Read Angguruk Yali AMSAL 6 Bible Online

AMSAL 6 - Angguruk Yali bible

AMSAL 6

¹Namloho, hare ekeyen paleg angge wereg halug haren paleg lahenon ari anden paluhuk ulug sali umbuk fug.

²Sali umbuhun halug yebangge elma luhur ahen ha nowen!

³Sali umbuhunon ariyen hare inggikmu aruhun tohon. Namloho, sali ari hahon umbuhun halug nare inggikmuwen wilip aruhuk ulug folo-folo tuhunon tu: Hare ambeg lahunteg hele ine roho, ”Sali hubam irikikon elehap tin,” uhun.

⁴La fugmu kel tamin ulug nohuk fug.

⁵Suwe yebangge elma kulug wilip ale ulug turuk hag toho har oho folo-folo hare inggikmuwen wilip aruhun.

⁶Mun ane man ane timin fug ulug saplangge heriyeg lahenon, ininiyen turuk ane kim isa lamihinteg hindi anggar amag!

⁷It arimano onowe men milal eneptukon men wereg eleg angge famen

⁸anggen wirik atukmu naruk li itano suburu obok li narukon fahet andog toho umbat taruk.

⁹Hat hasukun siyahon, hat nohorukmen eneg noenam welaruhunteg in aruhun?

¹⁰Hat hinggik si roho heriyeg lit, ”An kel taruk lit tor angge nohomin,” uruk lahen.

¹¹Hat nohoruk lit weregma hanggengge eleg aruhu. Yoholiyangge hilaruk inap waharuk hag toho suburu obok hubam aruhu.

¹²Ap onolokon unubabut siyag ane eneg turukon arimanowen enele si ane il-wil noruk.

¹³Iren ap enele ying enebul ulug inil humbut atil ininggik unuyug puhula-puhula atil laruk.

¹⁴Likiya hupmu inindimuwen siyag ane tul ulug wenggel haruk lit onori men yik aptukmen eneg wereg.

¹⁵Ari fahet iren fano welahe perukmen alem siyahon unubam aruhumu al sahaloho lin-lan uhupteg nin hebeloho fano amuhup fug.

¹⁶NINIKNI Allahn nirimen telep fug perukon alem sabiren wereg:

¹⁷Onorohole hemet toho werehon, enembiliken si ane urukon, ininggiken ap siyag ane turuk elehon unusurukon,

¹⁸inindimuwen onolok ane wenggeltukon, unuyug siyag ane timin ulug larukon,

¹⁹tem toho yet hihi ulug enele si ane urukon, ot owe hili roho welamag ulug inindi kahal eneptukon.

²⁰Namloho, an hikniyen hiyag hutuk lahiyon fuki roho holtuk laruhun. Hisingan komo haptuk ane oho sobir isahun fug!

²¹Niren hiyag hutuk laheyon haliliyangge hag toho lahabeg lit hindimu pug toho foroho laruhun.

²²Hat kalemma larukmu wene komo ariyen hat hondog haplug laruk laruhu. Hat nohorukmu fet hasug laruhu. Hat in atukmu hat hubam uruk laruhu.

²³Nit nenele iral hag toho wereg lit hat lamin peruk ke selehap haptuk lahe. Niren komo haptuk laheyon hikit toho laruk laruhun halug fano holuk welaruhun.

²⁴Ap unuhesi men yaying turuk hiyap menen enele fano roho uruk lit hindi og habul ulug turukmu wene komo ariyen hat fet hasug laruhu.

²⁵It onorohole fano rehen og enepmin puhun fug. Inil fano roho kim hiyaruk lit hindi og habuhup tohon.

²⁶Aben hiyap yaying turukon onggo suburu misig eneg og isaruk angge famen ap unuhesi pal taruk ane onggo war atuk ane inam atuk.

²⁷Ap ekeyen indok ambiyang amigmu mako pug toho walug larukmu sum wan tehon indoken nahu fug ano?

²⁸Ap ekeyen indok anggen sobir isarukmu uyug fato ruhu fug ano?

²⁹Ari hag toho are uhe senetuk ahun oho alem angginon ubam aruhu.

³⁰Suburu oboken aben angge hilarukon arimano aben ininggaliyap eneptuk lamuhup.

³¹Aben ari hahon senetuk halug yoholiyangge hilarisi angge sabirenam hebeloho ngi ahun og uruhu ulug kong toho umbuhup ane hikit toho anggengge obog toho og uruhu lit teg.

³²Inindi sohu roho wereg inaben eneg ap unuhesi pal taruk. Ap inggareg wat tamin perukonen are uhe fano pal tawag!

³³Alem angginon ubam aruhumu aben apmayap turuken inggali harukmen eneg welaruhu.

³⁴Hiyap ino ahunen at fahet olok haruk lit indi ha fug angge ware fesehu.

³⁵Alem ubam werehonen onggo anggolo og itmin puhu angge famen hiyap ino ahunen onggo ino embeselug hun ino ware fesemin puhu.