Read Angguruk Yali AMSAL 20 Bible Online

AMSAL 20 - Angguruk Yali bible

AMSAL 20

¹Ik olokon naruk inap arimanowen ininggali eleg toho enele ya nga uruk. Ik olokon nalug nenek turuk inap arimano inindi anggar atuk eleg.

²Ap suwon ekeyen olok haruk lit olomene olokonen ele ngu ruruk hag toho uruk. Ap san indi olokap turuk halug at ino inggarehen wat taruk hag toho turuk.

³Ap san ap yik aptuk ambehen inggik kilaptuk eleg halug aben fano peruk lamuhup angge famen ap inindi anggat teg elehonen yik aptuk ane fahet enehiyeg toho wereg.

⁴Ap enesukun siyahon arimanowen eiyangge yatuk li yabuk wit taruk eleg. Ebe yahaltuk li yami rurukmen nungge-nungge wereg eleg.

⁵Ap inindimuwen wenggeltuk ane kiling ele yaron mondabi apma ik yenggelehon hag toho wereg angge famen ap indi anggat tehonen hinanggoho lisuk teg.

⁶Ap anggolowen enele uruk lit, ”Nit ap let eneptuk ninap welahe,” ulug wel taruk angge famen we tik-tem toho ap indi enesuhon eke san yet harikip?

⁷Ap misihen Allahn peruk ane hikit toho eneg turuk halug umalikisi enehiyeg toho wereg.

⁸Ap suwon alem haltuk ambeg heriyeg lit san siyag ane tirisi ulug ap obog toho yet enesug.

⁹Ap san ele uruk lit, ”An nindi hal atikikmu siyahon nubam wereg eleg,” uk teg?

¹⁰Nungge-nungge ayeg waroho waruk lit wirim turukmen apma reg angge famen yatma laha ulug enele si urukon fahet NINIKNI Allahn nirim peruk.

¹¹Malik enebe toron famen unubabut fano reg lit inindi pikit toho wereg ano ulug iren turuk ane ariyen inamap turuk.

¹²Inisanggo fam holtuk ane men inilen yet haruk ane men NINIKNI Allahn wal tibag.

¹³Hat hanggengge eleg am nowen amusun toho nohoruk lam fug. We tot noholug hil wirik atuk halug hahum ouk toho naruk laruhun.

¹⁴Ap ekeyen ayeg waroho wamin peruk lahi angge tu siyag uruk angge famen ayeg waroho walug laruk lit fanik-fano angge wihi ulug awelwel taruk.

¹⁵Emas umbagpag turukon men helep ili faya rurukon men anggolo wereg angge famen ap eke indi anggat teg lit ele uruk ane ari aliliyangge mondabi fanowon hag toho wereg.

¹⁶Ap sa indi sohu roho wereg lit ap o winamon ubam palehon anden paluhuk ulug sali emberuk angge famen waruk eleg halug sum aren tohon ilamna oko foroho lamuhup.

¹⁷San ap enele ying eneptuk lit hilaruk angge arimano narukmu unduk fano peruk angge famen fobik ambilikmu helep iliyangge eneg welaruhu.

¹⁸Aben komo eneptukmu hol halug eneg tul peruk ane hikir atuk. Tog aptuk lit ke roho timin ulug tam fano roho wenggel halug lahun.

¹⁹Ap winonen holuhup tohon ulug hirako uruk angge famen onori enebug il laruk inaben ap obog tohowen holukag ulug hi roho hiyag isil laruk. Ari fahet enembilik husig inap men ambiyeg welamuhup fug.

²⁰Ap san ikni men isinga men huluwap eneptuk halug iral hubanggo war atuk hag toho war aruhu.

²¹Ikniyen lin isaruk angge amloho ekeyen folo-folo ilmig taruk halug fobik siyag aruhu.

²²Ap ekeyen siyag ane hubam turuk halug haren ayeg wabuk fug angge NINIKNI Allahn an windat nabuhu ulug nangno reg laruhun.

²³Anggin wirim turuk angge fam wirim turukmen anggin eleg angge famen anggin teg ulug enele si urukon fahet NINIKNI Allahn nirim peruk.

²⁴O kema-kema laruk ane NINIKNI Allah inggikmu wereg. Nangginoho ap ekeyen an arima lahuk ulug oluk teg?

²⁵NINIKNI Allah fahet nungge-nungge umbuhuk ulug fuki roho wenggel halug eneg sali umbuhun. Wenggel ha fug angge sali emberuk lit yebangge elma kuhun tohon!

²⁶Ap suwon indi anggat tehonen ap san siyag ane tirisi ulug oluk teg lit indi isa fug angge alem angginon unubam emberuk.

²⁷Ap enehime iral NINIKNI Allahn ap unundama emberukon hag toho wereg lit mun ane man ane inindimu hirako wenggel harukon obog toho selehap turuk.

²⁸Ap suwon raja indi wirik toho wereg lit umalikisi indi enesug halug ine roho umalikisi fet enesug laruhu.

²⁹Ap kabiniyon inine wereg ane ari eneliliyangge wereg hag toho ap sabalon fahet onoruk hubulu atukon ari suwahe hag toho wereg.

³⁰Mep toho unusuruk ane ariyen siyag ane ap unubam werehon puhunap eneptuk. Ouk haruk ane ariyen inindimu hirako wenggel haruk ane fano atuk.