Read Angguruk Yali AMSAL 4 Bible Online

AMSAL 4 - Angguruk Yali bible

AMSAL 4

¹Numalikisi, hit hinindi anggar aruhuwen an hinikniyen komo heneptuk lahi ane fuki roho hol haruk lamuhup.

²Anden fano milal heneptuk lahi ane umbusuhup fug.

³An nebe totma nikni nisinga menen nenemloho we misig eneg wereg ulug

⁴nikniyen an nubam ele uruk lit, ”Anden milal haptuk lahi ane hindimu foroho laruhun halug fano welaruhun.

⁵Hat hindi anggar atuk lit mun ane man ane fahet fuki roho wenggel haruk laruhunen an hiyag hutuk lahi ane suhan isaruk lit hapeleg aruhu fug.

⁶Hat un ke la fug angge fano welaruhunen ap inindi anggar atuk ane ari umbusuk fug. Ap inindi anggar atuk ane ariyen hat fet hasug laruhuwen hindi reg laruhun.

⁷An nindi anggar ale peruk ane ariyen eneg ap inindi anggar am teg. Haren mun angge man angge hinggikmu werehon onggo paltuk lit ayeg waroho fuki roho wenggel haruk ane ino an atmin ulug yami ruruk laruhun.

⁸Ap inindi anggar atuk ane ari palimuwap turuk laruhun halug har oho palimu aruhun. Ap inindi anggar atuk ane ino ap hag toho mako pug turuk laruhun halug at famen hat hunuk su aruhu.

⁹Ap inindi anggar atuk ane ari ap suwonen eneliliyangge ununggulmu hobog turuk hag toho hunggulmu lahaptuk laruhun,” irisi.

¹⁰Namloho, anden nele hiyag hutukmu fano komo naptuk ulug wenggel haruk laruhun halug hat amusun toho holuk welaruhun.

¹¹Hat hindi anggat toho kalem pikiron laruk laruhun ulug milal haptuk latikik.

¹²Milal haptikik ane hikit toho laruk laruhun halug hat huyug salog-malog angge roho wat ta fug angge fano yaho ke eneg laruk laruhun.

¹³An milal naptuk latusa ane ariyen fano noluk welaruhuk ulug hapeleg am fug angge hine roho seneg laruhun.

¹⁴Allah fahet ninirim peruk inap onombolim laruk lit iren onolok ane turukon hikit toho turuk laruhun fug.

¹⁵Ap arimano laruk ke an lamin fug ulug hamu ke laruk laruhun.

¹⁶Iren siyag ane tulug eneg enehiyeg toho nohoruk. Ap fuk toho unusukag ulug miyal eneptuk eleg sambil ino hubanggo nohorukmen inindi angginen lagmag in atuk.

¹⁷Aben likiya hupmu suburu naruk hag toho iren enesupmu roho Allah enembol yig utug siyag ane turuk. Ap enehiyehen ik olokon naruk hag toho iren onolok ane til-wil laruk.

¹⁸Ap Allahn peruk ane turukon arimano mo lahik waharuk lit mondabi seleg atukon hag toho wereg.

¹⁹Ap Allah enembol yig utug siyag ane turukon arimano o hik tehon hag toho wereg. It kalemma laruk lit enepeleg toho weregman unuyug ahap sultuk toho mako wamburuk.

²⁰Namloho, an nele urukmu hisanggo leho lit fuki roho holeg lamin!

²¹Anden hiyag hutuk lahiyon sobir isa fug angge hindimu fano foroho laruhun.

²²Anden komo haptuk lahi ane fahet milal tarukon arimano enebe fano wereg lit amusun toho onoluk welamuhup.

²³Mun angge man angge hinggikmu werehon siyag aruhu rohon ulug kahaleg lahenon apma regma nindi fano wenggel haruk laruhuk ulug kahaleg laruhunon ari palimu welamag. Inindimuwen wenggel harukon famen ap onoluk wereg ane wilip atuk.

²⁴Hele piren toho uruk lit sibiling-sibiling ane uruk laruhun fug.

²⁵Hat kalemma laruk lit hilen fima-fima yet ha fug angge we haluke fil yet hil laruk laruhun.

²⁶Haren kalem pikiron eneg lamin ulug fano wenggel haruk laruhun halug o kema-kema lamin peruk laruhun ambeg fano laruk laruhun.

²⁷Un ke lahuk tohon ulug hinggik pikit fil ano hare fil ano la fug angge kalem pikiron eneg laruk laruhun.