Read Angguruk Yali AMSAL 17 Bible Online

AMSAL 17 - Angguruk Yali bible

AMSAL 17

¹Inindi yuwag toho wereg lit suburu komuk toho narukon palimu regma suwahal uruk lit wam seiyon narukon apma reg.

²Amingmingangge ekeyen ikni iyabuk fano wituk halug ikniyen amloho asukun siyahon ubalma kilabuhu. Inikni war atuk halug aren lin isahu angge arimano umalikisi winon men amingmingangge ino men fibir amuhup.

³Melei il yanggo amag ulug indokman wal haruk angge famen ap inindi fano wereg ano ulug NINIKNI Allahn wal isaruk.

⁴Ap unubabut onolokonen enele siyag toho urukon fahet enehiyeg haruk. Enele si uruk inaben onori enebug uruk ane fahet fano peruk.

⁵Ap san enenggengge elehon ininggaliyap eneptukon arimanowen it wal enepfag ahun apmayap turuk. Ap san alem siyahon onori unubam atukon fahet enehiyeg haruk halug ininggarehen alem angginon unubam umbat tahup.

⁶Iniknisi it unumalikisi fahet eneliliyangge hag toho wereg. Unumalikisiyen ondohowon unumbusag fahet aliliyangge wereg.

⁷Ap indi sohu roho werehon ekeyen ele fano roho uruk eleg. Ap suwon ekeyen ele si ane uruk halug ari siyag.

⁸Ap san ap winon onggo og isaruk halug indimuwen wenggel haruk lit onggo ari feneyen mun ane man ane teko lelep peruk lahiyon hikir atmisi peruk.

⁹Ap san oriyen siyag ane turukon ambolmayap turuk halug oriyen inindi reg lamuhup. Ap san oriyen siyag ane turukon suwap turuk halug ori men hili atuk.

¹⁰Ap fuki roho wenggel harukon aben komo rurukmu fano holtuk. Indi sohu roho werehon e paleg fam teng uhanam watukmu oho holtuk eleg.

¹¹Ap ubabut olokonen nori enele ying enepmin ulug yami rurukmen eneg wereg. Weregman Allahn war amag ulug ot eke ambeg monde fik waruhu.

¹²Olomene umalik longgo urukmu indi olok toho weregma ambi atukon ari se regma ap indi sohuwon men ambi atukon ari anggin teg.

¹³Ap san fano ane turukon fahet siyag ane fam ayeg watuk halug alem siyahon eke hag eke hag at uhe malik men unubam atuk ane eleg aruhu fug.

¹⁴Ap san yik aptuk ane ak turuk halug ik larehon husuruk hag toho turuk. Ari fahet alem su am fugmu hinggik kilabuhun fug.

¹⁵Siyag ane turuk inap ili og eneptuk ane men alem elegman un ane unubam lombohap eneptuk ane men NINIKNI Allahn alem pirenet nirim peruk.

¹⁶Nungge fahet ap sohu roho werehon ekeyen an milal nabuhun ulug ap eke onggo og utuk? At inowen milaltep halug oho indi anggar alep fug.

¹⁷Areyen likiya hupmu are indi haruk. Alem angginon wereg halug it-it let-ler atuk.

¹⁸Ap eke ubam paleg angge wereg halug ap indi sohuwonen eneg haren paleg lahenon ari anden paluhuk ulug sali ubam emberuk.

¹⁹Ap san yik aptuk ane fahet ahiyeg haruk halug alem ubamap tarukon fahet fano peruk. Ap san ibam su roho wit taruk halug ibam halog tebeseruk ane yami ruruk.

²⁰Ap indi hareyon fano ane ubam aruhu fug. Ap ambilikanggen handuhal tehon mako wambuhu.

²¹Ap san malik indi sohuwon eke indag taruk halug indi anggin toho welaruhu. Malik inowen ket-ker ane eneg turuken ikni ahiyeg toho welaruhu fug.

²²Inindi enehiyeg toho wereg ane ariyen ouk unubam werehon hihir eneptuk. Inindi anggin toho wereg ane ariyen unuwag lilog atuk.

²³Ap ekeyen alem haltuk ahun an nibil amag ulug uang hirako og utukmu senetukon inowen alem pikiron hareyap tebesuhu.

²⁴Ap fuki roho wenggel harukonen mun ane man ane fahet wenggeluk fug angge nindi anggar alep peruk ane eneg wenggel haruk. Ap indi sohu roho werehonen alem ekeyon-ekeyon fahet yat toho wenggeltil laruk.

²⁵Malik ket-ker ane turukonen ikni indi siyahap turuk lit isinga indi angginap turuk.

²⁶Ap siyag ane turuk elegman alem unubam emberuk ane ari siyag. Ap inindi pikit toho werehon unusuruk ane ariyen alem haloho emberuk ane siyag atuk.

²⁷Ap inindi anggat tehonen nele imin ano ulug wenggel halug enele uruk. Ap fuki roho wenggel harukonen inindi imbik wamburuk.

²⁸Ap indi sohu roho werehonen ele elep fug halug aben at fahet indi anggat teg pelep.