Read Angguruk Yali AMSAL 27 Bible Online

AMSAL 27 - Angguruk Yali bible

AMSAL 27

¹Yoho famen sono hat welaruhun ane hapeleg toho welahenma alem tu men ari men tuhuk ulug hele hemet toho uruk laruhun fug.

²Hinggarehen wel taruk laruhun fug! Ap winon men hapeleg toho werehon menen hat wel haptuk lamuhup.

³Helep humon men ik yinggi men anggin angge famen ap sohu ane turukonen enele ying eneptukmu inindi ouk haruk ane mondabi anggin teg lit wereg.

⁴Ap unundaman ahe laharuk ane olok anggolo rehen ap siyag atuk ane ino we tot se reg angge famen hiyap eke helele perukon ino ap winonen hilaruk halug indi siyag atuk ane ap san hondo rubuk teg?

⁵Ap komo ruruk lit fag toho uruk ane ari fano regma nare nindi reg lahi angge famen komo rimin fug ulug ele uk fug angge wereg ane ari siyag.

⁶Areyen are indi reg lit watuk angge famen ap at men seli rohonen watmin ulug ele fano roho uruk lit mako pug toho sen haruk.

⁷Suburu ahum ouk toho nalug kin ahaluwe nirim ulug uyuhen sobir isaruk. Suburu obok turukmu mun angge man angge unduk sihon fahet fano peruk.

⁸Ibam embeselug yatma noruk ahun eke suweyen ei embeselug larukon hag toho wereg.

⁹Wam sei men amben fano angge men fahet aben enehiyeg haruk ane ari apma regma umbali indiyen komo ruruk ane palimu reg.

¹⁰Hat humbaliyet hikni umbaliyet hambol yig isaruk laruhun fug. Hare yatma werehon ekeyen let haptuk eleg angge famen humbalisi horogma werehonen let haptuk lamuhup. Ari fahet alem angginon hubam aruhu halug let nabin ulug hare ambeg la fug angge humbali ambeg lahun.

¹¹Namloho, hat hindi anggar aruhu halug an nahiyeg haruk laruhuk. Nahiyeg toho wereg lit anden ap apmayap naptukon arimano nele pikit toho hiyag isa reg laruhuk.

¹²Ap inindi anggat toho werehonen alem siyahon waharukmu yet haruk lit an nubam aruhu rohon ulug hirag atuk. Inindi anggat teg elehon arimanowen hirag am fug angge larukmen eneg siyag atuk.

¹³San ap o winamon ubam palehon anden paluhuk ulug sali emberuk angge famen waruk eleg halug sum aren tohon ilamna oko foroho lamuhup.

¹⁴Ap san hubet-habet are in am fugmu ele hi roho eleltuk halug areyen an huluwap nabehek puhu.

¹⁵Uheyen ahun fam suwahal eneg urukon ari ungga keyenteg teg keyen osit tep-tep wamburukon hag toho wereg.

¹⁶Siyelu men wam ahaluwe men ap ininggiken senebuk fug teg hag toho uheyen suwahal urukon ahunen senebuk fug teg.

¹⁷Karohen karog ayeg umatuk hag toho ap ekeyen are indi umatuk.

¹⁸Ap san e sawe fano foroho halug anggen naruk laruhu. Ap san ikni fano let turuk halug ikniyen wel turuk laruhu.

¹⁹Ik il wirikon fam pilap haruk lit inggareg orohole yet haruk hag toho ap inggareg indimu kim harukonen an ap sa hag toho welahi ulug oluk atuk.

²⁰Ap warehon wereg ambeg ap kurukmen eneg fobik oho keleg teg laruhu fug hag toho mun angge man angge an ale perukon indi yuwag aruhu fug.

²¹Melei indokma iringgurukmu il yanggo atuk hag toho ap ubabut sa hag toho wereg ulug at wel turuk ane ariyen inam atuk.

²²Aben wiramna helep fam halog turuk hag toho ap indi anggat teg elehon eke inine roho watep halug oho indi sohu roho wereg ane ino eleg alep fug.

²³Ap enenggengge werehon mondabi welaruhu fug. Eneliliyangge ap suwonen ununggulmu lahaptukon oho it unumalikisiyen ondohowonen ngi amuhup fug. Ari fahet hat hambohom fuki toho kim isaruk lit fano fet enesug laruhun.

²⁵Haren hambohom fahet hoholangge paloho walug waharuk laruhun. Hoholangge keron uwan wilip am fugmu punumu lahalug tahe paltuk laruhun.

²⁶Ari roho turuk laruhun halug hambohom domba oruk famen hasum yig taruk lit wam kambing fam kinang ayeg waroho hilaruk laruhun.

²⁷Kambing winon ag owe anggolo atukmu hat humalikisiyet hamingminganggeyet naruk lamuhup.