Read Angguruk Yali AMSAL 3 Bible Online

AMSAL 3 - Angguruk Yali bible

AMSAL 3

¹Namloho, anden milal haptuk lahiyon hapeleg am fug angge komo haptuk lahi ane hindimu foroho laruhun.

²Foroho laruhun halug hat hebe fano wereg lit amusun toho welaruhun.

³Hat Allah men ap men hininggik ahandip toho wereg lit hindi enesug lahen ane hamigmu haliliyangge hag toho lahabeg lit hindimu oho hahareg lit weregma umbusuhun fug.

⁴Umbusuhun fug halug Allah men ap menen hat inindi hasug lit hunuk suwap turuk lamuhup.

⁵Ninggarehen wenggeltuk lahi ane ariyen fano aruhuk puk fug angge we NINIKNI Allah fam hindi nonghong uk fug angge wenggel haruk laruhun.

⁶Haren NINIKNI Allah fam wenggel haruk lit mun ane man ane turuk laruhun halug hat lahun ke Aren hale fuhu.

⁷An ninggareg nindi anggat tohon welahi puk fug angge NINIKNI Allah fahet hakol toho wereg lit siyag ane tuk fug angge welaruhun.

⁸Ari roho welaruhun ane ariyen hat hebe hineyap haptuk lit ouk hubam werehon ino hihit habuhu.

⁹NIKNI Allah wel timin ulug hat hinggikmu werehon fano-fano angge men hiyabukmu yatuk lahen angge fanowon men og utuk laruhun.

¹⁰Og utuk laruhunmu roti anggen men anggur ahaluwe men hat hinggikmu anggolo atuken hibam umbat taruk ambeg wirim aruhu fug.

¹¹ Namloho, NINIKNI Allahn hat fano welamag ulug huwatuk halug hat hindi siyag am fug. Aren komo haptuk halug nungge fahet komo naptuk ulug nirim puk fug.

¹²Ikniyen amloho indi rehon watuk hag toho NINIKNI Allahn umalikisi indi enesuhon nele holukag ulug unusuruk.

¹³Ap indi anggar atuk lit fuki roho wenggeltuk ahun ino ahiyeg toho welaruhu.

¹⁴At ino indi anggar atuk ane ariyen mondabi fano welaruhu ane palimu rehen aben umbagpag turuk angge perak emas forohowon men wirim teg eleg.

¹⁵Ap inindi anggar atuk ane ino mondabi palimu rehen helep ili rurukon men mun angge man angge ninggikmu welalep perukon men ambi reg eleg.

¹⁶Ap inindi anggar atuk ane inowen tung inap atuk lit ununuk palimu laharukmu enebe amusun toho welamuhup.

¹⁷Ari roho wereg lit alem siyahon unubam am fug angge enehiyeg toho welamuhup.

¹⁸Ap inindi anggar atuk ane ino e anggen aben narukmu war atuk eleg ahen hag toho wereg. Ap san nin sebe roho nindi anggar alep peruk halug ahiyeg toho welaruhu.

¹⁹NINIKNI Allah indi anggat teg lit kinang yuk tuhu rohon ulug ineyap turuk lit fuki roho wenggel halug pohol leho fibag.

²⁰At eneg mun ane man ane oluk teg ane ariyen kinang apman ik laharukmu hina famen hibilil wambik waharuk.

²¹Namloho, hat hindi anggat teg lit fuki roho wenggel haruk lahen ane umbusuk fug angge hindimu fano foroho laruhun.

²²Foroho laruhunon ino aliliyangge fanowon hag toho hamigmu lahabeg lit amusun toho welaruhun.

²³Hat kalemma laruk lit huyug salog-malog angge roho wat ta fug angge hindi yuwag toho laruk laruhun.

²⁴Hat hakol eleg toho nohoruk laruhun. Fano noholug hubam se roho in atuk laruhun.

²⁵Allah ele windal isarukon arimano enepeleg toho weregman alem siyahon unubam atuk hag toho hat hubam atuk elehen yuk lagmag uruk laruhun fug.

²⁶Huyug yebangge elma luhur am nowen ulug NINIKNI Allahn fet hasug laruhu.

²⁷Ap inine elehon let enebuk hahon wereg halug hat hine reg lahen ane hikit toho fano ane unubam turuk laruhun.

²⁸Ap eke nareyen let napmisi ulug hambeg waharuk halug hare ubam lamihinteg o sono eneg let habuhuken nin waruhun ulug hiyag um fug angge ino sambil let tuhun.

²⁹Hori hiraham werehon hat fahet enekol elehen inindi yuwag toho weregma siyag ane unubam timin ulug wenggel haruk laruhun fug.

³⁰Ap ekeyen hat hubam siyag ane tuk fugmen suwahal ubam uruk laruhun fug.

³¹Siyag ane turuk inap nungge fahet fano wereg ulug hat hindi naruken it onombolim laruk laruhun fug.

³²NINIKNI Allahn At ele holtuk eleg inap fahet nirim peruk angge famen inindi pikit toho wereg inap iniraham wereg lit ele hiyag isaruk.

³³Allahn peruk ane windal isaruk inap inibam NINIKNI Allahn huluwap turuk angge famen Aren peruk ane turuk inap inibam fanowap turuk.

³⁴Onori inda yag eneptuk inap arimano Allahn hebeloho inda yag eneptuk angge famen ininggareg apmayap tarukon indi enesug.

³⁵Ap inindi anggat toho werehon ununuk su atukmu inindi sohu roho werehon ininggali haruk lamuhup.