Read Angguruk Yali AMSAL 21 Bible Online

AMSAL 21 - Angguruk Yali bible

AMSAL 21

¹Aben kinang habuloho ik laruk ke haltuk hag toho NINIKNI Allahn ap suwon raja Anden peruk lahi ane hikit toho tukag ulug inindi haltuk.

²Ap obog tohowen ininggareg laruk ane fahet fano laruk lahi peruk angge famen NINIKNI Allahn inindimu wenggel haruk ane fuki roho kim isalug wal isaruk.

³NINIKNI Allahn aben fano ane turukon men alem pikit toho haltukon men palimu regma wam waroho hubu lahaptukon apma reg peruk.

⁴Allah fahet ninirim perukon arimano onorohole hemet toho, inindimu winik-wonog toho wereg lit siyag ane eneg til-wil laruk.

⁵Nungge-nungge timin ulug fuki roho wenggel haruk lit yabuk lisag toho witukon ininggikmu anggolo aruhu. Fano roho wenggel ha fug angge yabuk fululung toho witukon arimano ininggikmu eleg angge welamuhup.

⁶Enele si ane uruk inaben mun angge man angge hilalug inibam imbik kuruk angge arimano ap war atukon sat eleg atuk hag toho folo-folo eleg aruhu.

⁷Allah enembol yig utuk inap arimanowen Aren tuk teg ane fahet imbibahon ninirim ulug onolok ane eneg turukmen eneg ininggareg siyag amuhup.

⁸Ap siyag ane turukon arimano funggalem mase ril larukmen eneg wereg. Ap inindi fanowon arimanowen pikir ane eneg turuk.

⁹Hiyap suwahal eneg urukon men o misigmu wereg ane ari siyag. Ahun hinawimu lahalug amumu wereg ane ari fano.

¹⁰Allah enembol yig utukon arimanowen onolok ane tul peruk ane eneg wenggel haruk lit onori inindi enesug lam fug angge siyahap eneptuk.

¹¹Ap ele winik-wonog toho urukon alem ubam emberukmu inindi sohu roho wereg inaben yet halug inindi anggar aruhu. Ap fuki roho wenggel harukon eke aben milaltukmu aren oho fano hol haruk lit indi anggar aruhu.

¹²Allah mun ane man ane alem obog toho haltukon inowen At enembol yig utuk inap inibamen turuk ane fuki roho kim isalug mondabi siyag amag ulug hik isa wambuhu.

¹³Ilaheg toho wereg ahun ekeyen ele ine roho let nabiyek urukmu ap san holtuk eleg halug fobik aren oho let nabiyek urukmu ap misihen oho holuhu fug.

¹⁴Ap ekeyen hat fahet olok haruk halug haren fano-fano angge eke hirako og uruhunmu ahummu het-pet haruk ane ino eleg aruhu.

¹⁵Siyag ane turuk eleg inaben alem haloho emberukon fahet enehiyeg haruk angge famen siyag ane turukon arimanowen enekol haruk.

¹⁶Inindi anggat teg inap laruk abunggalem embeselug un ke larukon ino ap warehon enehime wereg ambeg lahureg kel taruk laruhu.

¹⁷Ap san likiya hupmu nenehiyehen yunggultuk lamuhuk peruk halug inggikmu eleg angge welaruhu. San wam ahaluwe lahaptukon men ik anggur narukon men fahet eneg wenggel haruk halug anggengge eleg aruhu.

¹⁸Nonori inindi fanowon siyahap enebul peruk inap arimano fobik onori unubalma amuhupmu nonolok ane unubam tuhuk perukon ari ininggareg unubam aruhu.

¹⁹Lekma yug toho wereg ane ari fano regma uhe likiya hupmu ahummu het-pet toho suwahal urukon men ambiyeg wereg ane ari siyag.

²⁰Ap inindi anggat tehon arimanowen unduk fano angge men amben fano angge men anggolo inibam foroho lit wereg. Inindi sohu roho werehonen obog toho misihim eneg mag-mag pil isaruk.

²¹San ap indi enesug lit pikir ane eneg unubam turuk halug aben hebeloho pikir ane ubam turuk lit unuk wel turukmu amusun toho oluk welaruhu.

²²Ap indi anggat tehon ekeyen o pumbuk enehako roho turuk inaben tohon ilmig ta reg. Elehet walinggoho ohowon ap seliyon kuk fug teg perukon ino halog toho pin kuruk.

²³Ap san aben nuwabuhup tohon peruk halug nambilik fam fano ane eneg imin ulug sap teg laruhu.

²⁴Mun ane man ane fahet inda yako apmayap turuk lit ele hemet toho urukon inowen an eneg palimu welahi ulug winik-wonog uruk.

²⁵Ap asukun siyahonen mun angge man angge ninggikmu alep ulug wenggel haruk angge famen inggiken nungge-nungge tuk fug angge weregman eneg war aruhu.

²⁶It ambingga roho werehonen likiya hupmu tu men ari men nit ala perukmen eneg wereg. Allahn fano peruk ane turuk inap ininggik pisila roho wereg lit enenggengge ap obog toho og isarukmen eneg wereg.

²⁷Ap siyag ane turukonen wam waroho hubu lahaptukon fahet NINIKNI Allahn nirim peruk. Nolok ane timinen Allahn nineyap nabukag ulug hubu lahaptukon fahet Aren olok anggolo haruk.

²⁸Alem haltuk ambehen ap ele si ane urukon fam hele imbisin uruk lamuhup angge famen alem ino fahet fuki roho hol halug uruk ahun fam haren hele obog toho imihin ulug hiyag umuhup.

²⁹Ap siyag ane turukon orohole hik teg angge famen aben an nubahet ubabut fano pukag ulug orohole seleg teberuk. Siyag ane turuk eleg inap arimano lul peruk ke enembong se roho laruk.

³⁰Ap inindi anggat teg lit fuki roho wenggel halug komo uruk ane ariyen NINIKNI Allahn peruk ane apmayap tuk fug teg.

³¹Aben ap seliyon apmayap tul ulug wam kuda fam lahalug laruk angge famen palimu atuk ane ari NINIKNI Allah inggikmu wereg.