Read Angguruk Yali AMSAL 5 Bible Online

AMSAL 5 - Angguruk Yali bible

AMSAL 5

¹Namloho, an nindi anggat teg lit komo hapmin ane hol himin! Anden fuki roho wenggel haruk lahiyon holeg lamin!

²Holmihin halug hat mun ane man ane fahet holuk aruhumu hele tem toho uruk lit tuk teg ane eneg turuk laruhun.

³Yaying turuk hiyap ambilikmu kin ahaluwe unduk fanowon hag toho wereg. Aben an fahet inindi nawag ulug ele fano uruk angge famen

⁴ap ambeg larukmu hiyap ino amiye sihon men karog olokon men hag atuk.

⁵He ino war atuk ambeg larukmu at ombolim laruk inap oho ap warehon wereg ambeg kuruk.

⁶At ino fano noluk welaruhuk ke lamin puk fug angge fobik siyag aruhu ane fahet apelehen la wam turuk.

⁷Ari fahet numalikisi, anden uruk lahiyon fuki roho holeg lit un ke laruk lamuhup fug.

⁸Hat namloho, at men ambi amul ulug ibam horogma laruk laruhun fug.

⁹Laruk laruhun halug aben hat habug urukmu hiyap ino oriyen inindi hiya fug angge huwabuhup.

¹⁰Haren yabuk lisag toho witukmu hinggikmu atuk angge arimano ap winon hat hapelehon naruk lamuhup.

¹¹Hat hunu eleg aruhumu huwag eneg welaruhun halug haren ngesekum turuk lit,

¹²”Nambiken, nungge fahet an komo naptukmu nirim peruk latikik?

¹³Nungge fahet an milal naptuk inap enele holmin fug ulug nisanggo latuk latikik?

¹⁴An Allah umalikisi sehelimu weregman mako wamburuk lit siyag atuk lahi,” uruk laruhun tohon.

¹⁵Ari fahet ik eleruk hat hibamen wilip atuk ahik eneg naruk laruhun.

¹⁶Hat hahaluwe o silimu lawag ulug hibamen wilip aruhu ano?

¹⁷Hahaluwe hiyap winon fahet welaruhu fug, hat hibam eneg welamag.

¹⁸Hat kabinimu huhe hilarikinon ino Allahn ineyap turukmu at men eneg henehiyeg toho welamuhup.

¹⁹Huhe orohole fano reg lit likiya hupmu ag fam hahiyehap haptukmu at fahet hindi regman eneg welaruhun.

²⁰Namloho, nungge fahet hiyap hapelehon ag seneg lit at men henehiyeg toho ambiyeg nohoruk lamuhup?

²¹Ap o kema-kema laruk ane obog toho NINIKNI Allahn fuki roho yet isaruk.

²²Ap Allah fahet ninirim perukonen siyag ane turuk lit yebangge yep tarukon elma ininggareg luhur atuk.

²³Ap ari hahon indi sohu roho wereg lit un ke larukmen eneg aben komo ruruk ane holtuk elehen war aruhu.