Read Angguruk Yali AMSAL 28 Bible Online

AMSAL 28 - Angguruk Yali bible

AMSAL 28

¹Allah nirim peruk inap arimano ap misihen oho mug eneplug la fugmen enekolen linggik-longgo uruk. Allahn fano peruk ane turukon arimano olomene kabiniyon hag toho wereg lit enekol haruk eleg.

²Ap o pumbuk suwonen Allah enembol yig utuk halug it onowesi eke lahuk eke wambuk turuk lamuhup. Onoweyen fuki roho wenggel haruk lit mun ane man ane aben tuk tehon oluk teg halug aret umalikisiyet inindi yuwag toho wereg lit amusun toho welamuhup.

³Ap anggengge elehon ekeyen ori inilaheg toho werehon enele ying eneptuk ane ari osit suwon naruk lit yaho angge obog toho siyahap turukon hag toho wereg.

⁴Allahn komo enepfag ane sobir isaruk inap arimanowen siyag ane turuk inap inibil atuk. Allahn komo enepfag ane senehon arimanowen it unubabut siyahon fahet ninirim peruk.

⁵Ap siyag ane turukon arimanowen aben tuk teg ane fahet wenggel haruk eleg. NINIKNI Allah yami rurukon arimano mun ane man ane alem obog toho fahet inindi anggat toho wereg.

⁶Ap enenggengge tor angge forohowonen siyag ane turuk elehon arimano palimu regma enenggengge su roho forohowon kalem pikiron embeselug un ke laruk inap arimano apma reg.

⁷Amloho indi anggat tehonen Allahn aben tuk teg ane fahet imbibahon hikit toho turuk. Mun angge man angge fahet enebuwap toho turuk inap men ambiyeg werehonen ikni inggaliyap turuk.

⁸Uang ap og isaruk lit hebeloho og numuhup sambil hiren unon sebe roho og numuhup ulug og isaruk ahun tung atuk angge famen fobik at anggengge arimano ap eke inggikmu aruhumu indiyen ap inine elehon og isaruk laruhu.

⁹Ap san Allahn komo enepfahon holtuk eleg halug aren sembahyang urukon fahet oho Allahn holuhu fug.

¹⁰Ap san fano ane turuk ahun un ke lawag ulug indi kahaltuk halug inggarehen kinang habulig ambeg mako wambuhu angge famen alem unubam wereg elehon arimano fano ane unubam aruhu.

¹¹Tung inaben ininggareg fahet nindi anggat teg lahi peruk angge famen ap enenggengge elehon inindi fuki roho wenggel harukonen it unubabut sa hag toho wereg ulug onoluk teg.

¹²Allahn fano peruk ane turuk inaben kinang seneg halug ap obog toho enehiyehen yunggultuk. Allah fahet ninirim perukon in atuk lit ap fet enesug halug ap obog toho enekolen hirag arik laruk.

¹³Ap san siyag ane turukon hiraharuk halug fano aruhu fug. Nambiken siyag ane tirikikteg nin hebeloho ari hag toho turuk laruhuk fug ulug fag toho urukon arimano NINIKNI Allahn indi enesug laruhu.

¹⁴Likiya hupmu NINIKNI Allah fahet enekol toho wenggel harukon arimano enehiyeg toho welamuhup. Inindi arik toho werehon arimano mako wamburuk lit siyag amuhup.

¹⁵Olok ahun eke ap suwon lahalug ap inine elehon fet enesuhon ino olomeneyen ap unusimin ulug ele ngu rurukon hag toho wereg.

¹⁶Ap onowe roho werehon eke indi anggat teg eleg halug umalikisi indi isa fug angge apmayap eneptuk. Umalikisi enenggengge hilaruk elehon arimano inine roho wereg lit amusun toho welamuhup.

¹⁷San ap pinggi ware feselug akolen hirag arik lamin ulug larukmen eneg war atuk ambeg lahu. Til larukmen war amag ulug embeseruk lamuhup!

¹⁸Ap san fano ane eneg turukon arimano fano amuhup. Sa kalem pikiron embeselug un ke larukon kiling elma mako wambuhup.

¹⁹Ap san yabuk wituk halug ahum toho naruk laruhu. Ap san alem elehon eneg yami ril laruk halug suburu obok toho welaruhu.

²⁰Ap inindi wirik toho werehon arimano fano ane anggolo unubam aruhu. Nanggengge folo anggolo amag perukon arimano alem angginon unubam aruhu.

²¹Ap tu suwon, tu toron ulug onorohole kim isaruk lit alem kong turuk ane ari siyag. An nibil amag ulug uang tor angge og utukmu hilaruk ahunen pikir ane hareyap turuk laruhu.

²²Mun angge man angge fahet enebuwap toho turukon arimanowen folo-folo tung ninap welamuhuk peruk angge famen folo-folo suburu obok haruk lamuhuk ulug wenggel haruk eleg.

²³Ap san are komo ruruk halug fobik areyen at ino indi reg laruhu angge famen an fahet fano pukag ulug ele fano roho uruk ahun fahet areyen nirim peruk laruhu.

²⁴Ap san ikni isinga enenggengge hirag talug siyag ane tihi fug urukon ino aben tohon huhulangge hilaruk inap men wirim teg.

²⁵Enebuwap fahet eneg wenggel harukon arimanowen onori men yik aptukmen eneg wereg. NINIKNI Allah fam wenggel harukon arimano mun angge man angge enesehet tohon ininggikmu atuk.

²⁶Ap indi sohuwonen an ninggarehen wenggeltuk lahi ane ariyen fano aruhuk peruk. Inindi anggat tehonen komo eneptuk ane holtukon arimano fano amuhup.

²⁷Ap san enenggengge eleg inap let eneptuk halug asehet teg angge eleg aruhu fug. It inindi enesug elehon arimano ap anggolowen lukuram sipuk toho pet eneptuk lamuhup.

²⁸Ap Allah fahet ninirim perukon in atuk lit ap fet enesug halug ap obog toho enekolen hirag arik laruk. Ap suwon arimano mako wambuhup halug Allahn fano peruk ane hikit toho turukon arimano hebeloho inine atuk lit palimu amuhup.