Read Angguruk Yali AMSAL 29 Bible Online

AMSAL 29 - Angguruk Yali bible

AMSAL 29

¹Ap eke aben komo rurukmu holmin fug ulug indi arik teg ane su atuk halug fano welahi perukmen alem siyahon ubam aruhumu al pisaloho lin-lan uhureg nin hebeloho fano aruhu fug.

²Allahn fano peruk ane hikit toho turuk inaben ap fet enesugmu ap obog toho enehiyeg toho wereg. Onolok ane turuk inaben fet enesugmu ap obog tohowen enele ya nga uruk.

³Malik aben milaltukmu fano holtukon inowen ikni indi ahiyehap turuk. Yaying turuk hiyap enembeg larukon inowen ikni anggengge elehap turuk.

⁴Ap suwon ekeyen alem obog toho fano haltuk halug at umalikisi men inine roho wereg lit amusun toho welamuhup. Ap suwon ekeyen likiya hupmu umalikisi unubam uang heng eneptuk halug at umalikisi men siyag amuhup.

⁵Ap san are fahet nirim peruk angge famen ele fano roho ubam urukon inowen are olohotma yebangge yep turuk.

⁶Ap siyag ane turukon arimanowen ininggareg fahet yebangge yep tubat taruk. Allahn fano peruk ane hikit toho turukon arimano enehiyehen yunggultuk.

⁷Allahn fano peruk ane hikit toho turukon arimanowen ap inine elehon unubam tuk teg ane onoluk teg. Allah fahet ninirim perukon arimano enepeleg toho wereg.

⁸O pumbuk ekeyen ap enele hemet toho uruk lit onori apmayap eneptuk halug ap obog tohowen enele ngik-ngog uruk. Inindi anggat tehonen enele hiyag isarukmu ngik-ngog urukon ari embeseruk.

⁹Ap indi anggat tehon ekeyen ap indi sohu roho werehon ubam suwahal uruk lit alem haltuk ambeg hondoholug laruk halug ap indi sohuwon ino olok atuk lit inda yatukmen eneg alem ubam werehon haloho umbuk fug teg.

¹⁰Ap unusil laruk inaben siyag ane turuk eleg inap fahet ninirim peruk angge famen inindi pikiron arimanowen war amuhup tohon ulug ili og eneptuk.

¹¹Ap indi sohuwon undama inahan turuk ane hondo rubuk fug angge olok toho turukmen eneg ap indi anggat tehon ekeyen indi yuwahap turuk.

¹²Ap suwon eke aben enele si ane hiyag utukmu hol isaruk halug at otsi obog tohowen enele si ane il laruk lamuhup.

¹³Enenggengge elehon men it siyahap eneptukon men NINIKNI Allahn ambi roho inil og isibag.

¹⁴Ap suwon indi wirik toho wereg lit alem ap inine elehon unubam werehon fano haltuk halug ine roho wereg lit umalikisi fet enesugmen eneg welaruhu.

¹⁵Malik ikni isingan komo ruruk lit sabiyap alem fam watukon ino indi anggar atuk angge famen malik ikni isingan komo ruruk elehon inowen isinga inggaliyap turuk.

¹⁶Ap Allah fahet ninirim perukon anggolo atuk halug siyag ane turukon su atuk angge famen it arimano mako wamburukmu ap siyag ane turuk elehonen yet isahup.

¹⁷Hat humalikisi fano roho komo eneptuk laruhun halug iren hat hahiyehap haptukmu hindi yuwag toho welaruhun.

¹⁸Allahn tuhuk perukon fahet fulu roho yet haruk ane eleg atuk halug ap obog toho pumbuk misig fam werehon arimano unubabut haleg eleg angge welamuhup angge famen Allahn aben tuk teg ane fahet imbibahon inine roho senehon arimano enehiyeg toho welamuhup.

¹⁹Ikniyen amingmingangge fam ele eneg uruk lit komo ruruk halug ele holoho embeseruk.

²⁰Ap fuki roho wenggel ha fug anggeyen ele urukon eke hat holuk teg? Ap ari hahon siyag aruhu angge famen inindi sohu roho wereg inap tot fano welamuhup.

²¹Ap san amingmingangge ebe totman pet tuk fug angge fano ane eneg ubam turuk halug fobik amingmingangge inowen ikni ele ying turuk laruhu.

²²Ap folo-folo onolok atukonen suwahal anggolo uruk lit siyag ane hum toho turuk.

²³Ininggarehen nit palimu welahe peruk inap arimano mako wambuhup angge famen inindi apma roho werehon arimano palimu amuhup.

²⁴Aben yoholiyangge warukon arimano fibitukmu ap san hilaruk halug inggarehen siyahap taruk. Akolen, ”Helehek ahun tu,” ulug ap hiyag isahu fugmu Allahn war amag ulug huluwap tuhu.

²⁵Ap kinangmon fahet enekol toho wereg ane ari yebangge ap yep eneptukon wereg. NINIKNI Allah fahet enekol toho wereg ane ariyen ap inindi yuwag atuk.

²⁶Ap anggolowen ap suwon onorohole yami eneptuk angge famen NINIKNI Allahn eneg alem obog toho hal eneptuk.

²⁷Ap fano ane turukon arimanowen siyag ane turuk inap fahet amben siyag peruk. Allah enembol yig utukonen kalem pikiron laruk inap fahet amben siyag peruk.