Read Angguruk Yali AMSAL 16 Bible Online

AMSAL 16 - Angguruk Yali bible

AMSAL 16

¹Ap kinangmon inindimuwen nungge-nungge tul ulug wenggel haruk angge famen obog-obogma NINIKNI Allahn eneg kong turuk.

²Ap kalem laruk lit ininggarehen fano laruk lahi peruk angge famen NINIKNI Allahn ap inindimuwen wenggel haruk ane fuki roho kim isalug wal isaruk.

³Haren tu men ari men timin peruk lahenon NINIKNI Allah inggikmu emberuk laruhunmu haren timin peruk lahenon hikir aruhu.

⁴Mun ane man ane NINIKNI Allahn teberukon Aren tam pibag ane hikit toho teko laruk. Ap Allah enembol yig utukon arimano oho NINIKNI Allahn tam pibag ane hikit toho ambiyangma siyag amuhup.

⁵NINIKNI Allahn ap inindimuwen hemet til larukon fahet nirim peruk lit we tem toho alem angginon unubam umbuhu.

⁶Ap ekeyen Allah men ori men ininggik ahandip toho wereg lit indi enesug halug NINIKNI Allahn yet halug aren siyag ane turukon ambolmayap tuhu. Ap san At fahet enekol harukonen siyahon an nubam tag aruhu rohon ulug wenggel haruk.

⁷NINIKNI Allahn ap eke laruk ane yet haruk lit fano peruk halug Allahn ili wamin ulug at men seli roho werehon arimano inindi kahal enebuhumu siyahap tul peruk ane embeselug are men mangno amuhup.

⁸Ap ekeyen Allahn peruk ane hikit toho yabuk witukmu anggengge we tot inggikmu atukon ino palimu regma ap enele ying eneptuk lit enenggengge anggolo ininggikmu atukon apma reg.

⁹Ap kinangmonen kema lamin ulug wenggel haruk angge famen o kema-kema laruk ane NINIKNI Allah inggikmu eneg wereg.

¹⁰Allahn milaltukmu ap suwon raja inowen unggum haloho emberuk. Indi nonghong uk fug angge ele kong toho uruk.

¹¹NINIKNI Allahn anggin wirim haruk angge arimano wal turuk lit An nangge arimano aben hareyap tuhup fug ulug kong toho imbibag.

¹²Mun ane man ane fano haloho emberuk ane ariyen ap suwon inine atuk. Ari fahet unumalikisiyen siyag ane turukon fahet ap suwonen ninirim peruk.

¹³Ap enele tem toho urukon fahet ap suwonen fano peruk. Pikir ane eneg urukon inindi enesug.

¹⁴Ap suwonen onolok haruk lit ap pinggi unusuk teg. Indi anggat teg ahun ekeyen eneg ap suwonen unusimin peruk ane umbusukag ulug indi yuwahap tuk teg.

¹⁵Ap suwon orohole seleg tehon ino hina osit kinang ahaluweyap turukon hag toho wereg. Ap sa aluke yig utukon arimano fano onoluk welamuhup.

¹⁶Umbagpag turuk angge emas men perak men foroho ane apma regma inindi anggar atuk lit alem obog toho onoluk teg ane palimu reg.

¹⁷Ap inindi pikit toho wenggel harukon arimanowen siyag ane timin fug ulug kalem pikiron eneg laruk. Ap san kema lamin ulug fuki roho kim hil larukon arimano fano onoluk welamuhup.

¹⁸Atamtam ap inindimu winik-wonog toho turuk angge famen fobik mako wambuhup.

¹⁹Inindi apma roho wereg lit inilaheg toho wereg inap inibil atukon ari fano regma palimuwap taruk inap men ambiyeg wereg lit yoholiyangge hilaruk angge fibir atukon ari siyag.

²⁰San aben milal eneptuk ane fuki roho holtukon arimano fano welamuhup. San NINIKNI Allah fam wenggel harukon arimano enehiyeg toho welamuhup.

²¹Ap ekeyen fuki roho wenggel halug ele hiyag isarukmu aben ele fano holtuk lit ap tu alem fano haloho emberukon wereg uruk.

²²Ap inindi anggat teg ane ari ik eleruk fanowon hag toho weregma ik ino naruk inap onoluk welamuhup. Ap inindi anggat teg elehon arimanowen sohu-sohu ane turuk lit alem angginon unubamap taruk.

²³Ap inindimuwen fuki roho wenggel halug enele uruk lit onori fano milal eneptuk.

²⁴Ap enele fano uruk ane ari kin ahaluwe unduk fanowon hag toho wereg lit ap inindimu ouk harukon hihir eneptuk.

²⁵Ap eke kalemma laruk lit pikit fanoma laruk lahi perukmen war atuk ambeg laruk.

²⁶Suburu obok hahuk tohon ulug enehumen mingming eneptukmu yabuk inine roho wituk.

²⁷Ap unubabut onolokon arimanowen nonori yebangge elma luhur amag ulug kinang habuloho sap enesug lit enembilikmuwen indok ambulpul turukon wiliptuk.

²⁸Ap enele si urukonen yik aptuk ane suwap turuk. Enebug il larukonen ap eke ori men hiliyap eneptuk.

²⁹Ap onolok ane turukon arimanowen ambiyeg lulen maniyek ulug onori inindi kahal eneptuk lit kalem siyahon hondog eneplug laruk.

³⁰Haren yet harukmen ap ekeyen il humbut turuk lit ambilik putuk turuk halug at indimuwen nolok ane timin peruk lit turuk puhun.

³¹Allah fam wenggel harukon arimano amusun toho weregman eneg sabal atukmu eneliliyangge ap suwonen wan tehon hag toho hubulu wilip atuk.

³²Ap indi imbik wamburukon palimu regma ap ahako roho turukon apma reg. Ap indimuwen ket-ker ane wenggeltuk angge famen apmayap turukon ari palimu regma o pumbuk suwon apmayap turukon ari apma reg.

³³Nanggintul ulug aben enehangge hik turuk angge famen mun ane man ane teko laruk ane NINIKNI Allah inggikmu wereg.