Read Angguruk Yali AMSAL 24 Bible Online

AMSAL 24 - Angguruk Yali bible

AMSAL 24

¹Siyag ane turuk inap nungge fahet fano wereg ulug hat hindimu siyag am fug. It men ambiyeg welala ulug wenggel haruk laruhun fug.

²It inindimuwen nonolok ane tul ulug wenggel haruk lit ap siyahap enebul ulug enele sahaltuk.

³Ap inindi anggar atuk lit alem ekeyon-ekeyon fahet fuki roho wenggeltuk ane ari olun ineyon werehen o fano wir aruhu.

⁴Nungge-nungge fahet onoluk teg ane ariyen fano-fano angge inibam keleg aruhu.

⁵Ap inindi anggat tehon arimano mondabi palimu rehen ap inine werehon apma reg. Nungge-nungge fahet alem onoluk teg ane emberimu regma inine roho turuk ane men wirim teg eleg.

⁶Tog aptuk lit ke roho timin ulug tam fano roho wenggel halug lahun. Ap anggolowen fano roho komo haptuk halug haren tog aptuk lit palimu aruhun.

⁷Ap inindi anggat tehonen enele uruk ane arimano ap inindi sohu roho werehonen wenggel ha fug teg. Aben enele sahaltuk ambehen it inindi anggat teg elehonen enele uruk eleg.

⁸Indimuwen olok ane wenggeltuk ahun ino aben unuk siyag angge onowe suwaluhup.

⁹Inindi sohu roho werehonen mun ane man ane tuhuk ulug wenggel haruk ane ambiyangma siyag ane turukon inam atuk. Onori inda yag eneptukon arimano fahet aben ninirim peruk.

¹⁰Hat asengseng toho wereg li hakol haruk laruhun halug hine eleg aruhu.

¹¹Ap siyag ane turuk elegman alem angginon unubam emberuk lit unusul peruk ambeg hondog eneplug larukmen haren windat enebuhun.

¹²Haren te, ”Alem ari an napeleg,” uhun fug. NINIKNI Allahn hat hindimuwen wenggel haruk lahen ane kim hiyaruk lit tem toho uruk ano ulug oluk teg. Aren ap wal tanehen siyag ane fano ane turukon hikit toho ayeg war isaruk.

¹³Namloho, kin ahaluwe unduk fanowon hag toho

¹⁴ap inindi anggar atuk ane ari oho hat hindimu fano wereg. Hat hindi anggar aruhu halug Allahn let naptukmu amusun toho welaruhuk ulug hahiyeg toho welahen ane eleg aruhu fug.

¹⁵Ap unubabut siyahonen turuk hag toho ap pikir ane turukon kahal enesug lit inibam halog toho siyahap tuhun fug.

¹⁶It siyag ane turuk elehon sabirenam mako wamburuk lit nin hebeloho sabirenam in atuk angge famen it unubabut siyahon arimano mako wamburuk lit mondabi siyag amuhup.

¹⁷Hat men seli roho werehon mako wamburuk halug hahiyeg hahun fug.

¹⁸Hat hahiyeg harukmu NINIKNI Allahn yet hiyahureg haren siyag ane tehek peruk lit ap hat men seli roho werehon waruhuk peruk ane umbusuhu rohon!

¹⁹Ap siyahon fano roho weregma haren yet isaruk lit nungge fahet fano wereg ulug holok ha fug!

²⁰It arimano fano wereg lit amusun toho welam fug angge iral warehon hag toho welamuhup.

²¹Namloho, NINIKNI Allah men howe suwon raja ino men fahet hakol toho wereg lit it enele ying enebul perukon men hininggik ahandip toho welamuhup fug.

²²It arimano enepeleg toho weregman Allah men ap suwon ino menen alem angginon aben puk fug tehon unubam monde fik waharuk lamuhup.

²³Ap inindi anggat toho wereg lit uruk latfag ane winon hiyag hitminon tu: Ap tu suwon, tu toron ulug onorohole kim isaruk lit alem kong turuk ane ari siyag.

²⁴Alem kong turuk ahun ekeyen ap siyag ane turukon fahet alem ubam wereg eleg uruk halug ap o pumbuk kema-kema werehonen at ino huluwap turuk lamuhup.

²⁵Alem fano roho haltuk inap arimano NINIKNI Allahn inineyap eneptukmu fano welamuhup.

²⁶Aben kapal harukmu ele fano roho hebeltukon ari mako pug toho hi rurukon hag toho wereg.

²⁷Haren yabuk wituk lit suburu yaho fuhunteg eneg hibam wit talug humalikisi indag tahun.

²⁸Hareyen siyag ane tuk fugmen alem ubam wereg ulug un ane lombohap tuk fug.

²⁹Ap ekeyen fano ane siyag ane nubam turukon hikit toho anden oho ayeg waroho ubam tuhuk uhun fug.

³⁰An kalemma laruk lit yet harukmen ap indi sohu roho wereg lit yabuk irim toho turukonen suburu men hele anggur men yatuk ambeg welatisi.

³¹Yabuk elehet walinggoho ohowon ino miyaloho lin irisimu sarongge men alog-alog angge menen kinang ino keleg tegma yet harikik.

³²Yet harikikon fahet nindimuwen wenggel haruk lit milal tarikikon tu:

³³Hat hinggik si roho heriyeg lit, ”An kel taruk lit tor angge nohomin,” uruk lahen.

³⁴Hat nohoruk lit weregma hanggengge eleg aruhu. Yoholiyangge hilaruk inap waharuk hag toho suburu obok hubam aruhu.