge man angge ninggikmu welalep peruk angge famen inggikmu atuk eleg. Yabuk sat toho witukon mun angge man angge ninggikmu alep perukon obog toho inggikmu atuk.

⁵Allahn peruk ane turukonen nele si ane imin fug peruk angge famen Allah enembol yig utukonen siyag ane eneg turuk lit inggarehen inggaliyap taruk.

⁶Ap san Allahn peruk ane hikit toho turuk halug Allahn foroho lit weregma siyag ane turuk laruhu fug angge famen ap san Allahn peruk ane windal isaruk halug siyag ane turuk lit inggareg siyahap tahu.

⁷Ap misihen an fahet aben tung ahun wereg pukag ulug turuk angge famen anggengge wereg eleg. Ap ekeyen an fahet anggengge elehon pukag ulug turuk angge famen anggengge anggolo wereg.

⁸Ap misig anggengge anggolo werehon aben wabul peruk halug an nebe siyahap nabuk nowen ulug uang og isaruk angge famen ap anggengge elehon fam uang og nisamihin fug halug huwabul ulug heng tuk fug teg.

⁹Allahn peruk ane hikit toho turukon iral umbagpag fanowon hag toho wereg angge famen Allahn peruk ane windal isarukon iral warehon hag toho wereg.

¹⁰Unubabut hemet toho turukon arimanowen yik aptuk lit eneg wereg angge famen inindi anggat toho werehonen komo eneptuk ane fano holtuk.

¹¹Anggengge folo-folo ap inggikmu atukon arimano folo-folo eleg atuk angge famen anggengge orog-orog palu rarukon arimano nin sebe roho anggolo atuk.

¹²Indimuwen telep peruk ane teko laruk eleg halug indi siyag atuk angge famen telep peruk ane hikir atuk halug at ino ahiyehen ine anggolo atuk.

¹³Ap san NINIKNI Allah ele osokowa feseruk halug at ino inggarehen siyahap taruk angge famen Ap san Allahn umalikisi komo enepfahon fahet indi anggat toho wenggel haruk halug Allahn onggo og uruhu.

¹⁴Ap indi anggat toho werehonen milal eneptuk ane ariyen ap fano onoluk welam teg. Aren komo eneptuk ane inowen ap yebangge elma kuhupteg war amuhup tohon ulug windar eneptuk.

¹⁵Inindimuwen fuki roho wenggel haruk inap fahet aben fano peruk angge famen enele si ane uruk inap arimano siyag amuhup.

¹⁶Ap inindi anggat toho werehonen nungge-nungge timin ulug tam wenggel harukon eneg turuk angge famen ap inindi anggat teg elehonen fuki roho wenggel ha fug angge sohu-sohu ane eneg turuk.

¹⁷Ap ekeyen ap eke monde feruk lit hiyag utuk ane hikit toho turuk eleg halug ap siyahap eneptuk angge famen at inowen hiyag utuk ane hikit toho turuk halug alem fano roho hal atuk.

¹⁸Ap san milaltuk ane nirim peruk halug anggengge eleg atuken aben inggaliyap turuk lamuhup angge famen ap san komo ruruk ane fahet ahiyeg toho welaruhu halug aben wel turuk lamuhup.

¹⁹Inindimuwen telep perukon hikir atuk halug enehiyeg hahup angge famen inindi sohu roho werehonen siyag ane embeserukon fahet ninirim peruk.

²⁰Ap san ap inindi anggat toho werehon men mangno roho welamuhubon arimano ininggareg inindi anggar atuk laruhu angge famen ap san ap inindi sohu roho werehon men mangno roho welamuhubon arimano siyag amuhup.

²¹Ap siyag ane turukon arimano alem angginon eke hag eke hag unubam atuk. Allahn peruk ane hikit toho turukon arimano alem fanowon eneg unubam atuk.

²²Ap unubabut fanowon enenggengge lin isarukon arimano iren endebuhubonen endebuhubon arimanowen hilaruk lamuhup. Siyag ane turukon enenggengge arimano ap Allah fahet enekol harukon ngi amuhup.

²³Suburu yatuk ambeg anggolo werehen ap enenggengge elehonen oho enehum toho na reg lalep angge famen aben enenggengge hilalug naruk lit enebe miyaloho hik isaruk.

²⁴Ap san umalik indi reg lit ubabut siyag aruhu rohon ulug komo ruruk. San sabiyap alem seneg elehon inowen umalik oho indi reg eleg.

²⁵Allahn peruk ane hikit toho turukon arimano enehum ouk toho naruk. Aren peruk ane suhan isarukon suburu obok haruk.