Read Angguruk Yali AMSAL 30 Bible Online

AMSAL 30 - Angguruk Yali bible

AMSAL 30

¹O Masa ahun Yake amloho Agur inowen ele uruk latfag ane emberuk laheyon tu: Nikni Allah, anden sat toho wal harukmen eneg nine eleg atisi.

²Anden fuki roho wenggel ha fug tehen nindi sohu roho welahi ane men ap winon men wirim teg lahe fug.

³An nindi anggar atuk ane tor angge oho milal tarikik fureg At ebe usa fulu rehon fahet napeleg toho welahi.

⁴Ap sa poholma lahalug indi anggar atisimu nin hebeloho wambik waharisi? Ap san siyelu inggiken senetisi? San osit sum fam fani ririsi? San kinang atogman atogma hili waroho imbil laruk latfag? Ari obog toho teberuk ahun unuk sa? Amloho wereg halug unuk sa suwaleg? Hat holuk teg lahen halug hiyag nimin!

⁵Allahn ele tik-tem toho eneg uruk. At tog piyabangge hag toho wereg lit apma laruk inap mapmu enesug.

⁶Allah wene hiyag isaruk lit haren un ane sebe roho milal eneptuk laruhun fug. Un ane uruk laruhun halug Allahn hele si ane uruk lahen ulug hat komo yig huruhu rohon!

⁷Nikni Allah, an uwan war am fugmu Haren og nuruhunon fahet alem piren heng hapminon tu:

⁸Anden ket-ker ane men nele si ane men uruk laruhuk fuhen nineyap nabin! Haren an let naptukmu suburu obok haruk laruhuk fug, tung toho welaruhuk fug. Suburu likiya hupmu narukon eneg Haren og nutukmu nahiyeg toho naruk laruhuk.

⁹An nahum ouk toho naruk lit, ”NINIKNI Allah sa hag toho wereg?” ulug Hat fahet awiya wihi ha nowen. An nanggengge eleg aruhu halug oho aben angge yoholiyangge hilaruk lit anden Hat hunuk siyahap habuhuk tohon!

¹⁰Ikni olohotman amingmingangge abug uruk laruhun fug. Abug urukmu amingmingangge inowen hol halug lukuram sipuk toho pet habuhumu alem angginon hubam aruhu rohon!

¹¹Ap iniknisi huluwap eneptuk lit inisingasi hi eneptuk elehon wereg.

¹²Ap siyag angge enehapma tag tegman puhun toho welahe perukon wereg.

¹³Ap onorohole hemet toho, inindimu winik-wonog toho turukon wereg.

¹⁴Ap eneyeg karog olokon hag toho weregma ap inilaheg toho werehon mag-mag naruk.

¹⁵Ap muli hahon eke weregma aholani piren ununuk, ”Og nirik ma! Og nirik ma,” ulug suwal enesuhonen ap enemep naruk. Narukmen eneg nahummu aha uruk elehon alem uhan wereg:

¹⁶Ap warehon kuruk ambeg men, hiyap ibili atukon men, osit likiya hupmu naruk ambeg men, indoken anggolo ninggireg war atmin uruk elehon men hikit teg.

¹⁷Ap san isinga ele holuk fug angge il olok toho ikni pet turuk halug at ilanggen suwe kuren hililoho hik isahumu tunguniyen nahu.

¹⁸Alem anden fuki roho wenggel ha fug tehon uhan wereg:

¹⁹Suwe kut pohol ke laruk ane men, pisanggo helep fene laruk ane men, kou fam ik suwon yenggelehon ahum ke laruk ane men, ap men hiyap men inindi ambi roho wenggeltuk ane men.

²⁰Yaying turuk hiyaben turuk ane tu: Mag-mag nalug ambilik umaho felug, ”Siyag ane tihi fug,” uruk.

²¹Alem kinang yuk turuk ane uhan wereg:

²²Amingmingangge ap suwon laharukon men, ap indi sohuwon tung atukon men,

²³hiyap aben inirim tehon ap ekeyen hilarukon men, amingmingangge ekeyen isinga miyaloho pilaptuk lit ubalma in atukon men hikit teg.

²⁴Lebe ruruk angge toron famen inindi anggat anggolo rehon uhan wereg:

²⁵Inini arimano inine eleg angge famen o sun laharuk li naruk lamuhukon ulug mun angge man angge andog toho imbik waharuk.

²⁶Pak inine eleg angge famen helep elma ei wituk.

²⁷Heren puluwe onowe wereg eleg angge famen mondoko wilip atug luhaloho laruk.

²⁸Siyobolo ap ininggiken sen enebuk teg angge famen ap suwon inibam kuruk.

²⁹Unuyug inine roho larukon uhan wereg:

³⁰Wam pak mene sehelimu olomene eneg ine roho wereg lit mun angge man angge fahet akolen hirag atuk elehon ino men,

³¹suwe ayam abon unggul leko larukon men, wam kambing yuhambukon men, ap suwon umalikisi enelukema larukon men hikit teg.

³²Hindi sohu rehen nolok ane timin ulug hele hemet toho uhun tohon hinggiken hambilik larin!

³³Sak watukmu amug wamburuk.[5] Ap ambiyangma watukmu mep wilip atuk. Ap indi watukmu yig aptuk ane inam atuk.