Read Angguruk Yali AMSAL 25 Bible Online

AMSAL 25 - Angguruk Yali bible

AMSAL 25

¹Hun Salomoen uruk latfag ane winon Yehuda inap onowe suwon Hizkia otsiyen palu roho hahareg latfahon tu:

²Allahn alem hirako turukon fahet aben wel turuk. Ap suwonen alem fuki roho kim harukon fahet aben fog eneptuk.

³Pohol emberimu wereg ane men kinang apma wereg ane men aben wirim ha fug teg hag toho ap suwon inindimuwen wenggeltuk ane oho aben onoluk am fug teg.

⁴Siyag angge melei fam tag tehon indoken elehap turuk halug eneg melei il yanggo atukon ino fam aben eneliliyangge hinaharuk.

⁵Ari hag toho ap suwon komo ruruk inap unubabut siyahon arimano at olohotman yanggal enebuhup halug eneg ap suwon inowen mun ane man ane fano haltuk lit amusun toho welaruhu.

⁶Haren ap suwon olohotman winik-wonog toho turuk laruhun fug. Ap suwon-suwon iniraham unduhuk laruhuk puhun fug.

⁷Aben hat hubam, ”Nare, nit lehoma heriyegma lahik ma,” ulug wol haptuk halug fano. Aben hat hubam, ”Ap suwon eke hubalma hur arik watmisiyen hat heriyeg lahen ambeg ari kolo rebeseruk lit wambin,” ulug apmayap haptuk halug siyag. Hare ekeyen siyag ane turukmu yet hahunteg

⁸folo-folo alem ino halukag ulug ap hiyag isa lahun fug. Ap hiyag eselenma alem ino hare ubam eleg lalepma hinggali helen fug ano?

⁹Hat hare men henemumu wereg lit alem ino haloho umbuhupteg henele hirahoman uhubon fahet ap misig oho hiyag uruhun fug.

¹⁰Hiyag utukmu holuhuwon inowen, ”Nungge fahet enele hirahoman uruson fag tirisi?” ulug hat habug uruk laruhu ane eleg aruhu fug!

¹¹Aben fano holuk teg li enele fano ane urukon arimano mondabi fano. Ilembani umbagpag turukon kubag ili ruruk angge perak fam yihikon elma kilabehon hag toho wereg.

¹²Ap indi anggat tehonen komo urukon arimano sohomangge emas fam wirihon men aliliyangge umbagpag turukon men hag toho werehen aben fano holtuk lamag.

¹³Ikniyen ot eke monde feruk lit hiyag utuk ane hikit toho turuk halug aben yabuk wituk lit mo olokma ik il habuwon narukmu inindi sako atuk hag toho ikni ino indi sako aruhu.

¹⁴Aben nungge-nungge tuhuk ulug sali urukon hikit toho turuk elehon ino homhomowen hina walug waharuk angge famen osit pilaptuk elehon hag toho wereg.

¹⁵Ap indi imbik wamburuk lit ambilikmuwen ele fano roho urukon ekeyen ap suwon unuwag arikon fala enebuk teg.

¹⁶Haren kin ahaluwe hiyahakunteg nahun halug hahum ouken me wirehen ha nowen ulug tor angge eneg nahun.

¹⁷Misihim-misihim lamin peruk sambil eneg hare ibam laruk laruhun. Hareyen nungge fahet likiya hupmu an nambeg waharuk ulug hat fahet nirim puhu rohon!

¹⁸Alem haltuk ambehen are fahet ele si ane uruk ane ari ap unusuruk angge minggin ele ohowon ano karog olokon ano hag toho wereg.

¹⁹Asengseng toho wereg li ap indi wirik teg elehon ekeyen an let napmisi ulug wenggel haruk ane ari ayeg siyahonen sahaltuk ane men uyug salog-malog angge roho fuk turukon men hag toho wereg.

²⁰Ap indi anggin toho werehon seyap timin ulug himit-hemet toho sini yunggultuk ane ari o sun li sum nonggoltuk ane men ik sihon yowil fam hililtukon men hag toho wereg.

²¹Ap hat men hili roho werehon suburu obok toho wereg halug og uruhun, ik obok toho wereg halug hinang uruhun.

²²Ari hag toho haren ubam turukmu aren nare fam siyag ane tirikik angge famen aren fano ane nubam tehek ulug inggali hahu. Haren tuhun ane fahet NINIKNI Allahn fano ane tehek peruk lit indi hasug laruhu.

²³Ik eleruk filen osit siyeluwen walug waharuk hag toho ap enebug uruk ane ariyen inindi onolokap eneptuk.

²⁴Hiyap suwahal eneg urukon men o misigmu wereg ane ari siyag. Ahun hinawimu lahalug amumu wereg ane ari fano.

²⁵O pumbuk yatma inaben wene fanowon walug waharukon ari ik obok turukmu ik habuhon narukon hag toho wereg.

²⁶Ap olokonen are ubabut fanowon indi nonghonga feserukon ari ik wilip atukon famen il kul tehon hag toho wereg.

²⁷Kin ahaluwe anggolo narukon siyag toho wereg hag toho ap anggolowen an wel naplep perukon oho siyag.

²⁸Ap indimu olok atuk ane hondo rubuk fug tehon ari o pumbuk elehet oko kilabeg elegma ap seliyonen pin kurukon hag toho wereg.