Read Angguruk Yali AMSAL 18 Bible Online

AMSAL 18 - Angguruk Yali bible

AMSAL 18

¹Ap enemumu werehon arimanowen ininggareg fahet eneg wenggel haruk. Iren ap obog tohowen fano peruk ane enehum ke het toho windal isaruk.

²Ap inindi sohu roho werehonen inindi anggar atuk ane fahet inirim peruk lit enemuwen wenggel haruk ane eneg wiliptuk.

³Siyag ane turukon men ininggali haruk ane men ambiyeg laruk. Ap enebug uruk ane men wasubag sup eneptuk ane men iraroho waharuk.

⁴Aben enele uruk ane ik ahum hik tehon hag toho wereg. Ap inindi anggat teg lit milal eneptuk ane ari ik eleruk fanowon hag toho wereg.

⁵Ap siyag ane turukon inibil atuk lit siyag ane turuk elehon alem unubam emberuk ane ari siyag.

⁶Ap indi anggat teg elehonen ele uruk ane ariyen yik aptuk ane lahaptuk. Ambiliken ele hemet toho urukon ariyen watuk ane heng taruk.

⁷Ap indi sohu roho wereg lit uruk ane ariyen inggareg siyahap taruk. Ambilikanggen fam yebangge yep tubat taruk.

⁸Ap enebug uruk ane kin ahaluwe hag tegma aben hol haruk lit unduk fano ulug naruk.

⁹Ap yabuk irim toho turukon men mun angge man angge siyahap turukon men owe ot hag toho wereg.

¹⁰NINIKNI Allah unuk o yaron ap seliyon kuk fug tehon hag toho wereg. Allah fam wenggel harukon arimano o ino elma hirag arik lalug inindi yuwag toho welamuhup.

¹¹Tung inap inindimuwen wenggel haruk lit, ”An nanggengge arimanowen elehet hag toho walinggoho kilap nasuhen nindi yuwag toho welahi,” peruk.

¹²Atamtam ap ininggarehen palimuwap taruk angge famen fobik mako wambuhup. Atamtam ap ininggarehen apmayap taruk angge famen fobik ununuk palimu aruhu.

¹³Ap san oriyen urukon holuk fug angge ele uruk halug indi anggat teg eleg ane inam atuken inggali hahu.

¹⁴Ap indi wirik toho werehonen ebe ouk waruk ane ha ruk teg. Indi ouk toho wereg ane ap san ha ruk teg?

¹⁵Ap fuki roho wenggel harukonen nindi sebe roho anggar aruhu perukmen eneg wereg. Mun ane man ane fahet milal naptukmu holte ulug isanggowen heng uruk.

¹⁶San ap suwon fano-fano angge og itmin ulug walug waharukmu at inowen sok hut uruhu.

¹⁷Alem haltuk ambehen tam suwahal uruk ahun ino fahet aben tem uruk peruk angge famen fobik at men seli roho wereg ahunen alem ubam werehon yami ruhu.

¹⁸Ap inine roho werehonen it-it suwahal urukmen warukmen eneg wereg halug sa palimu atmisi ulug enehangge hik turuk lit alem haloho umbuhup.

¹⁹O pumbuk elehet ineyon walinggoho ohowon pisan toho kurukon se regma ap areyen indi siyahap tirisiyon ambeg laruk ane ari anggin teg. Suwahal uruk lit ap are men hili atukon ari sok hembit tehon hag toho wereg.

²⁰Ap ambilikmuwen wilip atukon ari hebeloho ahum ouk toho naruk.

²¹War atuk ane oho onoluk wereg ane oho ap enembilikmu wereg. Enembilikmuwen fano ane wilip atukon ari e anggen fanowon hag toho naruk lamuhup.

²²Ap san hiyap eke yami roho hilaruk halug fano ane ubam atuk. NINIKNI Allahn at indi haruk lit hiyap ino og utuk.

²³Ap ine elehonen let nabin ulug ele ilaheg toho urukmu tung ahunen hebeloho ele olok toho hiyag utuk.

²⁴Ap ekeyen are irim teg lit ambol yig utuk. Ekeyen are indi anggolo reg ane men owe ot yuhonen inindi haruk ane men wirim teg eleg.