Read Angguruk Yali AMSAL 31 Bible Online

AMSAL 31 - Angguruk Yali bible

AMSAL 31

¹O Masa inap onowe Lemuel isingan milaltuk lit uruk latfag ane emberuk laheyon tu:

²Namloho, anden Allah fam heng tirikik humalik welahenonen anden iminon holeg lamin!

³Likiya hupmu hiyap enembeg laruk lit it men ambi atukmen eneg hine eleg aruhu rohon! Iren ap suwon anggolo siyahap eneptuk latusa angge re har oho siyahap habuhup tohon!

⁴Lemuel, namloho, ap suwonen ik olokon naruk halug ari siyag. Ap onowesiyen, ”Ik olokon kema wereg?” ulug yami ril laruk lamuhup fug.

⁵Iren ik olokon nalug nenek turuk lit tu men ari men turuk lamuhup ulug imbibahon enepeleg aruhumu ap inilaheg toho werehon unubam tuk teg ane umbusuhup tohon!

⁶Ik olokon ino ap war am hag ane turukon men inindi anggin toho werehon menen nawag ulug hinang esemek!

⁷Iren ik olokon nalug enenggengge eleg ane fahet enepeleg atukmu asengseng haruk ane wenggel haruk lamuhup fug.

⁸Ap enembilik larehon fahet hele uruk laruhun. Inine elehon unubam tuk teg ane turuk lamag ulug ili og eneptuk laruhun.

⁹It unubahet hele uruk lit alem haloho emberuk laruhun. Enenggengge eleg inap men inilaheg toho wereg inap menen tohon aben hila nowen ulug ili og eneptuk laruhun.

¹⁰Ap uhe ubabut fanowon yami ruruk ane anggin teg. At ubabut fanowon men ilembani umbagpag turukon men wirim teg eleg.

¹¹Ahunen uhe fahet fano roho let naptuk ulug wenggel harukmu uheyen at anggengge fano roho forohoman eneg anggolo aruhu.

¹²At ino oluk wereg lit ahun fam olok ane tuk fug angge we fano ane eneg ubam turuk laruhu.

¹³Aren hekel unu men wam domba oruk men yami ruruk lit asukun fano roho suwaltuk laruhu.

¹⁴Ap enenggengge ayeg waroho hilahuk ulug ik suwon yenggelehon ahum pali ke kou fam laruk hag toho aren naruk angge yatman walug waharuk laruhu.

¹⁵O sakan turuk elegma in atlug ahun men unumalikisi men fahet naruk angge esetuk lit amingmingangge hiyap angge yabuk wal taneg hiyag isaruk laruhu.

¹⁶At inowen kinang fanowon yami ruruk lit ayeg waroho hilaruk laruhu. At inggareg inggiken nungge-nungge turukmu uang og utukon fam anggur anggen onggo paloho hilalug yabuk ino fam yatuk laruhu.

¹⁷Hiyap inowen asukun fano roho turuk lit yabuk ine roho wituk laruhu.

¹⁸Nungge-nungge turuk lahiyon fano teko laruk ulug oluk teg lit hubanggo oho iral umbagpag tebelug yabuk turuk laruhu.

¹⁹Hekel suwaloho sum yihik feruk laruhu.

²⁰At indi fisalak toho wereg lit ap enenggengge elehen inilaheg toho werehon og isaruk laruhu.

²¹At ibam werehon obog toho fahet sum inahanon yihikon wep toho foroho lit o sun waharuk li indi anggin toho welaruhu fug.

²²Enebe hililip toho nohoruk angge inggareg inggiken uruk laruhu. Sum il huluwon fano roho yihikon wan teg lit welaruhu.

²³Ahun ino o ino fet enesug inap enesehelimuwon werehen ap obog tohowen at unuk onoluk aruhu.

²⁴Uhe inowen sum men hele enelunggu ke pug turukon men yihik felug ap onggo paloho waruk inap unubam ayeg waroho og isaruk laruhu.

²⁵At indi wirik toho weregma aben at fano peruken fobik teko lahu ane fahet indi anggin toho wenggel haruk laruhu fug.

²⁶At ino ubabut lombuk toho wereg lit ele apma roho uruk laruhu. Indi anggat tehen ele pikit toho hiyag isaruk laruhu.

²⁷At ino likiya hupmu yabuk turuk lit ibam wereg ane fahet fuki roho kim haruk laruhu.

²⁸Umalikisiyen at fahet enehiyeg anggolo harukmu ahunen oho at wel turuk lit,

²⁹”Hiyap anggolo unubabut fanowon wereg angge famen we hat eneg mondabi palimu welahen,” uruk laruhu.

³⁰Hiyap onorohole fanowon ilamna roho werehon fahet wel eneptuk lamuhup fug. NINIKNI Allah fahet enekol toho wereg hiyap arimano eneg wel eneptuk lamuhup.

³¹At inggik fam fano roho turukon fahet hebeloho hinindi haruk lit hiyap ino fano ulug o kema-keman wel turuk lamuhup.