Read Angguruk Yali AMSAL 7 Bible Online

AMSAL 7 - Angguruk Yali bible

AMSAL 7

¹Namloho, anden nele uruk lahi ane hapeleg am fug angge komo haptuk lahiyon wenggel haruk laruhun.

²Hat fano holuk welaruhunen hinggareg hilanggen fano roho foroho lahen hag toho anden komo haptuk lahi ane fano foroho laruhun.

³Sohomangge hinggikmuwon hog toho umbusuk fug angge wan teg lahen hag toho anden komo haptuk lahiyon hindimu pug toho foroho laruhun.

⁴Ap inindi anggar atuk ane fam nerek uruk lit ap onolukap eneptuk ane fahet nare nindi anggen tohon peruk laruhun.

⁵Hiyap ap unuhesi men yaying turuk hiyap menen enele fano roho uruk lit hindi og haptukmu it piren itanowen hat fet hasug lamuhup.

⁶Misihim sambil nibam sok ele keyen yet harukmen

⁷malik kabiniyon inindi wirik teg elehon enesehelimu misig indi mondabi anggat teg elehon weregma yet harikik.

⁸O hup atuk lit sinal ele eleg atikim malik ino hiyap eke ibam fil laruk lit ke mase roho laruk ambeg horogma larisi.

¹⁰Larukmen hiyap inowen ap yami enepmin ulug yaying turuk hiyaben wan turuk asum wan toho waharisireg malik ino men salkal urusa.

¹¹Indi yuwag toho ibam welam fug tehen ambong se roho wilip atuk lit inggali eleg toho

¹²kalemma lalug ap luhaloho wereg ambeg in arik lalug ke handuhal turuk ambehen ap yet enesug latisi.

¹³Hiyap ino malik kabiniyon ino ambeg waharisireg mako pug toho hi ririsireg inggali eleg toho ele uruk lit,

¹⁴”Anden sali emberikikon hikit toho o yoho Allah fahet wam eke warihireg unu winon olma umbat tihi.

¹⁵Wam unu ino ambiyeg nulen hat hondog hapmin ulug nibamen wilip ahireg hambeg wahi.

¹⁶An nibam nohoruk lahi ambeg ilit heniye fanowon Mesir inaben uruson tuwale fihireg

¹⁷amben fano angge eke hag eke hag hilili fihireg wahi.

¹⁸Ari fahet ketiya lulteg nenehiyeg toho ambiyeg walinggoho nohorukmen eneg o sakan tuhu.

¹⁹An nahun yatma larisimu olma wereg eleg.

²⁰Uang su roho walug larisi angge re o nunggul hurikenam welaruhureg waruhu lit teg,” irisi.

²¹Ari roho hiyap inowen ele fano roho uruk lit ap umalik ino indi kahaltisi.

²²Indi kahaltisimu hol harisireg malik inowen nungge-nungge wenggeluk fug angge aben wam sapi wabuk oho lit walug laruk hag toho hiyap ino men larisi. Pak sapna elma kuruk lit war atminen kimin ulug wenggeltuk eleg hag toho at ino larisi. We tot welatminmu tohen ap indi ahako folok toho kuruk hag toho nubam timisi puk fug angge larisi.

²⁴Ari fahet numalikisi, anden komo heneptuk lahi ane tu holeg lamek:

²⁵Hiyap ari hag toho urukonen hinindi kahal heneptukmu hiren holtuk lit ombolim la fug.

²⁶At inowen ap enele ying eneptuk lit anggolo roho unusuruk latisi.

²⁷Ap sa at ibam laruk halug war atuk ambeg laruk.