Read Angguruk Yali AMSAL 22 Bible Online

AMSAL 22 - Angguruk Yali bible

AMSAL 22

¹Ap eke fahet aben fano perukon palimu regma anggengge anggolo foroho ane apma reg. Ap eke fahet aben inindi reg ane fano anggolo rehen umbagpag turuk angge emas men perak men wirim teg eleg.

²Enenggengge werehon men elehon men NINIKNI Allahn ambi roho wal enepfag.

³Ap inindi anggat toho werehonen alem siyahon waharukmu yet haruk lit an nubam aruhu rohon ulug hirag atuk angge famen ap inindi anggat teg elehon arimanowen hirag am fug angge larukmen eneg siyag atuk.

⁴Ap ininggareg apmayap taruk lit NINIKNI Allah fahet enekol toho wereg inap arimano enenggengge anggolo atukmu ununuk palimu roho wereg lit amusun toho welamuhup.

⁵Hare ane turuk inap laruk ke alog-alog angge men hele salog-malog angge unusukag ulug emberukon men anggolo wereg. War aruhuk tohon ulug ke ari laruk laruhun fug.

⁶Malik ebe totma fano roho wereg ane milaltuk laruhun halug at ino su aruhureg fano weregman eneg sabal aruhu.

⁷Tung inap arimanowen ap enenggengge elehon apmayap eneptuk. Areyen angge paleg ahun ino are amingmingangge hag atuk.

⁸Ap san alem siyahon yatuk halug anggen oho siyahon tahantukmu uwanggun ap unusurukon ino fala roho lin uhu.

⁹Ap inindi fanowonen suburu kuroho ap enenggengge elehon og isaruk ane fahet NINIKNI Allahn inineyap eneptuk laruhu.

¹⁰Ap ele hemet toho uruk lit onori apmayap eneptukon eke yanggaluhunmu yik aptuk ane men suwahal uruk ane men ap enebug uruk ane men eleg aruhu.

¹¹Ap sa indi puhun toho wereg lit ele fano roho uruk halug ap suwon are aruhu.

¹²Aben fuki roho wenggel halug inindi anggar aruhu ulug NINIKNI Allahn yet enesug lit enele si uruk ane elehap turuk.

¹³Ap yabuk irim toho turukonen ele uruk lit, ”Olomene olokon owahalma kahaleg lit an nuwabuk nowen nibamen wilip atmin fug,” uruk.

¹⁴Hiyap yaying turukon ambilik kiling ele yaron wereg. Ap sa fahet NINIKNI Allahn olok haruk halug kiling ino fam mako wamburuk.

¹⁵Malik toronen ket-ker ane turuk angge famen sabiyap alem fam unusuruk halug inindi anggar aruhu.

¹⁶Ap ekeyen an ninggikmu anggolo aruhu ulug tung inap fano-fano angge og isaruk lit ap inine elehon enenggengge hilaruk angge famen at anggengge eleg aruhu.

¹⁷Ap inindi anggat tehonen uruk latfahon holeg lamin! Iren uruk latfahon fahet milal naptuk latuson anden hat hiyag hitmin.

¹⁸Iren uruk latfahon hindimu foroho lit haren oho ap winon hiyag isaruk laruhun halug fano.

¹⁹Haren NINIKNI Allah fam wenggel haruk laruhunen anden o yoho hat milal hapmin.

²⁰Ap inindi anggat tehonen komo eneptuk lit alem wal-wal werehon il teng misigmen nubam hilag hinahan 30 kong heheg hiyag isaruk latfahon arimano anden hat fahet haharoho emberikik.

²¹Anden tem toho uruk ane milal hapminmu hol hamihinteg fobik hat howesi mon haptuson enembeg lalug hiyag isahun.

²²Enenggengge elehon arimano inine eleg ulug siyahap enebuk fug. Inilaheg toho werehon arimano alem haltuk ambehen sobir isahun fug.

²³NINIKNI Allahn inibil atuk lit it siyahap eneptukon arimano unusuhu.

²⁴Hat men enehum ahale horog inap men hori roho welamuhup fug. Enehummu het-pet haruk inap men ambiyeg welamuhup fug.

²⁵Iren turuk ane milal taruk lit yebangge yep tahun tohon!

²⁶Ap eke ubam paleg angge wereg halug haren paleg lahenon ari anden paluhuk ulug sali ubam umbuhun fug.

²⁷Hine elehen sali umbuhunon pisan tuhun halug hat nohorukmen heniye haren tohon apmaneyen lisoho hilahup tohon!

²⁸Fek humbasiyen yatfahon heneko kinang hili hikip toho imbik lahun fug.

²⁹Ap inggik fanowon yabuk ine roho witukon eke weregma yet haruk lahen ano? Wereg halug at ino ap ununuk toron enemingmingangge welam fug angge ap suwon raja fahet eneg yabuk wituk laruhu.