Read Angguruk Yali AMSAL 23 Bible Online

AMSAL 23 - Angguruk Yali bible

AMSAL 23

¹Ap suwon ekeyen suburu ambiyeg nulen ma ulug wol haptuk halug ap tu sa hahon men ambiyeg heriyeg lamul ulug fuki roho wenggel haruk laruhun.

²Hat suburu obok haptuk halug an eneg obog toho ninggi ha nowen ulug hubam anggat toho welaruhun.

³Ap suwonen unduk fano angge og hutuk halug nindi ninap napmin ulug og nutuk ano puhun.

⁴Hat hindi anggat teg halug nanggengge anggolo welalep peruk lit asengseng toho yabuk wituk laruhun fug.

⁵Hat hanggengge arimano il misig welatug folo-folo longgo uk teg. Suwe aherabul hag toho wilibig lit suwe kut pohol fil laruk hag toho mondabi longgo uk teg.

⁶Ap inggik pug tehon ekeyen suburu nulen ma ulug wol haptuk halug ambeg lahun fug. Unduk fano angge og netlep halug oho nele fug puhun.

⁷Aren hat hubam suburu men ik men hahiyeg toho namihin uruk angge famen indimuwen wenggel haruk lit suburu og utuk lahiyon fahet onggo nowen og nitmisi peruk lit turuk.

⁸At asuburu nelen halug me witlen. Hele fano roho ubam elen ane obog toho saplangge elen.

⁹Ap indi sohu roho werehon ubam hele uruk laruhun fug. Hat hindi anggat teg lit elenon fahet aren nirim pelep.

¹⁰Malik suwarehon enengginang hilamin ulug kinang hili hikip toho imbik lahun fug.

¹¹NINIKNI Allah ineyon inowen it inibil atuk lit hat apmayap habuhu rohon.

¹²Aben komo haptukmu fuki roho holeg laruhun. Mun ane man ane fahet amul haptukmu fano noluk amag ulug milal taruk laruhun.

¹³Hat hamloho komo ruruk ane umbusuhun fug. Sabiyap alem fam watukmu war aruhu fug.

¹⁴Haren waruhunon ari at ebe war atuk ambeg lahu rohon ulug windatuk laruhun.

¹⁵Namloho, hat hindi anggat toho welaruhun halug an nindi nahiyeg haruk laruhuk.

¹⁶Haren tem ane uruk laruhun halug an hat fahet nahiyeg toho welaruhuk.

¹⁷Siyag ane turuk inap nungge fahet fano wereg ulug hat hindi siyag am fug angge NINIKNI Allah fahet hakol toho weregman eneg welaruhun.

¹⁸Allahn let naptukmu amusun toho welaruhuk ulug hahiyeg toho welahen ane eleg aruhu fug.

¹⁹Namloho, an nele holtuk lit hindi anggar amag! Kalem pikiron larukon fahet wenggel haruk laruhun!

²⁰Ik olokon men wam unu men fahet enebuwap toho turukon men mangno roho welaruhun fug.

²¹It arimano enenggengge eleg atukmu inilaheg toho welamuhup. Yabuk wit ta fug angge noho inil toho weregman eneg enesum tararag heheg laruk laruhu.

²²Hikni hat indag haptisiyon ele holtuk laruhun. Hisinga sabal atuk halug helmahip toho turuk laruhun fug.

²³Fano roho milal naptukmu nindi anggar amag peruk lit tem toho peruk ane men fuki roho wenggeltuk ane men asengseng toho yami ruruk laruhun. Haren yami ruruk laruhun angge arimano hik-hak isaruk laruhun fug.

²⁴Amloho indi anggat teg lit Allahn peruk ane hikit toho turuk halug ikniyen ahiyeg haruk laruhu.

²⁵Hikni hisinga indag haptuson itanowen enehiyeg toho welamuhuben hat fano ane turuk laruhun.

²⁶Namloho, anden turuk lahiyon fuki roho kim haruk lit anden oho tu hag toho turuk laruhuk ulug wenggel haruk laruhun.

²⁷Ap unuhesi men yaying turuk hiyap men kiling ele yaron keleg tohon hag toho werehen mako wambihi ha nowen ulug onombolim laruk laruhun fug.

²⁸It arimanowen ap enenggengge hulul ulug kalemma sap enesug hag toho turuk lit ap anggolo unuhesi embeselug nenembeg wamag ulug inindi og eneptuk.

²⁹Ap san nilaheg ulug turuk lit yihi urukmen eneg wereg? San ori men suwahal eneg uruk lit indi siyahen uba yatukmen eneg wereg? Ap sa il hulu-pulu atuk lit yuhun angge yik aptukmen eneg yowilangge ubam atuk?

³⁰It ik olokon naruk inap arimanowen ari hag toho turuk. Iren ik olokon onoluk tehon men uwan nek haruk latusa fuhon men naruk lit heriyegman eneg hup humanoho atuk.

³¹Ik olokon arimano il hulu fano reg lit kubag elman umbagpag turukmu yet halug unduk fano rehen namin peruk lam fug!

³²Haren nahun halug pisanggo hukalowen fato eneptukmu ouk turuk hag toho hubam aruhu.

³³Hil elek turuken amu-amu ane yet haruk lit hindi nonghong uruken hele sibiling-sibiling ane uhun.

³⁴Ap e fam laharukmu siyeluwen mulilik la mulilik wam turuk hag toho hubam atuken hindi nonghong uruk laruhu.

³⁵Haren hele uruk lit, ”Aben nuwarehesa angge famen nuwatukon isihi fug. Nungge fahet folo-folo nindi yuwag atmin fug? Ari fahet nin eke ik olokon namin,” uhun.